Dikon Hende No Tin Rèspèt Mas pa Bida?

TOKA NA

DIKON TA IMPORTANTE PA MUSTRA RÈSPÈT PA BIDA

Ora nos hasi kos ku ta malu pa nos salú òf ku ta pone bida di otro hende na peliger, esei ta mustra ku nos no ta respetá nos mes bida ni bida di otro hende.

Humamentu di sigaria no ta djis kousa kanser, e ta pone ku ta bira mas difísil pa bo kurpa bringa e enfermedat ei. Mas o ménos 90 porshento di hende ku ta muri pa motibu di kanser di pulmon ta pasobra e persona mes tabata huma òf un persona rònt di dje tabata huma.
Ora un tiroteo tuma lugá, hopi hende ta keda ku trouma emoshonal pa vários aña. Un informe di Universidat Stanford ta bisa: “Investigashon ta mustra ku asta hende ku logra skapa [di tiroteo na skol] sin ningun daño físiko ta keda ku problema emoshonal i mental ku por afektá nan bida pa hopi aña.”
Hende ku ta stür bou di influensia di alkohòl òf droga ta bira un peliger pa otro hende ku ta riba kaminda i asta pa hende ku ta kana kantu di kaminda. Ora hende no ta mustra rèspèt pa bida, hopi bes ta hende inosente ta sufri daño.

LOKE BO POR HASI

Kuida bo salú. Nunka no ta muchu lat pa stòp ku mal hábito manera humamentu, vaping (un tipo di sigaria elektróniko), bebementu di mas òf uso di droga. E mal hábitonan ei ta afektá bo salú i ta mustra falta di rèspèt pa bida di hende rònt di bo, inkluso bo famia.

“Laga nos limpia nos mes di tur impuresa di karni.”—2 Korintionan 7:1.

Tene kuenta ku siguridat. Pa prevení aksidente, hasi sigur ku bo kas ta den bon kondishon. Kore outo ku kuidou i hasi sigur ku bo outo ta bon mantené. No laga otro hende preshoná bo pa partisipá den aktividat ku por kousa leshon grave òf asta morto.

“Ora bo traha un kas nobo, traha un rant na bo dak, pa bo no trese kulpa di sanger riba bo kas, si un hende kai for di dje.”—Deuteronomio 22:8. a

Sea amabel ku otro hende. Ora nos tin rèspèt pa bida, esei ta influensiá kon nos ta mira hende di diferente nashonalidat, posishon sosial i kultura. Dikon? Pasobra prehuisio i odio ta e kousa di mayoria violensia i guera ku nos ta mira rònt mundu.

“Kita tur tipo di amargura malisioso, rabia, furia, gritamentu i papiamentu di kos ofensivo for di boso, i tambe tur loke ta perhudisial. Pero bira bondadoso ku otro.”—Efesionan 4:31, 32.

LOKE NOS TA HASI

Testigunan di Yehova ta siña hende pa hiba un bida saludabel i balansá. Nos kurso di Beibel i e reunionnan a yuda hopi hende vense adikshon i stòp ku mal hábito ku tabata kousa nan daño.

Nos ta kumpli ku norma estrikto di siguridat durante di nos proyektonan di konstrukshon. E boluntarionan ku ta yuda konstruí lugá di adorashon i otro edifisio ku nos ta usa pa e obra mundial di edukashon bíbliko ta haña entrenamentu pa evitá aksidente. Nos edifisionan ta ser inspekshoná regularmente pa hasi sigur ku nan ta kumpli ku e leinan lokal di siguridat.

Nos ta yuda hende ora di desaster natural. Na aña 2022, nos a duna yudansa na momento ku mas o ménos 200 desaster natural grandi a tuma lugá rònt mundu. Nos a usa kasi 12 mion dòler di kontribushon pa yuda e víktimanan di desaster natural.

Ora Ebola a kuminsá plama na Wèst Afrika (2014) i na Repúblika Demokrátiko di Congo (2018), nos a siña hende kon pa evitá di haña e malesa mortal ei. Nos a manda algun representante pa papia ku diferente grupo tokante e tema “Obedensia Ta Salba Bida.” Nos a traha un lugá pa laba man na entrada di kada un di nos lugánan di adorashon. Ademas, nos a mustra e importansia di laba man i nos a splika otro kos práktiko ku nos por hasi pa evitá ku e malesa ta plama.

Na Sierra Leone, nan a elogiá Testigunan di Yehova na radio pasobra nan a yuda Testigu di Yehova i hende ku no ta Testigu den komunidat pa evitá di haña Ebola.

Un lugá pa laba man na Salòn di Reino tempu ku Ebola a plama na Liberia na 2014

a Den Medio Oriente di antigwedat, e rekisito ei a mustra ku tabata importante pa pensa riba siguridat di bo famia i di otro hende.

SPIÈRTA!