PREGUNTA 9

Mi Mester Kere den Evolushon?

TOKA NA

DIKON TA BON PA BO SA?

Si e teoria di evolushon tin base, e ora ei bida no tin propósito. Pero, si ta den kreashon nos tin ku kere, e ora ei nos por haña kontestanan satisfaktorio pa preguntanan tokante bida i futuro.

KIKO ABO LO HASI?

Imaginá bo e siguiente esena: Alex ta tur konfundí. Semper el a kere den Dios i den kreashon. Pero, awe su mener di biologia ta insistí ku e teoria di evolushon ta un echo, ku e ta basá riba investigashon sientífiko konfiabel. Alex no ke laga parse ku e ta bobo. E ta bisa den su mes: “Kon ku bai bin, si sientífikonan a proba ku tin base pa kere den evolushon, ken ami ta pa kuestioná nan?”

Si ta abo ta Alex, lo bo aseptá e teoria di evolushon djis pasobra sientífikonan ta bisa ku e ta un echo?

PARA KETU I PENSA!

E hendenan na tur dos banda di e debate ta hopi lihé pa bisa kiko nan ta kere sin sa presis dikon nan ta kere loke nan ta kere.

Tin hende ta kere den kreashon djis pasobra ta esei nan a siña den nan misa.
Tin hende ta kere den evolushon djis pasobra ta esei nan a siña na skol.

SEIS PREGUNTA PA PENSA ARIBA

Beibel ta bisa: “Ta hende a traha tur kas, ma esun ku a traha tur kos ta Dios.” (Hebreonan 3:4) Esei ta parse rasonabel?

E idea ku bida no tin un Kreador ta mes ilógiko ku e idea ku no ta un hende a traha e kas akí

LOKE HENDE SA BISA: Tur kos den universo ta eksistí pa puru kasualidat komo resultado di un asina yamá ‘big bang.’

1. Ken òf kiko a kousa e eksploshon akí?

2. Kiko tin mas sentido: bisa ku tur kos a bini di nada òf ku tur kos a originá di un persona?

LOKE HENDE SA BISA: Hende a bini di bestia.

3. Si hende a bini di bestia, por ehèmpel di makaku, dikon nos ta hopi mas inteligente ku nan anto?

4. Dikon asta e forma di bida di mas “simpel” ta asina kompliká?

LOKE HENDE SA BISA: Evolushon ta un echo komprobá.

5. E persona ku ta bisa esaki tin evidensia di loke e ta bisa?

6. Kuantu hende no ta kere den evolushon djis pasobra otronan ta bisa ku tur hende inteligente ta kere esei?

“Si bo ta kana den mondi i bo mira un kas di palu masha bunita, lo bo bisa: ‘Waw, hopi nèchi! E palunan akí mester a kita kai nèt den e manera korekto pa forma e kas akí’? Di mes ku nò! No ta rasonabel pa pensa asina. Dikon nos mester kere anto ku tur kos den universo a djis bai para na nan lugá pa kasualidat?”—Julia.

“Imaginá bo ku un hende ta bisa bo ku un eksploshon den un lugá di imprenta a pone enk spat riba muraya i plafòn i forma e teksto di un dikshonario kompleto. Lo bo kere esei?”—Gwen.

DIKON MI POR KERE DEN DIOS?

Beibel ta bisa ku nos mester usa nos mente, esta, nos “kapasidat di pensa.” (Romanonan 12:1) Esaki ta nifiká ku nos fe den Dios no mester ta basá riba djis:

EMOSHON (Mi ta sinti ku mester tin algu mas)
INFLUENSIA DI OTRO HENDE (Hende rònt di mi ta kere den Dios)
PRESHON (Mi a lanta den un kas kaminda mi mester a kere den Dios)

Na lugá di esei, bo mes mester tin bon motibu pa kere ku Dios ta eksistí.

“Ora mi skucha mi dosente splika kon nos kurpa ta hinká den otro, mi no ta duda niun ratu so ku Dios ta eksistí. Kada parti di nos kurpa tin su propio funshon, asta e detayenan di mas chikitu. I hopi biaha e funshonnan akí ta tuma lugá sin ku nos sa mes. En bèrdat e kurpa humano ta hopi fasinante!”—Teresa.

“Ora mi mira edifisio haltu, barku krusero òf outo, mi ta puntra mi mes ‘Ken a traha tur e kosnan akí?’ Por ehèmpel, pa traha un outo mester di hende inteligente pasobra tur piesa, pa chikitu ku nan ta, tin ku funshoná bon pa asina henter e outo por traha bon. Pues, si ta hende a diseñá outo, ta mas ku klaru ku mester tin un persona ku a diseñá hende tambe.”—Richard.

“Mas mi a studia siensia, ménos real e idea di evolushon a bira. . . . Ami ta pensa ku bo mester tin mas ‘fe’ pa kere den evolushon ku pa kere den un Kreador.”—Anthony.

PA PENSA ARIBA

Despues di hopi dékada di investigashon, ainda sientífikonan no a haña un splikashon pa e teoria di evolushon ku nan tur ta di akuerdo kuné. Si sientífikonan mes no por haña otro riba tereno di evolushon—i ta nan ta supose di ta e ekspertonan—ta malu pa duda den e teoria ei?