LOKE HENDE SA BISA

Algun hende ta mira wega di plaka komo un dibertishon inofensivo, tanten ku nan ta hunga na un manera legal. Algun forma di wega di plaka ku lei ta aprobá, manera loteria organisá ku pèrmit di gobièrnu, ta krea fondo pa yuda komunidat.

LOKE BEIBEL TA BISA

Beibel no ta menshoná hungamentu di wega di plaka direktamente. Pero, e ta duna vários prinsipio ku ta yuda nos komprondé kon Yehova ta mira esei.

Básikamente, wega di plaka ta enserá gana sèn a kosto di otro hende; i esei ta kontrali na e spièrtamentu di Beibel pa keda leu for di “tur sorto di golosidat.” (Lukas 12:15) De echo, un motibu prinsipal pakiko hende ta hunga wega di plaka ta golosidat. E negoshinan di wega di plaka ta bisa ku bo por gana hopi sèn. Pero nan no ta bisa ku e chèns pa gana ta masha chikitu. E deseo pa bira riku ta pone ku hende ta pusta suma grandi di plaka na kasino. En bes di yuda hende evitá golosidat, wega di plaka ta promové e deseo pa gana plaka fásil.

Wega di plaka ta basá riba meta egoista: gana sèn ku otro hungadó a pèrdè. Sinembargo, Beibel ta animá hende pa “sigui buska, no su mes benefisio, sino esun di e otro persona.” (1 Korintionan 10:24) I un di e dies mandamentunan ta bisa: “No kudishá . . . nada ku ta pertenesé na bo próhimo.” (Éksodo 20:17) Ora un persona ku ta hunga wega di plaka ke gana, en realidat e ta spera ku e otro hungadónan ta pèrdè nan sèn pa e benefisiá.

Beibel tambe ta spièrta nos pa no mira suerte komo un forsa misterioso ku ta hiba na bendishon. Den Israel di antigwedat, tabatin algun hende ku no tabatin fe den Dios i nan a kuminsá adorá e dios di suerte. Kiko Dios tabata pensa di esei? El a bisa nan: “Boso a hasi loke ta malu den mi bista, i a skohe loke mi no tabatin delisia den dje.”​—Isaías 65:11, 12.

Ta bèrdat ku na algun parti di mundu ta usa fondo di wega di plaka legal pa enseñansa, desaroyo ekonómiko i otro proyekto na benefisio di komunidat. Pero e manera ku ta usa e fondonan akí no ta kambia kon a yega na e sèn ei, esta, pa medio di aktividat ku abiertamente ta promové golosidat, egoismo i e deseo di ke haña algu sin traha p’e.

“No kudishá . . . nada ku ta pertenesé na bo próhimo.”​—Éksodo 20:17.

LOKE BEIBEL TA BISA

Beibel ta spièrta ku “hende ku ta determiná pa bira riku ta kai den tentashon, den trampa i den hopi deseo bobo i perhudisial ku ta hiba hende na destrukshon i ruina.” (1 Timoteo 6:9) Hopi biaha, golosidat ta pone hende hunga wega di plaka. Anto wega di plaka ta asina destruktivo ku Beibel ta menshon’é entre e kosnan ku nos tin ku evitá.​—Efesionan 5:3.

Wega di plaka ta enfoká riba bira riku lihé, i esei ta hiba na amor pa plaka, loke Beibel ta identifiká komo “rais di tur sorto di kos perhudisial.” E deseo pa haña sèn lihé i na un manera fásil por dominá bida di un persona kompletamente. E deseo ei por duna un hende hopi strès i daña su amistat ku Dios. Beibel ta bisa ku hende ku a kai den e trampa di amor pa plaka a “kousa nan mes hopi doló.”—1 Timoteo 6:​10.

Golosidat ta pone ku hopi biaha hende ta bira malkontentu ku nan situashon finansiero, i esei ta hasi nan infelis. Beibel ta bisa: “Esun ku ta stima plaka lo no keda satisfecho ku plaka, ni esun ku ta stima abundansia, ku su entrada.”—Eklesiástes 5:​10.

Miónes di hende ku a kai den gara di wega di plaka a bira adikto na wega di plaka, un situashon masha tristu mes. E problema akí ta rònt mundu. Na Merka so, tin miónes di hende ku ta adikto na wega di plaka.

Proverbionan 20:21 ta bisa: “Un herensia hañá muchu lihé na prinsipio lo no ta bendishoná na fin.” Adikshon na wega di plaka ta pone hende kai den debe òf asta bai bankarota. Ademas, hopi hende a pèrdè trabou, amigu i nan matrimonio a kibra. Sinembargo, ora nos apliká e prinsipionan di Beibel, nos ta protehá nos mes kontra e mal konsekuensianan ku wega di plaka tin riba nos bida i felisidat.

“Ma hende ku ta determiná pa bira riku ta kai den tentashon, den trampa i den hopi deseo bobo i perhudisial ku ta hiba hende na destrukshon i ruina.”​—1 Timoteo 6:9.