E Sumo Sacerdote Cu A Condena Hesus

NA NOVEMBER 1990, algun homber cu tawata traha den un parke y un caya mas o menos un kilometer sur di e Stad Antiguo di Herusalem a haci un descubrimento fasinante. Accidentalmente un tractor a basha dak di un graf bieu abou. For di siglo un prome cu nos era henter e area rond di e sitio ei a sirbi como un santana grandi pa mas o menos 200 aña. Loke arkeologonan a haya den e graf aki en berdad tawata interesante.

Den e graf tawatin 12 osario, of cahita di weso. Nan tawata pone e wesonan di un defunto den un osario despues cu el a pasa mas o menos un aña den e graf y su carni a putri caba na nada. Den banda di un di e osarionan aki masha bunita graba—un di e mihornan cu a yega di ser haya—tawatin nomber di Yehosef bar Caifa (Hose yiu di Caifas).

Muy probablemente ta trata aki di e graf di e sumo sacerdote cu a dirigi e caso di corte di mas importante cu a yega di ser teni—esun di Hesucristo. E historiado Hudiu Yosefo ta identifica e sumo sacerdote aki como “Hose, kende tawata yama Caifas.” Den e Scritura, e ta ser yama simplemente Caifas. Dicon nos mester ta interesa den dje? Pa ki motibo el a condena Hesus?

Su Bida y Su Famia

Caifas a casa cu yiu mohe di Anas, un otro sumo sacerdote. (Huan 18:13) Probablemente a regla e matrimonio aki hopi aña prome cu e casamento mes a tuma luga, ya cu ambos famia lo kier a haci sigur cu nan a sera un bon combenio. Esaki a nifica analisa e genealogianan cuidadosamente pa garantisa cu e desendencia di sacerdote a keda puro. Aparentemente ambos famia tawata rico y aristocratico, y probablemente nan a yega na nan rikesa pa medio di propiedadnan grandi den e area di Herusalem. Sin duda Anas kier a haci sigur cu su futuro yerno lo tawata un aliado politico confiabel. Ta parce cu tanto Anas como Caifas tawata pertenece  na e secta influyente di e saduceonan.—Echonan 5:17.

Como miembro di un famia prominente di sacerdote, Caifas lo a ricibi un educacion den e Scritura Hebreo y su interpretacion. Su sirbishi di tempel lo a cuminsa tempo cu e tawatin 20 aña di edad, pero na ki edad el a bira sumo sacerdote si no ta conoci.

Sumo Sacerdote y Sacerdote Principal

Originalmente nan tawata nombra un sumo sacerdote pa bida largo y e posicion tawata pasa di mayor pa yiu. Pero den siglo 2 prome cu nos era, e asmoneonan a podera di e funcion di sumo sacerdote. * Herodes e Grandi tawata nombra y destitui sumo sacerdote, y esei ta mustra bon cla cu ta e tawata e autoridad real tras di e funcion aki. E gobernadonan Romano a sigui e mesun custumber aki.

E desaroyonan aki a hiba na e formacion di un grupo cu e Scritura ta yama “e sacerdotenan principal.” (Mateo 26:3, 4) Ademas di Caifas, e grupo aki tawata inclui exsumo sacerdotenan, manera Anas, kende a ser destitui pero a sigui carga e titulo. E grupo a inclui tambe e famianan djacerca di esun cu na e momento ei tawata sumo sacerdote y di esnan cu den pasado a sirbi como tal.

E Romanonan a laga e maneho diario di Hudea den man di aristocracia Hudiu, incluso e sacerdotenan principal. Esaki a permiti Roma controla e provincia y garantisa cu e placanan di belasting a drenta sin tawatin nodo di manda mucho solda ayanan. Roma a spera pa e lidernan Hudiu mantene ordo y defende su interesnan. E gobernadonan Romano no tawata gusta e lidernan Hudiu dje hopi ei, y esakinan no tawata contento cu e dominio Romano. Pero a cumbini tur dos pa nan coopera cu otro pa por a mantene un gobernacion stabil.

Pa e tempo di Caifas, e sumo sacerdote tawata e lider politico di e Hudiunan. Esun cu a nombra Anas na e puesto aki tawata Sirenio, gobernado Romano di Siria, na aña 6 of 7 di nos era. Segun tradicion rabinico, golosidad, nepotismo, opresion y violencia tawata caracteristicanan tipico di famianan prominente di e aristocratnan Hudiu. Un escritora a trece dilanti cu como sumo sacerdote, Anas lo kier a haci sigur cu su yerno lo a haya un “promocion rapido den e herarkia di tempel; al fin y al cabo, mas halto e posicion di Caifas tawata, mas probecho Anas lo por a saca di dje.”

Valerio Grato, gobernado di Hudea, a core cu Anas rond di aña 15 di nos era. Tres otro persona, incluso un di Anas su yiu hombernan, un tras di otro a ocupa e puesto di sumo sacerdote. Caifas a bira sumo sacerdote rond di aña 18 di nos era. Poncio Pilato, kende a ser nombra como gobernado di Hudea na aña 26 di nos era, a manten’e na su puesto durante henter e gobernacion di dies aña di Pilato. E termino di Caifas a inclui e periodo di Hesus su ministerio y e prome añanan cu su disipelnan a predica. Pero Caifas tawatin un actitud hostil pa cu e mensahe cristian.

Miedo di Hesus, Miedo di Roma

Caifas a mira Hesus como un buscado di trobel peligroso. Hesus a cuestiona e manera cu lidernan religioso a interpreta e leinan di sabat y el a core cu e comerciantenan y cambiadonan di placa for di e tempel, declarando cu nan a hacie “un cueba di ladron.” (Lucas 19:45, 46) Algun historiado ta kere cu ta famia di Anas tawata doño di e plasanan ei den e tempel—esei podise tawata un motibo mas pakico Caifas kier a silencia Hesus. Ora e sacerdotenan principal a manda oficialnan pa aresta Hesus, esakinan a keda asina impresiona pa loke nan a tend’e papia cu nan a regresa man bashi.—Huan 2:13-17; 5:1-16; 7:14-49.

Mira kico a sosode ora e lidernan religioso Hudiu a tende cu Hesus a resusita Lazaro. E Evangelio di Huan ta conta: “E sacerdotenan principal y e farizeonan a convoca un consilio, y tawata bisa: ‘Kico nos ta haci? Pasobra e  homber aki ta haci hopi milager. Si nos lag’e sigui asina, tur hende lo kere den dje, y e Romanonan lo bin y kita tanto nos luga como nos nacion.’” (Huan 11:47, 48) E consilio (Sanedrin) a mira Hesus como un menasa pa e autoridad di e institucion religioso y pa orden publico, pa cua Pilato a tene nan responsabel. Cualkier movemento popular cu e Romanonan por a interpreta como un lantamento contra autoridad por a proboca nan intervencion den asuntonan Hudiu—algo cu e consilio kier a evita a todo costo.

Aunke Caifas no por a nenga cu Hesus a haci obranan poderoso, e no a eherce fe den dje, sino a trata di mantene su prestigio y autoridad. Hamas lo e por a acepta e resureccion di Lazaro! Como saduceo, Caifas no a kere den e resureccion.—Echonan 23:8.

E maldad di Caifas a sali na cla ora el a bisa e otro lidernan: “Boso no sa nada, ni boso no ta realisa cu ta cumbini boso pa un hende muri pa e pueblo, y no cu henter e nacion perece.” E relato ta sigui: “Ma esaki e no a bisa di su mes, ma siendo sumo sacerdote e aña ei, el a profetisa cu Hesus tawata bai muri pa e nacion, y no pa e nacion so, ma tambe pa e por reuni e yiunan di Dios cu ta plama tur parti, haci nan un. Pesei for di e dia ei nan tawata plania hunto pa mata [Hesus].”—Huan 11:49-53.

Caifas no tawata conciente di kico su palabranan a nifica realmente. Pa motibo di su funcion como sumo sacerdote, el a profetisa. * Hesus su morto lo tawata beneficioso—pero no pa e Hudiunan so. Su sacrificio di rescate lo a percura e medio pa libra henter humanidad for di sclabitud na pica y morto.

Un Complot Asesino

E sacerdotenan principal y e ancianonan Hudiu a reuni na cas di Caifas pa papia riba con nan por gara Hesus y mat’e. Probablemente e sumo sacerdote a yuda determina cuanto plata Hudas Iscariot mester a haya pa traiciona Hesus. (Mateo 26:3, 4, 14, 15) Ma pa Caifas a logra su meta maligno no tawata suficiente pa laga mata un hende so. “E sacerdotenan principal a consulta cu otro pa mata Lazaro tambe, pasobra pa su motibo hopi di e Hudiunan tawata . . . kere den Hesus.”—Huan 12:10, 11.

Malco, esclabo di Caifas, tawata den e multitud cu a ser manda pa aresta Hesus. Nan a manda e preso prome pa Anas pa esaki por a interog’e, y despues nan a mand’e pa Caifas, kende ya caba a reuni e ancianonan Hudiu pa tene un huicio anochi, locual tawata contra e lei Hudiu.—Mateo 26:57; Huan 18:10, 13, 19-24.

Pa Caifas no tawata problema cu e testimonionan falso cu e hendenan a lanta contra Hesus no tawata cuadra cu otro. E sumo sacerdote tawata sa kico e otro conspiradonan a pensa di tur hende cu a proclama nan mes Mesias. Pues el a exigi pa sa si Hesus a pretende di tin e titulo ei. Hesus a responde cu esnan cu a acus’e lo bai mir’e “sinta na man drechi di e Todopoderoso, y biniendo riba e nubianan di shelo.” E sumo sacerdote, dunando impresion cu e tawata masha deboto, “a scheur su pañanan, bisando: ‘El a blasfema! Pakico nos tin mester di mas testigo?’” E consilio a bai di acuerdo cu Hesus a merece morto.—Mateo 26:64-66.

Pa por a ehecuta un persona, mester a haya aprobacion di e Romanonan. Como mediador entre nan y e Hudiunan, probablemente Caifas tawata esun cu a presenta e caso na Pilato. Ora Pilato a busca manera di libra Hesus, no ta nada straño cu Caifas tawata entre e sacerdotenan principal cu a grita: “Clab’e na staca! Clab’e na staca!” (Huan 19:4-6, NW) Probablemente Caifas a urgi e multitudnan pa grita pa e liberacion di un asesino en bes di Hesus y e tawata entre e sacerdotenan principal cu a declara hipocritamente: “Nos no tin otro rei, sino solamente Cesar.”—Huan 19:15; Marco 15:7-11.

Caifas a rechasa e evidencia cu Hesus a ser resusita. El a opone Pedro y Huan y despues Esteban. Tambe Caifas a autorisa Saulo pa aresta tur  cristian cu e por a haya na Damasco. (Mateo 28:11-13; Echonan 4:1-17; 6:8–7:60; 9:1, 2) Sinembargo, rond di aña 36 di nos era, Vitelio, gobernado Romano di Siria, a core cu Caifas.

E scrituranan di e Hudiunan ta duna un idea negativo di e famia di Caifas. Por ehempel, e Talmud Babilonio ta lamenta: “Ai di mi pa motibo di e cas di Hanin [Anas], ai di mi pa motibo di nan redashi”, of “calumnia.” Supuestamente, e lamento aki ta referi na “reunionnan secreto pa inventa medidanan opresivo.”

Un Les Cu Nos Por Siña for di e Bida di Caifas

Un erudito a describi e sumo sacerdotenan di prome aya como hombernan “tof, skerpi y competente—y muy probablemente arogante.” Arogancia a stroba Caifas di acepta e Mesias. Pues no mester straña nos awe ora hende rechasa e mensahe di Bijbel. Algun no tin suficiente interes den e berdad di Bijbel pa laga cierto creencianan cu nan ta stima. Kisas otronan ta haya cu ser un predicado humilde di e bon nobo no ta cuadra cu nan dignidad. Y pa hende deshonrado of cudicioso, e normanan cristian ta mucho pisa.

Como sumo sacerdote, Caifas por a yuda su paisanonan Hudiu acepta e Mesias, pero sed pa poder a pon’e condena Hesus. Cu tur probabilidad Caifas a keda cu e actitud hostil ei te na su morto. E registro di su conducta ta mustra cu ora nos muri, no ta weso so ta keda atras. Cu nos accionnan nos ta establece un nomber permanente, sea bon of malo, den bista di Dios.

[Nota]

[Plachi na pagina 10]

Hose yiu di Caifas

[Plachi na pagina 10]

E osario resien descubri

[Reconocemento pa Potret na pagina 10]

Osario, inscripcion y graf den fondo: Pa cortesia di Israel Antiquities Authority