PA E hebreonan den e Tera Primintí, aña tabata kuminsá den sèptèmber/òktober, e temporada ku nan tabata plug i sembra.

Tin dos tipo di kalènder: kalènder lunar i kalènder solar. E lunanan di un kalènder lunar tin sea 29 òf 30 dia. Esei ta pone ku un aña basá riba kalènder lunar ta mas kòrtiku ku un aña basá riba kalènder solar. P’esei mester a bini ku un método pa hasi nan pareu ku otro. Un método tabata di agregá sea dianan èkstra, òf periódikamente un luna, kisas na kuminsamentu di e aña. Di e manera akí, e kalènder lunar lo a kuadra ku e temporada di plantamentu i kosecha.

Den tempu di Moises, Dios a bisa ku pa e israelitanan e aña mester a kuminsá na abib, esta nisan. (Éks. 12:2; 13:4) Esei lo ta rònt di mart/aprel. Den e luna di nisan, e israelitanan tabatin un fiesta, i durante e fiesta ei, nan mester a ofresé Yehova e promé kosecha di nan plantashon di puspas.—Éks. 23:15, 16.

Un eksperto a bisa ku e hebreonan tabata usa un método masha fásil pa sa ki ora pa hinka un luna èkstra den nan kalènder. El a bisa ku Pasku Hudiu tabata kai den e luna di nisan, riba e dia ku tabatin luna yen (14 di nisan). Pero 14 di nisan semper mester a kai despues di e equinox di lènte, esta, e dia ku largura di dia i di anochi tabata igual. Si a ripará ku Pasku Hudiu lo a kai promé ku e equinox di lènte, nan tabata hinka un luna èkstra promé ku e luna di nisan.

Testigunan di Yehova ta usa e método ei pa determiná e fecha di e Sena di Señor, kual ta den lènte i semper ta kai riba 14 di nisan riba e kalènder hebreo. Fo’i trempan e kongregashonnan rònt mundu ta haña sa e fecha ei. *

Pero kon e hebreonan tabata sa ki ora un luna ta kaba anto ora un nobo tabata kuminsá? Awe bo por djis wak riba bo kalènder òf riba bo telefòn òf tablet. Pero den tempu di Beibel e no tabata asina fásil.

Den tempu di Noe, un luna tabatin 30 dia. (Gén. 7:11, 24; 8:3, 4) Pero mas despues, pa e hebreonan un luna no tabata mará na 30 dia. Dikon? Pasobra riba e kalènder hebreo, e siguiente luna tabata kuminsá asina ku por a mira e rant di luna nobo. Esei tabata kai sea 29 òf 30 dia despues ku e luna anterior a kuminsá.

Tabatin un biaha ku tantu David komo Jonatan a papia tokante e siguiente luna ora ku nan a bisa: “Mañan ta luna nobo.” (1 Sám. 20:5, 18) Pues, ta parse ku ya pa siglo 11 promé ku Kristu tabata kalkulá e lunanan delantá. Pero kon un israelita por a haña sa ki ora e siguiente luna a kuminsá? Mishna, un kolekshon di lei i tradishon hudiu, ta duna algun informashon. E ta indiká ku despues ku e hudiunan a bini bèk for di Babilonia, Sanedrin (e korte supremo hudiu) tabata atendé ku esei. Durante shete luna Sanedrin tabata bini huntu riba e di 30 dia di luna. Sanedrin tabata responsabel pa determiná ki ora e siguiente luna lo kuminsá. Kon nan tabata tuma e desishon ei?

Tabatin hòmber ku tabata pará na nan pòst riba e serunan rònt di Herúsalèm pa wak shelu anochi. Asina ku nan por a mira rant di luna nobo, nan tabata manda bisa Sanedrin. Ora Sanedrin haña sufisiente prueba ku a mira rant di luna nobo, nan tabata anunsiá ku e siguiente luna a kuminsá. Pero kiko si nubia òf neblina a stroba e hòmbernan riba seru di mira esei? Den e kaso ei tabata disidí ku e luna aktual tabatin  30 dia anto ku e siguiente luna a kuminsá.

Mishna ta splika ku Sanedrin tabata usa señal di kandela pa laga tur hende sa ku e siguiente luna a kuminsá. Nan tabata hasi esei riba e Seru di Oleifi, ku ta keda serka di Herúsalèm. Anto pa sigui plama e notisia ei pa henter Israel, tabata sende kandela riba diferente sitio haltu rònt di Israel. Mas despues tabata usa mensahero pa hasi esei. Pues, asina ei tur hudiu, sea ku nan tabata biba na Herúsalèm òf na otro kaminda, lo a haña sa ku e siguiente luna a kuminsá. Di e manera ei, tur por a selebrá e fiestanan na e mesun momento.

E tabèl ta mustra bo kon luna, fiesta i temporada den tempu di e israelitanan tabata hinká den otro.