TOPICO PRINCIPAL : DICON TIN ASINA TANTO SUFRIMENTO? KI DIA LO BIN UN FIN NA DJE?
Nan Tur Tabata Victima Inocente!
Noelle tabata un mucha muher masha cariñoso, y e tabata gusta pinta. Riba un anochi den zomer el a bay parti patras den cura, y di un manera of otro el a trompica y cay den e piscina di nan cas. Noelle a hoga net dos siman prome cu el a cumpli cuater aña.
Charlotte, Daniel, Olivia y Josephine ... Esakinan ta nomber di algun di e 20 muchanan di seis of shete aña di edad cu tabata entre e 26 victimanan di un tiroteo cu a tuma luga dia 14 di december 2012 na un scol na Connecticut, Merca. Durante e acto di entiero, Presidente Obama a menciona nomber di e hobencitonan aki y a bisa e publico desconsola: “Mester bin un fin na e tragedianan aki.”
Bano, un mucha muher di 18 aña di edad, a bandona Irak na 1996 hunto cu su famia pa bay biba na Noruega. Su amigonan tabata yam’e na su nomber di cariño: Rayo di Solo. Pero lamentablemente, dia 22 di juli 2011, Bano tabata entre e 77 victimanan cu a perde nan bida na man di un extremista, cu despues a broma bisa: ‘Ta duel mi cu mi no por a mata mas tanto hende.’
Di tur parti di mundo bo por tende bes tras bes di e noticianan tristo aki. Djis pensa un rato riba e dolor y sufrimento cu accidente, crimen, guera, terorismo, desaster natural y otro tragedianan ta causa. Anto mayoria di e victimanan ta hende inocente cu ta perde nan bida inhustamente!
Algun hende ta culpa Dios y ta pensa cu nos Creador no ta interesa den e rasa humano. Otronan ta kere cu Dios ta mira nos sufrimento pero ta prefera di no haci nada. Tin ta bisa cu tur loke ta pasa ta destino di hende y cu esey ta inevitabel. Ta parce cu tin mil y un punto di bista riba e topico aki. Unda nos por haya contestanan confiabel y satisfactorio? Den e siguiente articulonan, nos lo analisa e Palabra di Dios, Bijbel, pa trata di haya sa kico ta causa sufrimento y con lo e yega na su fin.
