Mi a lanta den e stad Alicante cu ta keda na e costa oost di Spaña. Ora mi tabata hoben, constantemente tabatin problema den mi famia. Y pesey mi tabata pasa mayoria di mi tempo riba caya. Cerca di mi cas tabatin un luga di drecha tire. Eynan mi a bira amigo di un di e trahadornan cu yama José María. E tabata cariñoso y a duna mi e atencion cu mi famia no a duna mi nunca. Den temponan dificil e tabata manera un ruman pa mi, un berdadero amigo, aunke e tabata 20 aña mas grandi cu mi.

José María a cuminsa haya les di Bijbel for di testigonan di Jehova. Mi a ripara cu e tabata gusta studia Bijbel pasobra hopi biaha e tabata papia cu mi tocante loke e tabata siña. Mi tabata scuch’e cu respet, pero mi no tabata echt interesa. Mi tabata hoben y mi cabes no tabata den e cosnan ey. Pero pronto esey lo a cambia.

Eigenlijk, mi no ta gusta papia tocante e accidente ey. Pero loke mi por bisa ta cu mi tabata bobo y iresponsabel. Den un dia, mi bida a cambia por completo. Mi tabata un hoben yen di vigor, y diripiente mi tabata den hospital y mi no por a move bay niun caminda pasobra mi tabata paralisa. Tabata hopi dificil pa mi acepta e situacion cu mi tabata aden, y mi no tabata mira ningun motibo pa sigui biba.

José María a bin cerca mi na hospital, y mesora el a percura pa testigonan di Jehova di un congregacion eybanda bin bishita mi regularmente. Esey a touch mi curason. Asina cu mi a sali for di intensive care, mi a cuminsa studia Bijbel. Mi a haya sa pakico hende ta sufri y muri, y pakico Dios ta permiti cos malo sosode. Mi a siña tambe tocante Dios su promesa di un mundo den cua tur hende lo ta perfecto y ningun hende lo bisa “mi ta malo.” (Isaias 33:24) Pa prome biaha den mi bida, mi a haya un maraviyoso speransa.

Ora mi a sali for di hospital, mi a sigui studia Bijbel y mi a progresa hopi lihe. Mi tabatin un rolstoel special cu a permiti mi asisti na algun reunion di testigonan di Jehova y participa den e obra di predica. Riba 5 di november 1988 mi a batisa den un badkuip special. E tempo ey mi tabatin 20 aña di edad. Jehova Dios a yuda mi mira bida na un otro manera, y esey a duna mi un  actitud positivo. Pero kico mi por a haci pa mustra aprecio pa loke Dios a haci?

Mi tabata determina pa no laga e echo cu mi tabata paralisa stroba mi di haci tur loke mi tabata por den e sirbishi di Jehova. Mi kier a haci progreso. (1 Timoteo 4:15) Na principio, esey no tabata facil pasobra mi famia tabata contra di mi religion. Pero mi rumannan den fe tabata cla pa yuda mi, nan a zorg pa mi bay reunion regularmente y pa mi participa den e obra di predica.

Cu tempo tabata bisto cu mi lo bay tin mester di cuido 24 ora pa dia. Despues di hopi esfuerso, mi a logra haya un luga di cuido adecuado den e stad Valencia cu ta keda 160 kilometer panort di Alicante. Y mi a keda biba eynan.

Maske mi ta paralisa, mi ta determina pa sigui sirbi Jehova. Cu e bijstand y subsidio cu mi ta haya, mi a cumpra un computer y a laga nan instal’e band’i mi cama. Tambe mi a cumpra un celular. Tur mainta un di e nursenan ta cende mi computer y mi celular. Mi ta uza un joystick cu mi por move cu mi cachete pa traha riba mi computer. Ademas, mi tin un tipo di pen special cu mi ta tene cu mi boca pa asina mi por type riba un keyboard of primi e numbernan riba mi celular.

Con e aparatonan aki a yuda mi? Wel, mi por bay riba nos website jw.org y riba nos BIBLIOTHEEK ONLINE. Esakinan a yuda mi masha hopi mes. Hopi biaha mi ta studia y analisa publicacionnan basa riba Bijbel pa oranan largo pa mi por sigui siña mas tocante Dios y su bunita cualidadnan. Y cada biaha cu mi ta sinti mi mi so of un tiki desanima, mi ta bay riba e website y semper mi ta haya algo cu ta anima mi.

Ademas, via di mi computer mi por participa plenamente den e reunionnan. Mi por duna comentario, haci oracion y duna discurso. Y ora nos ta studia E Toren di Vigilancia, mi por lesa e paragrafnan pa e congregacion. Maske mi no por asisti personalmente na e reunionnan, toch mi ta sinti cu mi ta parti di e congregacion.

Mi telefon y mi computer ta yuda mi tambe pa participa den e obra di predica. Ta berdad cu mi no por predica di cas pa cas manera hopi otro testigo di Jehova ta haci. Pero esey no ta stroba mi, pasobra e aparatonan aki ta yuda mi comparti mi fe cu otro hende. Y mi ta disfruta asina hopi ora cu mi papia cu hende tocante mi fe na telefon cu e ancianonan di mi congregacion a duna mi e privilegio  pa organisa campañanan di predica via di telefon. E campañanan aki ta un gran ayudo pa cristiannan cu no por sali predica di cas pa cas pa motibo di nan edad of problema di salud.

Pero no ta e aparatonan aki so ta yuda mi. Tur dia mi bon amigonan ta bishita mi. Hopi biaha nan ta bin cu famia y conoci cu ta interesa den Bijbel pa mi papia cu nan. Y tin biaha famianan cu ta bin bishita mi ta laga mi participa den nan estudio di Bijbel como famia. Loke mas mi ta gusta ta ora e muchanan ta bisa mi dicon nan ta stima Jehova.

Mi ta keda masha contento cu tur e bishitanan cu mi ta haya. Tur ora mi camber ta yen di hende. Hasta hende cu ta biba leu ta bin bishita mi. Manera bo por imagina, tur e amor y atencion cu mi ta haya ta impresiona e nursenan masha hopi mes. Tur dia mi ta gradici Jehova cu mi por ta parti di un hermandad asina maraviyoso.

Ora un hende ta cuminda mi y ta puntra mi con ta bay, mi ta djis bisa nan: “Ata mi aki, luchando.” Claro cu ami no ta e unico luchando “e bon lucha di fe.” (1 Timoteo 6:12) Sea cual sea nos circunstancia, nos tur tin cu sigui lucha. Kico a yuda mi lucha a traves di tur e añanan aki? Tur dia mi ta haci oracion y gradici Jehova cu el a duna mi proposito den bida. Mi ta purba di haci mas tanto posibel den Jehova su sirbishi y enfoca riba e speransa cu mi tin pa futuro.

Hopi biaha mi ta pensa riba con bida lo ta den e mundo nobo ora cu mi por core atrobe. Tin biaha ora cu ami y mi bon amigo José María, kende tin polio, ta hunto, mi ta bis’e den joke cu nos lo bay core un marathon den Paradijs. Mi ta puntr’e: “Ken bo ta kere lo gana?” E ta contesta mi: “No ta importa ken lo gana. Loke ta importante ta pa nos ta eynan, den Paradijs, pa core hunto.”

No tabata facil pa mi siña biba cu mi limitacionnan. Mi sa cu ora mi tabata hoben mi a haci co’i bobo, y pesey mi mester a sufri e consecuencia. Pero mi ta sumamente agradecido cu Jehova no a bandona mi. El a bendiciona mi cu un hermandad rond mundo, el a duna mi proposito den bida, e goso di yuda otro hende y un maraviyoso speransa pa futuro. Si mi mester bisa den poco palabra con mi ta sinti, lo mi bisa cu Jehova a duna mi mas di loke mi ta merece.