1. Unda nos por siña tokante futuro?

BO A yega di wak notisia na televishon i puntra bo mes: ‘Ta kiko ta bai para di e mundu aki?’ Kosnan trágiko ta sosodé asina diripiente i ònferwagt ku ningun hende no por predisí kiko lo pasa mañan. (Santiago 4:14) Sin embargo, Yehova sí sa kiko lo sosodé den futuro. (Isaias 46:10) Hopi tempu pasá su Palabra, Beibel, a predisí no solamente e kosnan malu ku ta sosodé den nos tempu sino tambe e kosnan maravioso ku lo sosodé den futuro serkano.

2, 3. Ki pregunta e disipelnan a hasi Hesus, i kon el a kontestá nan?

² Hesukristu a papia tokante e Reino di Dios ku lo pone un fin na maldat i hasi e tera un paradeis. (Lukas 4:43) Hende tabata ke sa ki dia e Reino lo a bin. De echo, Hesus su disipelnan a puntr’é: “Kiko lo ta e señal di bo binida i di e fin di tempu?” (Mateo 24:3) Komo kontesta Hesus a bisa nan ku ta Yehova Dios so sa presis ki dia e fin di e sistema aki lo a bin. (Mateo 24:36) Pero loke sí Hesus a predisí ta kosnan ku lo a tuma lugá riba tera djis promé  ku e Reino lo a trese berdadero pas i siguridat pa humanidat. Loke el a predisí ta tumando lugá awor!

³ Promé ku nos analisá e evidensia ku nos ta bibando den “e fin di tempu,” òf fin di e sistema di kosnan aki, laga nos konsiderá brevemente un guera ku ningun hende no por a mira. El a tuma lugá den shelu, i su resultado ta afektá nos.

4, 5. (a) Kiko a tuma lugá den shelu djis despues ku Hesus a haña poder komo Rei? (b) Segun Revelashon 12:12, kiko lo tabata e resultado di e guera den shelu?

⁴ E kapítulo anterior di e buki aki a splika ku Hesukristu a bira Rei den shelu na aña 1914. (Daniel 7:13, 14) Poko despues di a risibí poder komo Rei, Hesus a tuma akshon. Beibel ta bisa: “Tabatin guera den shelu, Miguel [un otro nòmber pa Hesus] i su angelnan tabata hasi guera kontra e dragon [Satanas e Diabel]. I e dragon i su angelnan tabata hasi guera.” * Satanas i su angelnan malbado, e demoñonan, a pèrdè e guera ei i a keda saká for di shelu i tirá abou riba tera. Dios su fiel yunan spiritual a alegrá ku Satanas i su demoñonan no tabata den shelu mas. Di otro banda, hende riba tera lo no por a alegrá manera e angelnan den shelu pasobra Beibel a predisí: “Ai di tera . . . pasobra Diabel a baha bin serka boso ku gran furia, sabiendo ku ta ked’é solamente un poko tempu mas.”—Revelashon 12:7, 9, 12.

⁵ Tuma nota di kiko lo tabata e resultado di e guera den shelu. Satanas, den su furia lo a kousa ai, òf problema, pa hende riba tera. Manera lo bo bai mira, nos ta bibando awor den e tempu di ai ei. Pero esei lo ta  pa un periodo relativamente kòrtiku, solamente “un poko tempu.” Asta Satanas ta konsiente di esei. Beibel ta referí na e periodo aki komo “e último dianan.” (2 Timoteo 3:1) Nos por ta hopi kontentu ku pronto Dios lo eliminá Diabel su influensia for di riba tera! Laga nos konsiderá algun di e kosnan ku Beibel a predisí ku ta tumando lugá aworakí. E kosnan aki ta duna prueba ku nos ta bibando den e último dianan i ku e Reino di Dios pronto lo trese bendishonnan eterno pa esnan ku ta stima Yehova. Promé, laga nos analisá kuater aspekto di e señal ku Hesus a bisa lo a marka e tempu den kua nos ta biba.

6, 7. Kon e palabranan di Hesus tokante guera i hamber ta kumpliendo awe?

⁶ “Nashon lo lanta kontra nashon, i reino kontra reino.” (Mateo 24:7) Miónes di hende a ser matá den guera durante e último siglo. Un historiadó britániko a skirbi: “Siglo 20 tabata esun mas sangriento den historia skirbí. . . . E tabata un siglo di guera kasi kontinuo, ku apénas un par di periodo kòrtiku sin ku ningun kaminda tabatin konflikto armá organisá.” Un informe di Worldwatch Institute ta deklará: ‘Tres  biaha mas tantu hende a muri den guera durante siglo 20 ku den tur e gueranan for di e promé siglo AD [di nos era] te ku aña 1899.’ Mas ku 100 mion hende a muri komo resultado di guera desde 1914. Miónes di hende a sufri miseria i doló pasobra nan a pèrdè sernan kerí den guera. Podisé bo mes tambe a pèrdè un ser kerí dor di guera.

⁷ “Lo tin hamber.” (Mateo 24:7) Investigadónan ta bisa ku produkshon di kuminda a oumentá masha hopi durante e último 30 añanan. Apesar di esei, hamber ta sigui reina pasobra hopi hende no tin sufisiente plaka pa kumpra kuminda ni nan no tin tereno pa planta kuminda. Den paisnan den desaroyo, mas ku mil mion hende tin ku biba di un entrada di dos florin òf ménos pa dia. Mayoria di e hendenan aki ta sufri di hamber króniko. Organisashon Mundial di Salú ta kalkulá ku mal nutrishon ta e kousa prinsipal di morto di mas ku sinku mion mucha tur aña.

8, 9. Kiko ta mustra ku e profesianan di Hesus tokante temblor i pestilensia a kumpli?

⁸ “Lo tin temblornan grandi.” (Lukas 21:11) Segun e Departamentu Merikano di Investigashon Geológiko, nan ta ferwagt un averahe di 19 temblor grandi pa aña. Esakinan tin sufisiente potensia pa kousa daño  na edifisio i habri tera. I komo averahe, tur aña tabatin temblornan sufisiente fuerte pa kousa destrukshon total di edifisionan. Datonan ku tin disponibel ta mustra ku temblor a kosta bida di mas ku dos mion hende for di aña 1900 te ku awor. Un fuente a deklará: “Mehorashonnan den teknologia a baha e kantidat di morto djis un tiki asina.”

⁹ “Lo tin . . . pestilensia.” (Lukas 21:11) Apesar di avansenan médiko, malesanan bieu i nobo ta sigui afligí humanidat. Un informe ta bisa ku 20 enfermedat bon konosí—entre nan tuberkulósis, malaria i kólera—a bira mas komun den dékadanan resien, i algun tipo di enfermedat a bira mas i mas difísil pa kura ku remedi. De echo, por lo ménos 30 malesa nobo a presentá. Algun di nan no tin kura i nan ta fatal.

10. Ki karakterístikanan predisí na 2 Timoteo 3:1-5 bo ta mira den hende awe?

¹⁰ Fuera di identifiká sierto susesonan mundial, Beibel a predisí ku un kambio den sosiedat humano lo a karakterisá e último dianan. Apòstel Pablo a deskribí kon hende en general lo ta. Na 2 Timoteo 3:1-5, nos ta lesa: “Den e último dianan tempunan  trabahoso lo bin.” En parte, Pablo a bisa ku hende lo ta

• stimadó di nan mes

• stimadó di plaka

• desobedesidu na mayornan

• ingrato

• sin amor

• sin dominio propio

• grosero

• stimadó di plaser mas bien ku stimadó di Dios

• ku tin aparensia di ta religioso bèrdè, ma ku ta nenga su poder

11. Kon Salmo 92:7 ta deskribí loke lo pasa ku hende malbado?

¹¹ Hende den bo komunidat a bira asina? Indudablemente ku sí. Tur kaminda tin hende ku mal karakterístika. Esaki ta indiká ku pronto Dios lo aktua, pasobra Beibel ta bisa: “Ora e malbado sprùit manera yerba, i tur ku ta hasi inikidat [òf, “loke ta perhudisial,” NW] floresé, ta pa nan wòrdu destruí pa semper.”—Salmo 92:7.

12, 13. Kon ‘berdadero konosementu’ a oumentá den e “tempu di e fin” aki?

¹² E último dianan en bèrdat ta yen di ai, presis manera Beibel a predisí.  Sin embargo, den e mundu yen di problema aki tin desaroyonan positivo entre e adoradónan di Yehova.

¹³ “[“Berdadero,” NW] konosementu lo oumentá,” e buki bíbliko di Daniel a predisí. Na ki tempu esei lo a sosodé? Durante “e tempu di e fin.” (Daniel 12:4) Spesialmente desde 1914, Yehova a yuda e personanan ku realmente ta deseá di sirbié pa krese den komprondementu di Beibel. Nan a komprondé mas i mas bèrdat presioso tokante Dios su nòmber i su propósito, tokante e sakrifisio di reskate di Hesukristu, e kondishon di e mortonan i e resurekshon. Ademas, adoradónan di Yehova a siña kon pa hiba nan bida na un manera ku ta benefisiá nan i ta trese alabansa na Dios. Tambe nan a haña un komprondementu mas kla di e papel di e Reino di Dios i kon lo e rektifiká asuntunan riba tera. Kiko nan ta hasi ku e konosementu aki? E pregunta ei ta hiba nos na un otro profesia ku ta kumpliendo den e último dianan aki.

14. Kon ekstenso e predikashon di e bon notisia di e Reino ta awe, i ken ta predik’é?

¹⁴ “E evangelio aki di e reino lo wòrdu prediká den henter mundu,” Hesukristu a bisa den su profesia tokante “e fin di tempu.” (Mateo 24:3, 14) Rònt mundu, miónes di Testigu di Yehova ta prediká e evangelio òf bon notisia di e Reino: kiko e Reino ta, kiko lo e hasi i kon nos por risibí su bendishonnan. Yen di entusiasmo nan ta prediká e bon notisia di e Reino den mas ku 230 pais i na mas ku 400 idioma. Nan ta bin di “tur nashon i tur tribu i pueblo i lenga.” (Revelashon 7:9) E Testigunan ta duna edukashon bíbliko riba un base personal i grátis na miónes di hende ku ke sa kiko Beibel ta siña realmente. Esaki en bèrdat ta un kumplimentu impreshonante di profesia, foral dor ku Hesus a predisí ku “tur hende lo odia” kristiannan berdadero!—Lukas 21:17.

15. (a) Abo ta kere ku nos ta bibando den e último dianan, i dikon? (b) Kiko “e fin” lo nifiká pa personanan ku ta bai kontra di Yehova i pa esnan ku ta someté nan mes na e gobernashon di e Reino di Dios?

¹⁵ Siendo ku asina tantu profesia di Beibel ta kumpliendo awe, bo no ta di akuerdo ku nos ta bibando den e último dianan? Despues ku e bon notisia ser prediká te na e grado ku Yehova ta haña ta bon, “e fin” lo bin sigur. (Mateo 24:14) “E fin” ta nifiká e tempu ora ku Dios lo kaba ku maldat for di riba tera. Yehova lo usa Hesus i angelnan poderoso pa destruí tur persona ku deliberadamente ta oponé òf bai kontra Yehova. (2 Tesalonisensenan 1:6-9) Satanas i su demoñonan lo no gaña e nashonnan mas. Despues di esei, e Reino di Dios lo drama hopi bendishon riba tur ku ta someté nan mes na su gobernashon hustu.—Revelashon 20:1-3; 21:3-5.

16. Kiko lo ta sabí pa bo hasi?

¹⁶ Siendo ku fin di e sistema di Satanas ta serka, nos tin ku puntra nos mes: ‘Kiko lo mi mester ta hasiendo?’ Ta sabí pa sigui siña mas tokante Yehova i loke e ta rekerí di nos. (Juan 17:3) Studia Beibel diligentemente. Hasié bo kustumber pa asosiá regularmente ku otro hende ku ta trata na hasi Yehova su boluntat. (Hebreonan 10:24, 25) Buska pa gana e konosementu abundante ku Yehova Dios a pone disponibel pa hende rònt mundu, i hasi e kambionan nesesario den bo bida di manera ku bo por gosa di Dios su aprobashon.—Santiago 4:8.

17. Dikon destrukshon di e malbadonan lo kue mayoria hende di sorpresa?

¹⁷ Hesus a predisí ku mayoria hende lo a ignorá e evidensia ku nos ta bibando den e último dianan. Destrukshon di e malbadonan lo bin diripiente i ònferwagt. Lo e kue mayoria hende di sorpresa meskos ku ora un ladron bin den anochi. (1 Tesalonisensenan 5:⁠2) Hesus a spièrta: “E binida di e Yu di hende lo ta meskos ku e  dianan di Noe. Pasobra meskos ku den e dianan ei ku tabata promé ku e diluvio, nan tabata kome i bebe, nan tabata kasa i duna pa kasa, te dia ku Noe a bai den e arka, i nan no a komprondé [“no a hasi kaso,” NW] te ora ku e diluvio a bin i a bai ku nan tur, asina e binida di e Yu di hende lo ta.”—Mateo 24:37-39.

18. Ki spièrtamentu di Hesus nos tin ku tuma na pechu?

¹⁸ P’esei Hesus a bisa su oyentenan: “Tene kuidou pa boso kurason no ta kargá pa kousa di paranda i buracheria i e preokupashonnan di bida, i e dia ei no bin diripiente riba boso manera un trampa; pasobra e lo bin riba tur esnan ku ta biba riba superfisie di henter mundu. Ma sea alerta tur ora bai, hasiendo orashon pa boso por tin forsa pa skapa di tur e kosnan aki ku ta bai tuma lugá, i pa para [ku aprobashon] dilanti di e Yu di hende.” (Lukas 21:34-36) Ta sabí pa nos tuma e palabranan di Hesus na pechu. Dikon? Pasobra ta e personanan ku tin e aprobashon di Yehova Dios i di “e Yu di hende,” Hesukristu, tin e speransa di sobrebibí e fin di Satanas su sistema di kosnan i biba pa semper den e maravioso mundu nobo ku ta asina serka.—Juan 3:16; 2 Pedro 3:13.