1. Dicon Jehova merece nos gratitud?

JEHOVA merece nos gratitud, ya cu “tur don cu ta bon y tur regalo perfecto” ta bin di dje. (Sant. 1:17) Como nos Wardador amoroso, e ta percura pa tur nos necesidadnan fisico y spiritual. (Sal. 23:1-3) El a demostra cu e ta “nos refugio y fortaleza”, specialmente ora nos ta den angustia. (Sal. 46:1) Pesey, nos ta sinti mescos cu e escritor di salmo cu a bisa: “Alaba Jah! Gradici Jehova, pasobra e ta bon; su amor leal ta dura pa semper.”—Sal. 106:1, NW.

2, 3. (a) Dicon nos mester aprecia e bendicionnan cu nos tin? (b) Ki preguntanan nos lo trata den e articulo aki?

² Dicon nos mester ta agradecido na Jehova? Pasobra, manera Bijbel a profetisa, den e ultimo dianan hende a bira hopi malagradecido. (2 Tim. 3:2) Nan no ta aprecia nan bendicionnan. Nos ta biba den un mundo materialista unda propaganda ta anima miyones di hende pa cumpra mas di loke nan realmente tin mester. Como resultado, hopi hende  no ta contento cu loke nan tin y e actitud ey por afecta nos tambe. Mescos cu e Israelitanan di pasado, nos por bira malagradecido y perde aprecio pa nos bendicionnan y pa nos relacion precioso cu Jehova.—Sal. 106:7, 11-13.

³ Pensa tambe riba loke por sosode ora nos haya nos cu pruebanan dificil. Nos problemanan lo por bira asina grandi den nos bista cu nos ta cuminsa concentra riba nan en bes di riba nos bendicionnan. (Sal. 116:3) Pues, con nos por cultiva y mantene un curason agradecido? Y con nos por keda positivo a pesar di pruebanan hopi grandi? Laga nos wak.

4. Kico nos mester haci pa mantene un curason agradecido?

⁴ Pa nos cultiva y mantene un curason agradecido, nos mester pensa riba tur loke Jehova a haci pa nos. Despues nos mester medita cu aprecio riba su bondad amoroso, si, riba e manera cu el a demostra su gran amor pa nos. Ora un di e escritornan di salmo a haci esey, el a keda hopi impresiona pa e tantisimo cosnan maraviyoso cu Jehova a haci.—Lesa Salmo 40:5; 107:43.

5. Con e ehempel di apostel Pablo ta siña nos cultiva gratitud?

⁵ Nos por siña con pa cultiva gratitud for di e ehempel di apostel Pablo. Nos sa cu e tabata medita riba e bendicionnan cu el a haya, pasobra cada bes e tabata gradici Dios. Pablo tabata bon consciente cu un tempo e tabata “un blasfemado, un persiguido y un homber arogante y onbeschoft.” Pesey, e tabata masha agradecido cu a pesar di su pasado, Dios y Cristo a mustra misericordia na dje y a confi’e cu un sirbishi. (Lesa 1 Timoteo 1:12-14.) Tambe Pablo tabatin hopi aprecio pa su rumannan cristian, y hopi biaha el a gradici Jehova pa nan bon cualidadnan y nan sirbishi fiel. (Flp. 1:3-5, 7; 1 Tes. 1:2, 3) Anto ora Pablo tabata pasa den situacion dificil, e tabata cla pa gradici Jehova pa e yudansa oportuno cu el a haya di su rumannan spiritual. (Echo. 28:15; 2 Cor. 7:5-7) Pesey no ta nada straño cu den un di su cartanan el a anima e cristiannan: “Mustra cu boso ta agradecido.”—Col. 3:15-17.

6. Cua ta e bendicionnan di Jehova cu bo ta mas agradecido p’e?

⁶ Con nos por imita e bon ehempel di Pablo di cultiva y expresa gratitud? Wel, mescos cu Pablo, nos tin cu medita riba loke Jehova a haci pa nos personalmente. (Sal. 116:12) Kico lo bo contesta un hende cu puntra bo: Cua ta algun bendicion di Jehova cu bo ta agradecido p’e? Lo bo menciona bo relacion precioso cu Jehova? Of e pordon di pica cu bo ta haya debi na e sacrificio di rescate di Cristo? Lo bo inclui nomber di e rumannan cu a yuda bo durante varios prueba dificil? Anto naturalmente lo bo menciona bo casa stima y bo yiunan. Pues, nos tin hopi cos pa gradici Jehova. Pesey, tuma bo tempo pa medita riba e bunita bendicionnan ey di bo Tata stima, Jehova. Esaki lo yena bo curason cu gratitud y motiva bo pa gradicie tur dia.—Lesa Salmo 92:1, 2.

7. (a) Dicon nos mester gradici Jehova ora nos ta haci oracion? (b) Menciona algun beneficio cu nos ta haya ora nos ta expresa gratitud na Jehova den oracion.

⁷ Ora nos a medita riba tur nos bendicionnan, y nan ta graba den nos mente y curason, nos por gradici Jehova pa  nan den oracion. (Sal. 95:2; 100:4, 5) Hopi hende ta haci oracion solamente pa pidi cos. Pero nos sa cu Jehova ta keda contento ora nos ta gradicie tambe pa e cosnan cu nos tin. Den Bijbel nos ta haya ehempelnan di oracion hopi conmovedor, manera di Ana y Ezekias, cu ta demostra e gratitud profundo di algun sirbidor di Dios. (1 Sam. 2:1-10; Isa. 38:9-20) Pues, imita nan actitud di ta agradecido, y yama Jehova danki pa e bendicionnan cu bo tin. (1 Tes. 5:17, 18) Esaki lo beneficia bo hopi. Lo bo sinti bo mas anima, bo amor pa Jehova lo crece y bo amistad cu ne lo bira mas mihor.—Sant. 4:8.

8. Kico lo por pone nos perde aprecio pa tur loke Jehova a haci pa nos?

⁸ Si nos no tene cuidou, facilmente nos por perde nos aprecio pa e bondad di Jehova. Dicon? Pasobra nos ta imperfecto y a hereda e actitud malagradecido di nos prome mayornan, Adam cu Eva. Pensa riba esaki: Jehova a duna nan un paradijs pa biba aden y a percura pa nan tin tur loke nan mester. Tambe, nan por a biba pa semper den un ambiente di paz. (Gen. 1:28) Pero nan no a aprecia nan bendicionnan. Nan tabata golos y tabata kier mas. Cu ki resultado? Nan a perde tur cos. (Gen. 3:6, 7, 17-19) Nos ta biba den un mundo malagradecido, y nos tambe por cuminsa lubida tur loke Jehova a haci pa nos. Nos por cuminsa mira nos amistad cu ne como algo cu no ta dje importante ey. Nos por perde aprecio pa e privilegio cu nos tin di forma parti di un hermandad mundial. Of e cosnan di e mundo aki cu pronto ta pasa bay por absorba tur nos atencion. (1 Juan 2:15-17) Pa evita e trampa mortal ey, nos tin cu medita riba nos bendicionnan y gradici Jehova regularmente pa e privilegio cu nos tin di ta parti di su pueblo.—Lesa Salmo 27:4.

9. Ora nos ta pasa den pruebanan, dicon ta bon pa nos reflexiona riba nos bendicionnan?

⁹ Un curason agradecido por yuda nos wanta pruebanan. Kisas nos por haya nos diripiente cu situacionnan cu ta desanima nos completamente y cu por trece un cambio grandi den nos bida, manera e infieldad di un casa, un maleza grave, morto di un ser keri of un desaster natural devastador. Na momentonan asina,  nos lo haya consuelo y e fortaleza pa wanta si nos medita riba nos bendicionnan. Ban wak algun experencia di bida real.

10. Con e echo cu Irina tabata medita tur dia riba su bendicionnan a benefici’e?

¹⁰ Irina ta un pionero regular na Merca. * Su casa, cu tabata anciano, a corta su horea y a bay laga e cu su yiunan. Kico a yuda Irina sigui sirbi Jehova fielmente? El a bisa: “Mi ta gradici Jehova pa e manera cu el a cuida mi. Mi a dicidi di conta tur dia cuanto bendicion mi tin, y esey a yuda mi mira con privilegia mi ta di por tin un Tata celestial cu conoce mi, cu ta stima mi y proteha mi. Mi sa cu hamas lo e bandona mi.” Aunke Irina a haya hopi golpi di bida, su actitud alegre ta sigui sosten’e y e mes ta un gran animacion pa otro hende.

11. Kico a yuda Kyung-sook lucha contra un maleza grave?

¹¹ Kyung-sook, un ruman muher cu ta biba na Asia, a traha pionero pa mas cu 20 aña hunto cu su esposo. Di un dia pa otro, el a tende di dokter cu e tabatin cancer di pulmon avansa, y nan a bis’e cu e tin tres pa seis luna di bida. Aunke e cu su casa a yega di pasa den tur tipo di prueba, semper nan tabata bon di salud. Kyung-sook a bisa: “E maleza aki a dal mi duro! Mi a sinti cu mi a perde tur cos, y mi tabata morto spanta.” Kico a yud’e trata cu e situacion? El a conta: “Tur anochi, prome cu mi bay drumi, mi ta bay sinta den e balcon riba dak y haci oracion. Mi ta menciona na bos halto cinco cos cu a pasa e dia ey y cu mi ta agradecido p’e. Esey ta trankilisa mi y ta motiva mi pa expresa mi amor pa Jehova.” Con Kyung-sook a beneficia di e oracionnan ey cu e ta haci tur anochi? El a bisa: “Mi a bin realisa cu Jehova ta sostene nos durante momentonan dificil y cu den bida nos tin hopi mas tanto bendicion cu nos tin problema.”

12. Con Jason a haya consuelo despues di morto di su casa?

¹² Jason ta sirbi na un sucursal na Africa, y e tin mas cu 30 aña den sirbishi di tempo completo. El a conta: “Shete aña pasa, mi casa a muri, y e dolor cu mi ta sinti te ainda tin biaha ta insoportabel. Ora mi sinta pensa con el a sufri den su lucha contra cancer, mi ta sinti mi kibra.” Kico a yuda Jason trata cu e perdida ey? El a bisa: “Un dia, mi tabata corda riba un ocasion cu ami cu mi casa a pasa dushi hunto, y mi a gradici Jehova den oracion pa e bunita recuerdo ey. Di biaha mi a sinti un alivio. Despues di esey, mi a cuminsa gradici Jehova regularmente pa e dushi recuerdonan ey. Esey a yuda mi cambia mi actitud. Aunke ainda ta duel mi cu mi a perde mi casa, toch mi ta gradici Jehova cu mi tabatin un matrimonio feliz y cu mi por a comparti mi bida cu un persona cu tabata stima Jehova hopi.”

13. Kico a yuda Sheryl trata cu e perdida di gran parti di su famia?

¹³ Na final di aña 2013, e tifon devastador Haiyan a asota e parti central di Filipinas. Sheryl, un ruman muher di 13 aña, a perde casi tur cos. El a bisa: “Mi a perde mi cas, y mi a perde gran parti di mi famia.” Su tata, su mama y tres di su rumannan a muri den e olanan grandi di e tormenta. Kico a yuda Sheryl wanta e tragedia ey sin bira amarga? E tin un actitud agradecido y ta medita riba tur e bendicionnan cu e tin ainda. El a conta: “Mi a mira tur loke e rumannan a haci pa yuda nos y anima nos. Mi tabata sa cu rumannan rond mundo tabata haci oracion pa mi.” Anto el a agrega: “Mi ta hopi  agradecido cu Jehova ta mi Dios. Semper e ta duna nos loke nos tin mester.” Pues, ora nos ta consciente di nos bendicionnan, tristeza no ta haya chens di caba cu nos. Un curason yen di aprecio lo yuda nos sigui padilanti a pesar di cualkier situacion dificil cu nos ta enfrenta.—Efe. 5:20; lesa Filipensenan 4:6, 7.

14. Ki speransa emocionante nos tin? (Wak e prome plachi.)

¹⁴ A traves di historia, e bendicionnan di Jehova a haci su pueblo hopi contento. Por ehempel, despues cu Jehova a libra e Israelitanan for di Farao y su ehercito na Lama Cora, nan a expresa nan alegria cu canticanan di alabanza y gradicimento. (Exo. 15:1-21) Awe, un di e bendicionnan cu mas nos ta balora ta e speransa sigur cu nos tin di cu pronto nos lo ser libra di tur loke ta causa dolor y angustia. (Sal. 37:9-11; Isa. 25:8; 33:24) Purba di imagina con nos lo sinti ora cu Jehova caba cu tur su enemigonan y ricibi nos den un mundo nobo di paz y husticia. E ora ey si nos lo tin hopi motibo pa gradici Jehova.—Rev. 20:1-3; 21:3, 4.

15. Kico abo ta determina pa haci durante aña 2015?

¹⁵ Nos ta spera ansiosamente di ricibi hopi bendicion spiritual cerca Jehova durante e aña 2015. Naturalmente, nos lo por haya nos cu algun prueba tambe. Pero nos sa cu, pase loke pase, Jehova nunca lo bandona nos. (Deu. 31:8; Sal. 9:9, 10) E lo sigui percura tur loke nos tin mester pa nos por sirbie fielmente. Pesey, laga nos ta determina pa imita e actitud di profeta Habacuk, kende a bisa: “Maske e palo di figo no floria, y e matanan di wendruif no carga fruta, maske e cosecha di e palo di oleifi faya, y e cunucunan no produci cuminda, maske e tou wordo corta kita for di e cura, y no tin baca den e stalnan, toch lo mi alegra den SEÑOR, lo mi regociha den e Dios di mi salbacion.” (Hab. 3:17, 18) Si, durante henter e aña aki, laga nos medita riba tur nos bendicionnan y ser motiva pa sigui e conseho di nos texto di aña 2015: “Gradici Jehova, pasobra e ta bon.”—Sal. 106:1, NW.