TABATA augustus 1936. Robert cu George Nisbet tabata na e cas real di Rey Sobhuza II di Suazilandia. Nan a caba di presenta varios grabacion musical y discurso di Ruman Rutherford for di un auto cu tabatin tocadisco y loudspeaker. Rey a keda hopi contento! George a conta: “Nos a haya nos den preta ora rey kier a cumpra e tocadisco, e disconan y e loudspeaker di e mensahe di Reino!”

Robert a pidie pa disculpa nan, pero e articulonan ey no tabata na benta. Dicon no? Pasobra nan tabata pertenece na un otro persona. Rey kier a sa ta ken.

Robert a contest’e: “Tur e cosnan aki ta di un otro Rey.” Ora Sobhuza a puntr’e ta ken e Rey ey tabata, Robert a bis’e: “Ta Hesucristo, e Rey di e Reino di Dios.”

“Aha, esey ta un gran Rey!” Sobhuza a reconoce cu un respet profundo. “Mi no kier coy nada cu ta pertenece na dje.”

Robert a skirbi: ‘Mi a keda hopi impresiona cu e personalidad di e Hefe Mayo, Rey Sobhuza. E tabata papia Ingles perfectamente, sin arogancia of orguyo, y e tabata hopi franco y acercabel. Mi a sinta cerca dje den su oficina pa un 45 minuut, mientras cu George a pone musica toca pafo.’

Robert a sigui conta: ‘Mas despues riba e dia ey, nos a bishita e Scol Nacional Swazi, caminda nos tabatin e experencia di mas interesante di tur. Nos a duna testimonio na e cabes di scol, y el a scucha nos atentamente. Nos a bis’e cu nos tin un tocadisco y a ofrece pa toca e disconan pa henter e scol scucha, y el a reacciona hopi entusiasma y a manda yama casi 100 alumno. El a laga nan sinta abou riba yerba pa scucha. Nos a compronde cu na e scol ey mucha homber tabata siña agricultura, hardineria, carpinteria, construccion, Ingles y rekenen, mientras cu mucha muher tabata siña vaknan di cuido di hende y di cas, y otro ofishinan util.’ E wela di e Hefe Mayo a funda e scol ey. *

For di aña 1933 caba, Rey Sobhuza tabata scucha cu placer e pioneronan cu tabata bishita su cas real. Na un ocasion el a hasta manda yama henter su cuerpo di bodyguard di  100 guerero pa nan scucha un grabacion di e mensahe di Reino. Ademas, el a abona riba nos revistanan y a acepta varios publicacion. No a dura mucho cu e tabatin un bibliotheek teocratico casi completo! Ademas, el a keda cu tur e publicacionnan den e bibliotheek a pesar di e prohibicion cu gobierno colonial Britanico a impone riba nos literatura durante Segundo Guera Mundial.

Rey Sobhuza II a sigui invita e Testigonan na su cas real na Lobamba, y e tabata hasta manda yama algun religioso pa bin scucha e discursonan biblico. Un biaha, segun cu un Testigo local cu yama Helvie Mashazi tabata splica Mateo capitulo 23, un grupo di religioso a bula lanta rabia y a trata di obliga e ruman pa cay sinta. Pero rey a interveni y a pidi Ruman Mashazi pa sigui papia. Ademas, rey a manda esnan presente haci nota di tur e versiculonan di Bijbel menciona den e discurso!

Na un otro ocasion, despues cu cuater pastoor a scucha un discurso cu un ruman homber pionero a duna, nan a declara: “Nos no ta pastoor mas; di awor padilanti nos ta Testigo di Jehova.” Anto nan a puntra e pionero si e tabatin mas di e bukinan manera esnan cu e Hefe Mayo tabatin.

For di añanan di 1930 te na su morto na 1982, e Hefe Mayo a demostra respet pa Testigonan di Jehova y no a permiti hende persigui nan pa motibo cu nan no tabata sigui e ritonan religioso di Suazilandia. Pues, e Testigonan tabatin hopi motibo pa ta agradecido na dje, y pesey nan a lamenta su morto sinceramente.

Na cuminsamento di aña 2013, tabatin mas cu 3.000 predicador di Reino na Suazilandia. E pais aki tin algo mas cu un miyon habitante, y su proporcion ta 1 publicador pa cada 384 habitante. E 90 congregacionnan tin mas cu 260 pionero, y 7.496 persona a asisti na Memorial na 2012. Ta bisto cu tin un tremendo potencial pa mas aumento. Sin duda, e prome bishitanan den añanan di 1930 a pone un bon fundeshi pa esey na Suazilandia.—For di nos archivo na Sur Africa.