1. Dikon algun persona meresé onor, i ki pregunta nos lo kontestá den e artíkulo akí?

MUSTRA onor na un persona ta enserá respet’é i dun’é atenshon spesial. Generalmente, nos ta mustra onor na un persona ku a hasi algu ku ta meresé tal onor òf ku ta okupá un posishon spesial. Pues, den e artíkulo akí nos lo kontestá e pregunta: Na ken nos mester mustra onor, i dikon?

2, 3. (a) Dikon spesialmente Yehova meresé onor? (Wak e promé plachi.) (b) Ken ta e Lamchi menshoná na Revelashon 5:13, i dikon e meresé onor?

² Manera Revelashon 5:13 ta mustra, “Esun sintá riba e trono i . . . e Lamchi” sin duda meresé onor. Kapítulo 4 di e mesun buki akí ta menshoná un motibu pakiko Yehova meresé onor. Einan, Beibel ta papia di kriaturanan den shelu ku ta duna alabansa na Yehova, “Esun ku ta biba pa tur eternidat.” Nan ta bisa: “Bo ta digno, Yehova, nos Dios, di risibí alabansa pa bo gloria, onor i poder, pasobra ta abo a krea tur kos, i pa motibu di bo boluntat nan ta eksistí i a ser kreá.”—Rev. 4:9-11.

³ E Lamchi ku Revelashon 5:13 ta papia di dje ta Hesukristu, kende na Huan 1:29 ta ser yamá “e Lamchi di Dios ku ta kita  piká di mundu.” Beibel ta indiká ku Hesus ta superior na kualke hende ku ta òf ku tabata rei. Beibel ta splika: “[E] ta Rei di esnan ku ta goberná komo rei i Señor di esnan ku ta goberná komo señor, e úniko ku tin inmortalidat, ku ta biba den un lus inaserkabel, ku ningun hende no a mira ni no por mira.” (1 Tim. 6:14-16) Kua otro rei a yega di entregá su bida boluntariamente pa libra nos di nos pikánan? Bo no ta sinti bo motivá pa djòin e miónes di kriatura spiritual ku ta proklamá: “E Lamchi ku a ser matá ta digno di risibí poder, rikesa, sabiduria, forsa, onor, gloria i alabansa.”—Rev. 5:12.

4. Dikon ta masha importante pa nos mustra onor na Yehova i Kristu?

⁴ Ta masha importante pa nos mustra onor na Yehova i Kristu. Nos bida eterno ta dependé di esei. E palabranan di Hesus ku nos ta lesa na Huan 5:22 i 23 ta yuda nos mira esei bon kla: “E Tata no ta husga ningun hende, ma el a enkargá e Yu ku tur husgamentu, pa asina tur hende por onra e Yu meskos ku nan ta onra e Tata. Esun ku no ta onra e Yu, no ta onra e Tata ku a mand’é.”—Lesa Salmo 2:11, 12. *

5. Dikon nos mester mustra onor i rèspèt na hende en general?

⁵ Hende a ser kreá “den imágen di Dios.” (Gén. 1:27) P’esei, mayoria di nos ta desplegá algun kualidat di Dios. Sí, hende tin e kapasidat pa demostrá amor, bondat i kompashon. Ademas, Dios a krea nos ku un konsenshi. E konsenshi akí ta yuda nos sa kiko ta bon òf malu, kiko ta onesto òf desonesto i kiko ta apropiá òf inapropiá. (Rom. 2:14, 15) Mayoria di hende gusta kos limpi i bunita. I generalmente, nan ke biba na pas ku otro hende. Sea ku nan ta realisá esei òf nò, te na un sierto grado nan ta reflehá e gloria di Yehova, i pa e motibu ei, nan meresé un grado di onor i rèspèt.—Sal. 8:5.

6, 7. Den ki sentido Testigunan di Yehova ta diferente for di hopi hende?

⁶ Nos mester ta balansá pa determiná ki tipo di onor nos ta mustra na otro hende i te na ki grado. E spiritu di e mundu di Satanas tin hopi influensia riba mayoria di hende imperfekto. Pa e motibu ei, hende tin e tendensia di mira sierto personanan komo nan ídolo en bes di djis mira nan komo personanan ku meresé sierto grado di onor i rèspèt. Nan ta pone lidernan religioso i polítiko, strea di deporte i di entretenimentu i otro artista famoso riba un pedestal; hopi biaha nan ta trata nan manera ta dios nan ta. P’esei, tantu hende grandi komo chikitu ta mira e hendenan akí komo ‘role model,’ i tin biaha asta ta imitá nan gestonan, nan estilo di bisti òf nan kondukta.

⁷ Kristiannan berdadero no ta mustra onor na hende na e manera ei. Kristu ta e úniko hende ku a yega di biba ku ta un ehèmpel perfekto pa nos. (1 Ped. 2:21) Dios lo no keda kontentu si nos duna hende mas onor ku nan meresé. Nos mester kòrda e simpel bèrdat akí: “Tur a peka i no por reflehá e gloria di Dios.” (Rom. 3:23) Ningun hende meresé e onor ku kasi ta bira idolatria.

8, 9. (a) Kon Testigunan di Yehova mester mira funshonarionan di gobièrnu? (b) Te kon leu nos ta kooperá ku outoridatnan?

⁸ Den nos komunidat tin algun hende ku tin un sierto grado di outoridat. Por ehèmpel, funshonarionan di gobièrnu mester mantené órden públiko i  perkurá pa nesesidatnan di nan siudadanonan. Esaki ta benefisiá tur hende. P’esei, apòstel Pablo a konsehá kristiannan pa mira e funshonarionan ei komo “outoridatnan superior” na kendenan kristiannan mester someté nan mes. Pablo a instruí e kristiannan: “Duna tur hende loke nan tin derecho riba dje: esun ku ta pidi belasting, dun’é belasting; . . . esun ku ta pidi onor, mustr’é onor.”—Rom. 13:1, 7.

⁹ Apropiadamente, Testigunan di Yehova ta mustra onor na e funshonarionan akí, manera ta ser sperá di nan i segun e kustumber di nan pais. Nos ta kooperá ku e funshonarionan akí segun ku nan ta kumpli ku nan responsabilidat. Ta klaru ku nos onor i sosten mester ta rasonabel, di akuerdo ku loke Beibel ta bisa. Nunka nos lo bai asina leu ku nos ta desobedesé Dios òf kibra nos neutralidat kristian.—Lesa 1 Pedro 2:13-17.

10. Ki bon ehèmpel Yehova su sirbidónan di pasado a pone den nan manera di trata ku gobièrnu i su funshonarionan?

¹⁰ Yehova su sirbidónan di pasado a pone un bon ehèmpel den nan manera di trata ku gobièrnu i su funshonarionan. Por ehèmpel, ora e Imperio Romano a tene un senso ku a rekerí pa tur hende registrá nan mes, Hose ku Maria a obedesé. Nan a biaha bai Bètlehèm apesar di e echo ku Maria tabata serka di duna lus na su promé yu. (Luk. 2:1-5) Añanan despues, ora nan a akusá Pablo di un mal echo, ku rèspèt el a defendé su mes i a demostrá debido onor na Rei Heródes Agripa i na Festo, gobernador di e provinsia romano di Hudea.—Echo. 25:1-12; 26:1-3.

11, 12. (a) Dikon nos no ta duna lidernan religioso onor spesial? (b) Kiko tabata e bon resultado ora un Testigu di Austria a mustra onor na un polítiko?

¹¹ Sinembargo, Testigunan di Yehova no ta duna lidernan religioso onor spesial, maske e lidernan akí ta ferwagt esei. Religion falsu ta siña hende mentira tokante Dios i ta trose e siñansa di su Palabra. Pues, nos ta respetá lidernan religioso meskos ku nos ta respetá kualke otro hende, ma nos no ta duna nan onor spesial. Kòrda ku Hesus a yama e lidernan religioso di su tempu hipókrita i guia siegu. (Mat. 23:23, 24) Di otro banda, ora nos ta duna funshonarionan di gobièrnu e onor i rèspèt ku nan meresé, esei tin biaha por duna bon resultado òf asta resultado ku nos no a spera.

¹² Leopold Engleitner, di Austria, tabata un Testigu di Yehova zeloso. Nazinan a arest’é i hib’é ku trein na e kampo di konsentrashon Buchenwald. Dr. Heinrich Gleissner, kende tabata un polítiko di Austria ku e nazinan a arestá, tambe tabata riba e mesun trein. Riba kaminda pa e kampo di konsentrashon, Ruman Engleitner respetuosamente a splika Gleissner su kreensianan, kende a skucha ku hopi atenshon. Despues di Segundo Guera Mundial, Gleissner a usa su influensia na vários okashon pa yuda e Testigunan na Austria. Kisas bo tambe ta kòrda un ehèmpel den kua Testigunan di Yehova tabatin bon resultado ora nan a hasi loke Beibel ta bisa, esta, mustra debido rèspèt, òf onor, na funshonarionan di gobièrnu.

13. Ken spesialmente meresé nos onor i rèspèt, i dikon?

¹³ Sin duda, nos rumannan tambe meresé nos onor i rèspèt, spesialmente e ansianonan ku ta dirigí e kongregashon. (Lesa 1 Timoteo 5:17.) Nos ta mustra onor na e ruman hòmbernan akí sea kual sea nan nashonalidat, edukashon, posishon  sosial òf situashon finansiero. Beibel ta bisa ku e hòmbernan akí ta “regalo den forma di hende,” i Dios a duna nan un papel importante: nan tin ku perkurá pa e nesesidatnan di su pueblo. (Efe. 4:8) Pensa un ratu riba e rumannan ku ta ansiano di kongregashon, superintendente di sirkuito, miembro di Komité di Sukursal i miembro di Kuerpo Gobernante. Nos rumannan di promé siglo tabatin masha rèspèt pa e ruman hòmbernan akí ku a ser nombrá pa dirigí e kongregashon kristian, i awe nos tambe ta sinti meskos. Nos no ta trata e representantenan di e kongregashon kristian ku ta bon konosí komo si fuera ta ídolo nan ta ni nos no ta hasi manera ta angel nan ta ora nos topa nan. Sinembargo, nos ta respetá i onra e ruman hòmbernan ei pa nan trabou duru i nan humildat.—Lesa 2 Korintionan 1:24; Revelashon 19:10.

14, 15. Ki diferensia tin entre berdadero wardadónan kristian i esnan ku ta pretendé di ta esei?

¹⁴ E ansianonan akí ta wardadónan spiritual humilde. Kon asina? Entre otro, nan no ke pa hende trata nan manera artista famoso. Esaki ta hasi nan diferente for di hopi lider religioso di nos tempu i di promé siglo. Tokante e lidernan akí, Hesus a bisa: “Nan gusta e lugá mas prominente na bankete i stul te dilanti den snoa i pa hende kumindá nan ku rèspèt riba plasa.”—Mat. 23:6, 7.

¹⁵ Berdadero wardadónan kristian humildemente ta obedesé Hesus su palabranan: “No laga hende yama boso Rabi, pasobra ún so ta boso Maestro, miéntras ku boso tur ta ruman. Ademas, no yama ningun hende riba tera boso tata, pasobra ún so ta boso Tata: Esun ku ta den shelu. Tampoko no laga nan yama boso lider, pasobra ún so ta boso Lider: Kristu. Ma esun di mas grandi entre boso mester ta boso sirbidó. Ken ku halsa su mes, lo keda humiá, i ken ku humiá su mes, lo keda halsá.” (Mat. 23:8-12) Pues, ta di komprondé dikon ansianonan di kongregashon rònt mundu ta gana e amor, rèspèt i onor di nan rumannan.

16. Dikon nos tin ku sigui hasi esfuerso pa komprondé i apliká loke Beibel ta bisa tokante mustramentu di onor?

¹⁶ Ta bèrdat ku por tuma tempu pa nos haña e punto di bista balansá enkuanto kon i na ken nos mester mustra onor. Esaki tabata e kaso tambe ku e kristiannan di promé siglo. (Echo. 10:22-26; 3 Huan 9, 10) Pero, ta bale la pena nos  hasi esfuerso pa apliká loke Beibel ta bisa tokante e asuntu ei pasobra esei ta trese hopi benefisio.

17. Kiko ta algun benefisio di mustra onor na hende den puesto di outoridat?

¹⁷ Ora nos ta mustra rèspèt i onor na hende den puesto di outoridat, tin mas chèns ku nan lo defendé nos derecho di prediká. Hopi biaha, e hendenan akí ta haña un punto di bista positivo di nos aktividatnan. Algun aña pasá, Birgit, un pionero na Alemania, a asistí na graduashon di su yu muhé. E maestronan a bisa Birgit ku tabata un plaser pa traha ku yunan di Testigunan atraves di añanan. Ademas, nan a bisa ku lo tabata yamer si no tabatin niun mucha Testigu di Yehova na e skol. Birgit a splika nan: “Nos ta siña nos yunan pa nan komportá nan mes manera Dios ke, i esei ta inkluí mustra rèspèt na nan maestronan i onra nan.” Un di e maestronan a bisa: “Si tur mucha tabata manera boso yunan, skol lo tabata manera un paradeis.” Vários siman despues, un di e maestronan a asistí na un kongreso na Leipzig.

18, 19. Dikon ta importante pa mustra ansianonan onor na e manera korekto?

¹⁸ Naturalmente, nos mester laga e prinsipionan sabí i perfekto di e Palabra di Dios guia nos ora di mustra e debido onor na ansianonan. (Lesa Hebreonan 13:7, 17.) Nos por i mester elogiá nan pa nan trabou duru i hasi nos máksimo esfuerso pa sigui nan instrukshonnan. Asina nos por yuda nan sigui kumpli ku nan responsabilidatnan ku goso. Ma esaki no ta nifiká ku nos mester purba di imitá un ansiano “prominente” den su manera di bisti i di areglá su mes, su manera di duna diskurso òf asta su manera di kòmbersá. Si nos ta hasi esei, nos por duna e impreshon ku ta hende nos ta sigui. Pero nos no mester lubidá ku e ansianonan tambe ta imperfekto i ku ta ehèmpel di Kristu nos tin ku sigui.

¹⁹ Ora nos ta duna e ansianonan e debido rèspèt i onor, i no ta trata nan manera artista famoso, nos ta yuda nan. Kon asina? Nos ta yuda nan pa no bira orguyoso, sinti nan superior òf mas hustu ku otro hende.

20. Kon nos ta benefisiá ora nos ta mustra onor na otro hende?

²⁰ Nos tambe ta benefisiá ora nos ta mustra debido onor na hende ku meresé esei ya ku esei ta evitá ku nos ta bira egoista i ta evitá ku nos ta haña un punto di bista halsá di nos mes ora otro hende mustra onor na nos. Ademas, e ta yuda nos keda uní ku e organisashon di Yehova ku no ta duna demasiado òf indebido onor na hende, sea ku nan ta ruman òf nò. Es mas, ta sabí pa no duna demasiado onor na hende pasobra esei lo evitá ku nos ta trompeká ora un hende ku nos a mustra onor na dje desapuntá nos.

21. Kua ta e benefisio di mas importante ku nos ta haña ora nos mustra e debido onor na hende ku meresé esei?

²¹ E benefisio di mas importante ku nos ta haña ora nos mustra e debido onor na hende ku meresé esei ta ku nos ta agradá Dios. Komo ku nos ta hasi manera e ke, nos ta mantené nos integridat na dje. E ora ei, Yehova por kontestá kualke persona ku ta purba di reproch’é. (Pro. 27:11) Mundu ta yen di hende ku no sa kon pa mustra onor na otronan. P’esei, nos ta masha kontentu ku nos sa kon pa mustra onor na e manera ku Yehova ke.