Kisas bo ta puntra bo mes: ‘Si Dios sa tur cos, incluso mi pensamentonan y necesidadnan, dicon mi mester haci oracion na dje?’ Esey ta un bon pregunta. Hesus mes a bisa cu Dios “sa kico boso tin mester hasta prome cu boso pidie.” (Mateo 6:8) Rey David di Israel di antiguedad tabata sa esaki. Pesey el a skirbi: “Prome cu tin un palabra riba mi lenga, ya bo conoce esaki caba, o SEÑOR.” (Salmo 139:4) Ta pakico anto nos mester haci oracion na Dios? Pa contesta e pregunta ey, laga nos wak kico Bijbel ta bisa tocante oracion. *

Maske Bijbel ta bisa cu Jehova * sa tur cos, e ta mustra tambe cu Jehova no ta interesa solamente den acumula informacion general tocante su sirbidornan. (Salmo 139:6; Romanonan 11:33) Su memoria cu tin un capacidad sin limite no ta manera un computer cu ta djis warda datonan personal. Al contrario, Dios ta sumamente interesa den nos pensamentonan di mas profundo pasobra e kier pa nos hala cerca dje. (Salmo 139:23, 24; Santiago 4:8) Pa e motibo ey, Hesus ta anima nos pa haci oracion, aunke su Tata sa bon kico nos tin mester. (Mateo 6:6-8) Mas nos papia tocante nos sintimento- y pensamentonan cu nos Creador, mas nos ta hala cerca dje.

Tin biaha, nos no sa exactamente con pa expresa nos sintimentonan den oracion. Den e casonan ey, Dios sa loke nos ta sinti y por uza su conocemento perfecto di nos circunstancia pa duna nos loke nos tin mester. (Romanonan 8:26, 27; Efesionan 3:20) Ora nos ripara con Dios a yuda nos, hasta si esey tin biaha no ta dje bisto ey na prome instante, nos ta sinti cu nos relacion cu ne ta bira mas mihor.

Bijbel ta sigura nos cu e Dios Todopoderoso ta contesta oracion di su fiel sirbidornan, pero e ta bisa tambe dicon Dios no ta scucha cierto oracion. Por ehempel, tempo cu tabatin hopi violencia den Israel di antiguedad, Dios a manda profeta Isaias bisa e hendenan: “Maske boso haci hopi oracion, lo mi no scucha. Boso mannan ta yen di sanger.” (Isaias 1:15) Pues, esnan cu deliberadamente ta kibra Dios su ley of ta haci oracion cu un motibo robes no por spera cu Dios ta scucha nan oracionnan.—Proverbionan 28:9; Santiago 4:3.

En cambio, Bijbel ta bisa: “Kico cu nos pidie cu ta di acuerdo cu su boluntad, e ta tende nos.” (1 Juan 5:14) Pero esey kiermen cu Dios automaticamente ta duna nos tur loke nos pidie? No necesariamente. Por ehempel, wak kico a pasa den caso di apostel Pablo kende a roga Dios tres biaha pa kita “un sumpiña den carni” cu tabata pon’e sufri. (2 Corintionan 12:7, 8) Kisas e tabatin un problema cronico cu wowo. E cos ey mester tabata hopi fastioso p’e. Aunke Pablo a haya poder pa haci milager y hasta a resucita un hende, toch e mester a soporta su propio maleza. (Echonan 19:11, 12; 20:9, 10) Pues, Pablo no a haya e contesta cu el a desea, pero toch el a keda contento cu Dios a dun’e forsa pa soporta e situacion.—2 Corintionan 12:9, 10.

Ta berdad cu Dios a contesta oracion di algun personahe biblico door di haci un milager pa nan. (2 Reynan 20:1-7) Pero esey tabata sosode masha poco. Tin algun sirbidor di Dios a bira preocupa ora a parce cu Dios no a contesta nan oracionnan. Rey David a puntra: “Cuanto tempo mas, o SEÑOR? Lo bo lubida mi pa semper?” (Salmo 13:1) Pero ora e homber fiel ey a corda cuanto biaha Jehova a yud’e, el a bolbe expresa confianza den Dios. Den e mesun oracion, David a sigui bisa: “Ma mi a confia den bo misericordia.” (Salmo 13:5) Mescos cu David, Dios su sirbidornan di awendia kisas mester persevera den oracion pa nan por mira con Dios ta contesta nan oracionnan.—Romanonan 12:12.

Dios ta duna nos loke nos realmente tin mester.

Cu bon motibo, no ta semper mayornan amoroso ta duna nan yiunan loke nan ta pidi na e momento cu nan pidie. Dios tampoco no ta contesta nos oracionnan tur ora na e manera ni na e momento cu nos ta spera. Pero nos por tin confianza cu nos Creador, mescos cu un tata amoroso, lo duna nos loke realmente nos tin mester na e mihor manera y na e debido tempo.—Lucas 11:11-13.

Dios por contesta nos na un manera cu no ta dje bisto ey na prome instante.

Supone cu nos ta haci oracion pa haya alivio pa un problema persistente? Si Jehova no ta contesta nos oracion di biaha, esey ta nifica cu e no a contesta nos? Claro cu no. Lo ta bon pa nos wak si Dios a contesta nos na un manera cu kisas no ta dje bisto ey. Podise un bon amigo a haci tur loke e tabata por pa yuda nos net na ora. (Proverbionan 17:17) Ta posibel cu Jehova a conmove e amigo ey pa yuda nos? Ademas, Dios por contesta nos suplicanan pa yudansa mediante su Palabra. Talbes su Palabra por duna nos sabiduria pa trata cu un situacion dificil.—2 Timoteo 3:16, 17.

En bes di soluciona tur e problemanan di su sirbidornan, Dios hopi bes ta duna nan e forsa pa trata cu esakinan. (2 Corintionan 4:7) Por ehempel, na cierto ocasion Hesus a roga su Tata pa kita su sufrimento como cu e tabatin miedo cu esaki lo a trece reproche riba Dios su nomber. Jehova a contesta su oracion door di manda un angel pa fortalece su Yiu. (Lucas 22:42, 43) Asina tambe, Dios por uza un bon amigo pa duna nos un palabra di animacion net ora nos tin mester di esey. (Proverbionan 12:25) Como cu Dios sa contesta nos oracionnan di un manera cu no ta dje bisto ey na prome instante, nos mester ta mas alerta pa mira con e ta contesta nos.

Dios ta contesta algun oracion na e debido tempo.

Bijbel ta bisa cu e Dios Todopoderoso lo yuda hende humilde “na e debido tempo.” (1 Pedro 5:6) Pues, si ta parce cu Jehova ta tarda pa contesta nos oracionnan, esey no ta nifica cu e no ta interesa den nos. Mas bien, como cu nos Creador amoroso sa kico ta mihor pa nos, e ta tene cuenta cu esey ora e ta contesta nos.

Por ehempel: Imagina cu bo tin un yiu homber chikito cu ta pidi bo un bais. Lo bo dun’e e bais mesora? Si bo ta pensa cu e no ta suficiente responsabel pa core un bais, kisas lo bo dicidi di no cumpr’e ainda. Podise bo ta prefera di warda te ora bo mira cu lo e uz’e na un manera responsabel. Asina tambe, si Dios ta haya cu e “deseonan di [nos] curason” ta bon y nos persevera den oracion, e lo duna nos loke nos ta pidi na e debido tempo.—Salmo 37:4.

Bijbel ta anima cristiannan berdadero pa no perde confianza den e poder di oracion. Tin hende por bisa: ‘Ya, esey ta facil pa bisa pero dificil pa haci.’ Esey ta berdad, kisas lo ta dificil pa warda riba Dios su contesta si pa basta tempo caba nos ta pasando den un problema of ta sufriendo pa motibo di un inhusticia. Den e caso ey, lo ta bon pa nos corda loke Hesus a siña nos, esta pa haci oracion sin entrega.

 Hesus a duna un ehempel di un viuda den necesidad cu cada bes tabata bay cerca un hues inhusto pa e haya yudansa. (Lucas 18:1-3) Maske e hues a nenga di yud’e na prome instante, finalmente el a bisa den su mes: “Lo mi zorg pa e haya husticia, ya e no ta keda bin cansa mi te ora mi no por mas.” (Lucas 18:4, 5) Segun e texto den e idioma original, e hues a haci caso di e viuda pa e no “dal [e] bou di su wowo”, of figurativamente, “daña [su] reputacion.” * Si un hues inhusto mes ta yuda un viuda pober pasobra e no kier haya un mal reputacion, cuanto mas nos Dios amoroso lo percura pa husticia prevalece den caso di esnan “cu di dia y anochi ta sclama na dje.” Ta manera Hesus a bisa: “[Dios lo] zorg pa nan haya husticia rapidamente.”—Lucas 18:6-8.

Maske tin biaha nos por cansa di pidi yudansa, nos no mester entrega. Ora nos persevera den oracion, nos ta demostra cu realmente nos ta desea pa Dios guia nos den bida. Ademas, nos ta siña cu nos mester ta mas alerta pa mira con Dios ta contesta nos, y como resultado nos ta hala mas cerca di dje. Pues, nos por tin confianza cu Jehova lo contesta nos oracionnan cu ta na harmonia cu su boluntad si nos sigui resa na dje sin duda cu lo e scucha nos.—Lucas 11:9.