Esei ta e konklushon ku un tim di investigadó internashonal a saka ora nan tabata investigá kambio di klima. Si bo ta kere den un Kreador ku ta interesá den humanidat, e konklushon sientífiko ei kisas ta laga bo pensa riba tur e prosesonan natural ku Dios a krea pa asina nos planeta por rekuperá.

Sinembargo, komo ku hende a kousa asina tantu daño na nos planeta, e no por rekuperá riba su mes. Dikon nos por tin sigur ku Dios lo hasi algu tokante esei?

Tuma nota di e tekstonan di Beibel den e kuadro ku ta sigurá nos ku nos planeta lo sobrebibí i ku semper lo tin bida riba dje.

• Dios a krea nos planeta. “Na kuminsamentu, Dios a krea shelu i tera.”—Génesis 1:1

• Dios ta doño di nos planeta. “Tera i tur loke tin riba dje ta di Yehova.” a —Salmo 24:1

• Dios a diseñá nos planeta pa sobrebibí. “Bo a pone tera firmemente riba su fundeshi. Hamas i nunka, lo e kita for di su lugá.”—Salmo 104:5

• Dios a primintí ku semper lo tin bida riba nos planeta. “E Dios berdadero . . . ku a forma tera . . . no a krea tera pòrnada. Mas bien, el a form’é pa e ser habitá.”—Isaías 45:18

• Dios a primintí ku hende lo biba pa semper riba tera. “Hende hustu lo heredá tera, i nan lo biba riba dje pa semper.”—Salmo 37:29

Dios a diseñá nos planeta di tal manera ku hende por disfrutá di bida riba tera sin kousa daño na dje. Beibel ta bisa ku Yehova Dios lo no laga hende sigui usa e rekursonan di nos planeta na un manera egoista, pasobra esei lo sigui kousa daño na nos planeta. Na su debido tempu, Dios lo pone un fin na esei.—Revelashon 11:18

Beibel ta primintí ku Dios lo kombertí nos planeta den un bunita paradeis i ku lo e habri su man i “satisfasé deseo di tur ser bibu.”—Salmo 145:16