1, 2. Dikon un kompas ta un instrumènt asina importante, i den ki sentido nos por kompar’é ku konsenshi?

BO SA kiko un marinero ku ta nabegá riba laman ganchu tin en komun ku un persona ku ta krusa un desierto desolá i ku un piloto ku ta bula haltu riba e nubianan den shelu? Nan tur tres lo ta kompletamente pèrdí sin un kompas, foral si no tin ningun otro aparato moderno disponibel pa yuda nan orientá.

² Un kompas ta un instrumènt simpel; básikamente, e tin un angua magnétiko ku semper ta mustra den direkshon nort. Ora e kompas ta funshoná bon, foral si us’é huntu ku un mapa eksakto, e por skapa nos bida. Den algun sentido por kompará kompas ku un regalo maravioso ku Yehova a duna nos: nos konsenshi. (Santiago 1:17) Sin konsenshi, nos lo ta kompletamente pèrdí. Ora nos us’é bon, e por yuda nos haña nos rumbo den bida i keda riba e kaminda  korekto. Pues, laga nos wak kiko e konsenshi ta i kon e ta funshoná. Despues nos lo analisá e siguiente puntonan: (1) Kon nos por eduká nos konsenshi, (2) pakiko nos tin ku tene kuenta ku konsenshi di otro hende i (3) e benefisionan di mantené un konsenshi limpi.

3. Kiko ta e nifikashon literal di e palabra griego pa “konsenshi,” i e ta deskribí ki kapasidat úniko ku hende tin?

³ Den Beibel, e palabra griego pa “konsenshi” literalmente ta nifiká “konosementu en komun òf konosementu ku nos tin ku nos mes.” Es desir, nos tin e kapasidat di konosé nos mes. Dios no a duna ningun otro kriatura riba tera e kapasidat akí. Den un sentido, nos por hala atras, wak nos mes i hasi un evaluashon moral di nos akshonnan. Nos konsenshi ta aktua manera un hues interno i por analisá nos akshon-, aktitut- i desishonnan. E por guia nos pa tuma un bon desishon, òf e por spièrta nos pa un mal desishon. Despues, si nos a tuma un bon desishon, e ta laga nos sinti nos bon; si nos a tuma un mal desishon, e ta kastigá nos ku remordimentu.

4, 5. (a) Kon nos por sa ku tantu Adam komo Eva tabatin konsenshi, i kiko tabata e konsekuensia ora nan a desobedesé e lei di Dios? (b) Menshoná algun ehèmpel di e Skritura Hebreo ku ta mustra ku e konsenshi di personanan fiel tabata traha.

⁴ Dios a krea hende for di prinsipio ku e fakultat akí. Tantu Adam komo Eva a demostrá ku nan tabatin konsenshi, pasobra nan a sinti bèrgwensa despues ku nan a peka. (Génesis 3:7, 8) Lamentablemente, e echo ku nan konsenshi a molestiá nan no por a yuda nan ku nada e ora ei. Dikon? Pasobra ta deliberadamente nan a desobedesé e lei di Dios. Komo hende perfekto, nan a disidí konsientemente pa rebeldiá kontra Yehova Dios i bira su enemigu. Pues, nan tabata sa bon bon kiko nan ta hasi i no por a bolbe bèk serka Dios.

⁵ Pero hopi hende imperfekto, distinto for di Adam ku  Eva, sí a hasi kaso di nan konsenshi. Por ehèmpel, e hòmber fiel Yòb por a bisa: “Mi ta tene mi hustisia duru i no ta lag’é bai. Mi kurason no ta reprochá ni un di mi dianan.” * (Yòb 27:6) Yòb tabata un hòmber ku a skucha su konsenshi ku masha atenshon i a lag’é guia su akshon- i desishonnan. P’esei e por a bisa ku gran satisfakshon ku su konsenshi no a reproch’é, esta, e no a molesti’é ku sintimentunan di bèrgwensa òf di kulpa. Nota e kontraste entre Yòb i David. Ora David a mustra un falta di rèspèt pa Yehova su rei ungí, Saul, ‘David su konsenshi [na hebreo, literalmente “su kurason”] a molesti’é despues.’ (1 Samuel 24:5) E remordimentu ei di konsenshi sigur a benefisiá David, pasobra el a siña ku djei padilanti e mester mustra mas rèspèt.

6. Kiko ta mustra ku tur hende tin e don di konsenshi?

⁶ No ta e sirbidónan di Yehova so a haña e don di konsenshi. Apòstel Pablo a bisa bou di inspirashon: “Ki ora ku hende di e nashonnan, ku no tin lei, ta hasi di naturalesa e kosnan di lei, e hendenan akí, aunke nan no tin lei, ta un lei pa nan mes. Ta nan ta esnan ku ta demostrá ku e esensia di lei ta skirbí den nan kurason, miéntras ku nan konsenshi tambe ta duna testimonio i, pa medio di nan mes pensamentunan, nan ta keda akusá òf asta diskulpá.” (Romanonan 2:14, 15) Tin biaha asta konsenshi di hende ku no sa nada di e leinan di Yehova ta motivá nan pa aktua di akuerdo ku e prinsipionan di Dios.

7. Kiko por pone ku tin biaha e konsenshi no ta funshoná bon?

⁷ Pero tin biaha e konsenshi no ta funshoná bon. Kon por ta? Wèl, laga nos bai bèk na e kompas. Si pon’é banda di un magnet, esei por pone su angua kuminsá mustra den otro  direkshon. Ademas, si no usa un kompas huntu ku un bon mapa, lo e no yuda mashá. Di igual manera, si e deseonan di nos kurason tin demasiado influensia riba nos konsenshi, nan por dirigí nos den e direkshon robes. Anto si nos no usa nos konsenshi huntu ku e guia konfiabel di e Palabra di Dios, kisas ora di tuma desishonnan importante, nos lo no por hasi un distinshon entre bon i malu. Bon mirá, pa nos konsenshi funshoná korektamente, nos tin mester di e guia di Yehova su spiritu santu. Pablo a skirbi: “Pa medio di spiritu santu mi konsenshi ta duna testimonio huntu ku mi.” (Romanonan 9:1) Pero kon nos por hasi sigur ku nos konsenshi ta funshoná na armonia ku e guia di Yehova su spiritu santu? Esei ta dor di eduk’é.

8. (a) Kon nos kurason por influensiá nos konsenshi, i kiko mester ta e kos di mas importante pa nos ora di tuma desishon? (b) Dikon no ta tur biaha ta basta pa un kristian tin un konsenshi trankil? (Wak e nota na pia di página.)

⁸ Kon bo ta tuma un desishon ku ta basá riba konsenshi? Algun hende aparentemente ta djis analisá kiko nan mes ta pensa i sinti, i disidí kiko nan lo hasi. Anto despues nan ta bisa: “Wèl, e no ta molestiá mi konsenshi.” Pero, e deseonan di nos kurason por ta masha fuerte, i por asta influensiá nos konsenshi. Beibel ta bisa: “E kurason ta mas engañoso ku tur kos i ta totalmente korupto; ken por komprond’é?” (Yeremías 17:9) P’esei, e kos di mas importante pa nos mester ta di agradá Yehova Dios i no bai tras di loke nos kurason ta deseá. *

9. Kiko ta temor di Dios, i kon e temor akí mester influensiá nos desishonnan?

 ⁹ Si un desishon ta realmente basá riba nos konsenshi bon eduká, lo e reflehá nos temor di Dios, no nos deseonan personal. Laga nos konsiderá un ehèmpel di esaki. E fiel gobernador Nehemías tabatin derecho di eksigí sierto pago i belasting for di e hendenan di Herúsalèm. Ma e no a hasi esei. Dikon nò? Pasobra esei lo por a oprimí e pueblo di Dios, i e no kier a kore e mínimo riesgo di desagradá Yehova pa motibu di esei. El a bisa: “Ami no a hasi asina, pa motibu di e temor di Dios.” (Nehemías 5:15) Berdadero temor di Dios, esta, e temor sinsero di desagradá nos Tata selestial, ta masha esensial. Tal temor respetuoso lo motivá nos pa buska e guia di e Palabra di Dios ora nos tin ku tuma desishon.

10, 11. Ki prinsipio bíbliko por yuda nos disidí si nos ta bebe alkohòl, i kon nos por haña e guia di Dios pa apliká nan?

¹⁰ Tuma por ehèmpel e asuntu di bibida alkohóliko. Un desishon ku hopi di nos tin ku tuma na reunionnan sosial ta: Lo mi bebe òf nò? Pa tuma un bon desishon, nos tin ku eduká nos konsenshi promé i analisá e prinsipionan bíbliko ku tin di haber ku e asuntu. Beibel no ta kondená uso moderá di alkohòl. De echo, Beibel ta alabá Yehova pasobra el a duna nos biña. (Salmo 104:14, 15) Ma loke sí e ta kondená ta bebementu di mas i paranda. (Lukas 21:34; Romanonan 13:13) Ademas, e ta menshoná buracheria entre piká serio, manera fornikashon i adulterio. *—1 Korintionan 6:9, 10.

¹¹ Un kristian ta eduká su konsenshi ora e ta apliká e prinsipionan ei den su bida. Di e manera ei su konsenshi ta prepará pa spièrt’é pa loke ta bon i loke ta malu. Pues, ora nos tin ku disidí si nos lo bebe na un reunion sosial, nos lo puntra nos mes: ‘Ki ambiente lo bai tin? Tin chèns ku e situashon ta sali for di man i bira un fiesta di bebementu?  Kiko di ami? Mi tin hopi gana di bebe? Mi ta dependé di alkohòl? Mi mester di alkohòl pa kambia e manera ku mi ta sinti mi i ku mi ta aktua? Mi por bisa ta basta?’ Ta bon pa nos pidi Yehova su guia den orashon ora nos ta meditá riba prinsipio bíbliko i riba kualke pregunta ku nan ta lanta. (Salmo 139:23, 24) Di e manera akí nos ta pidi Yehova guia nos ku su spiritu santu i a la bes nos ta eduká nos konsenshi pa e ta na armonia ku Dios su prinsipionan. Pero tin un faktor mas ku nos tin ku tene kuenta kuné ora di tuma desishon.

12, 13. Kua ta algun motibu pakiko e konsenshi di rumannan kristian ta diferente for di otro, i kon nos mester trata ku e diferensianan ei?

¹² Kisas bo ta keda straño ku tin biaha e konsenshi di e rumannan por ta asina diferente for di otro. Un ruman ta desaprobá un sierto práktika òf kustumber, pero un otro ruman ta gust’é i no ta mira pakiko mester konden’é. Tuma por ehèmpel e asuntu di bebe alkohòl na okashonnan sosial. Un ruman kisas ta disfrutá di dal un drinks ku algun amigu segun ku nan ta pasa un anochi ameno huntu, miéntras ku esei ta molestiá e konsenshi di un otro ruman. Kon bin tin e diferensianan ei, i ki efekto nan mester tin riba nos desishonnan?

¹³ Tin hopi motibu pakiko hende ta diferente for di otro. Hopi biaha, nan a lanta den sirkunstansianan kompletamente distinto for di otro. Por ehèmpel, tin ruman ta masha konsiente di sierto debilidat ku nan a lucha kontra dje den pasado, i kisas no semper ku éksito. (1 Reinan 8:38, 39) Ora ta trata di asuntu di alkohòl, personanan asina probablemente ta masha sensitivo. Imaginá bo un persona asina bishitá bo na kas i bo ta ofres’é un bibida. Kisas su konsenshi korektamente ta motiv’é pa nenga esei. Lo bo  sinti bo ofendí? Lo bo insistí p’e bebe? Klaru ku nò. Amor pa bo ruman lo motivá bo pa mustra konsiderashon i respetá su desishon, sea ku e splika bo e motibu òf e preferá di ten’é privá.

14, 15. Relashoná ku ki kuestion konsenshi di e rumannan di promé siglo tabata diferensiá for di otro, i ki solushon Pablo a rekomendá?

¹⁴ Apòstel Pablo tambe a ripará ku konsenshi di e rumannan kristian den promé siglo tabata diferensiá hopi for di otro. E tempu ei tabatin algun kristian ku tabatin problema pa kome sierto kuminda ku a ser sakrifiká na dios falsu i ku despues nan a bende na marshe. (1 Korintionan 10:25) Pero Pablo no a mira ningun problema den kome tal kuminda. P’e, e diosnan falsu ei no tabata bal nada; nan no por tabata doño di kuminda ku a bini di Yehova i ku di tur manera tabata pertenesé na dje. Ma Pablo a komprondé ku no ta tur hende tabatin e mesun punto di bista kuné. Tabatin ruman ku promé ku nan a bira kristian tabata masha enbolbí den idolatria. Pa nan, tur kos ku tabata konektá anteriormente ku idolatria tabata repugnante. Kiko tabata e solushon?

¹⁵ Pablo a bisa: “Nos ku ta fuerte den fe mester soportá e debilidatnan di esnan ku no ta fuerte, i no agradá nos mes. Pasobra ni Kristu no a agradá su mes.” (Romanonan 15:1, 3) Pues, Pablo a rasoná ku nos tambe, meskos ku Hesus, mester pone e bienestar di nos rumannan promé ku di nos mes. Den un konteksto similar, Pablo a bisa ku lo e preferá di no kome karni mes si esei ta pone un ruman trompeká, ya ku un ruman ta un karné presioso pa ken Kristu a duna su bida.—1 Korintionan 8:13; 10:23, 24, 31-33.

16. Dikon nos no mester husga rumannan ku ta hasi kosnan ku nos konsenshi no ta permití nos hasi?

¹⁶ Di otro banda, si otro rumannan ta hasi kosnan ku nos konsenshi no ta permití nos hasi, nos no mester kritiká nan i insistí pa tur hende mira asuntunan di konsenshi  manera nos ta mira nan. (Romanonan 14:10) En realidat, e mihó kos ta pa nos usa nos konsenshi pa husga nos mes, no pa husga otro hende. No lubidá loke Hesus a bisa: “Stòp di husga, pa boso no ser husgá.” (Mateo 7:1) Den kongregashon, e rumannan mester evitá di hasi asuntunan di konsenshi un punto di diskushon. Na lugá di esei, nos ta buska maneranan pa promové amor i union i pa edifiká otro, no pa kibra otro.—Romanonan 14:19.

17. Kiko a pasa ku konsenshi di hopi hende awe?

¹⁷ Apòstel Pedro a skirbi: “Mantené un konsenshi limpi.” (1 Pedro 3:16) Un konsenshi limpi den bista di Yehova Dios ta un gran bendishon. Mayoria di hende awe no  tin un konsenshi asina. Pablo a deskribí hende “kende nan konsenshi ta sin heful, komo si fuera kimá ku heru kayente.” (1 Timoteo 4:2) Karni kimá pa heru kayente ta haña sikatris i ta pèrdè heful. Asina tambe, hopi hende su konsenshi ta tur tapá ku sikatris i ta sin heful; bon mirá, nan konsenshi ta morto. E no ta spièrta nan ni e no ta protestá ni laga nan sinti remordimentu òf bèrgwensa ora nan hasi malu. Anto ta manera kos ku nan ta asta kontentu ku e no ta molestiá nan.

18, 19. (a) Ki benefisio sintimentu di kulpa i bèrgwensa por tin? (b) Kiko nos por hasi si nos konsenshi ta sigui tormentá nos maske nos a arepentí?

¹⁸ En realidat, sintimentu di kulpa ta e konsenshi su manera di laga nos sa ku nos a hasi algu malu. Ora e sintimentunan  ei ta motivá un pekadó pa arepentí, e por haña pordon, asta pa e piká di mas grave. Por ehèmpel, Rei David tabata kulpabel di piká grave, pero el a haña pordon prinsipalmente pasobra el a arepentí sinseramente. El a haña rabia riba e malu ku el a hasi i tabata determiná pa nunka mas desobedesé e leinan di Yehova. Pues, el a eksperensiá personalmente ku Yehova “ta bon, i kla pa pordoná.” (Salmo 51:1-19; 86:5) Pero kiko si despues ku nos a arepentí, nos keda ku sintimentunan intenso di kulpa i bèrgwensa?

¹⁹ Tin biaha e konsenshi por ta demasiado estrikto i ta keda tormentá un pekadó ku sintimentunan di kulpa ku ya no ta yuda ku nada. Si nos kurason no ta stòp di kondená nos, nos tin ku ‘konvens’é’ ku Yehova ta mas grandi ku tur sintimentu humano. Nos lo tin ku apliká e konseho ku kisas nos mes a yega di duna otro hende: ‘Kòrda ku Yehova ta stima bo, i aseptá ku el a pordoná bo.’ (1 Huan 3:19, 20) Di otro banda, un konsenshi limpi ta duna nos un pas mental, trankilidat i goso profundo ku masha poko biaha bo ta haña den e mundu akí. Hopi hende ku un tempu tabata enbolbí den piká serio a eksperensiá e alivio maravioso akí i awe nan por sirbi Yehova Dios ku un konsenshi limpi.—1 Korintionan 6:11.

20, 21. (a) E meta di e buki akí ta pa yuda bo hasi kiko? (b) Komo kristian, ki libertat nos tin i kon nos mester us’é?

²⁰ E meta di e buki akí ta pa yuda bo alkansá e goso ei i mantené un konsenshi limpi miéntras ku bo ta lucha kontra e mundu di Satanas den e último dianan akí. Klaru ku e buki no por splika detayadamente tur lei i prinsipio bíbliko ku bo tin ku tene kuenta kuné i apliká den bo bida diario. Ademas, no ferwagt ku lo bo haña reglanan simpel i klaramente definí tokante asuntunan di konsenshi. E propósito di e buki akí ta pa yuda bo studia i apliká e Palabra di Dios den bo bida diario. Esaki lo eduká i prepará  bo konsenshi di tal manera ku e por avisá bo kiko ta bon i kiko ta malu. Kontrali na e Lei di Moises, ku a pone énfasis riba sigui regla skirbí, “lei di Kristu” ta duna mas importansia na sigui e guia di konsenshi i di prinsipio bíbliko. (Galationan 6:2) Pues, Yehova ta duna kristiannan hopi libertat. Ma su Palabra ta animá nos pa nunka usa e libertat ei “komo kapa pa hasi malu,” sino, mas bien, us’é pa algu mas maravioso: pa demostrá nos amor pa Yehova.—1 Pedro 2:16.

²¹ Tempu ku bo a siña konosé Yehova, bo a kuminsá ku un proseso sumamente importante, esta, di usa bo ‘kapasidat di komprondé i asina entrená esaki pa distinguí loke ta bon for di loke ta malu.’ Pa sigui ku e proseso ei ta nesesario pa bo analisá huntu ku orashon kon ta e mihó manera pa biba segun prinsipio bíbliko, i despues, pone esakinan na práktika. (Hebreonan 5:14) Lo bo eksperensiá tur dia e benefisionan di bo konsenshi eduká pa Beibel. Meskos ku e kompas ku ta guia e biahero, asina bo konsenshi lo yuda bo tuma desishonnan ku ta agradá bo Tata selestial. Esaki sigur ta un bon manera pa keda den e amor di Dios.