Profeta Moises a bisa ku si nos obedesé Dios su mandamentunan, nos lo haña Dios su bendishon. (Deuteronomio 10:13; 11:27) Nos no ta obedesé Dios pasobra nos tin miedu di haña kastigu di dje. Dios su bunita kualidatnan ta motivá nos pa stim’é, i komo ku nos stim’é nos ta obedes’é i ta evitá di hasi kualke kos ku por pon’é bira tristu. “Pasobra amor pa Dios ta nifiká ku nos ta kumpli ku su mandamentunan.”—1 Huan 5:3.

Pero ki bendishon nos lo risibí si nos obedesé Dios? Ban wak dos benefisio ku nos por haña.

“Ami ta SEÑOR bo Dios, kende ta siña bo, pa bo prosperá, kende ta guia bo den e kaminda ku bo mester kana.”—ISAÍAS 48:17.

Yehova Dios, nos Kreador, konosé nos i ta duna nos e guia ku nos tin mester. Si nos ke pa Dios su siñansa yuda nos tuma desishon sabí, nos mester siña for di e Santu Skritura kiko Dios ke pa nos hasi i despues hasi loke e ta bisa.

“Felis ta esnan ku ta tende e palabra di Dios i ta kumpli kuné!”—LUKAS 11:28.

Aktualmente, tin miónes di hende ku ta kumpli ku e Palabra di Dios i ku ta berdaderamente felis. Laga nos wak un ehèmpel di un hende hòmber di Spaña. E tabata rabia hopi lihé i tabata trata hende malu, asta su propio kasá. Un dia, el a lesa den e Skritura loke Profeta Moises a skirbi tokante e yu di Yakòb ku yama Yosef, un mucha hòmber ku no tabata rabia lihé. Ora nan a bende Yosef komo esklabo i a ser’é den prizòn inhustamente, e no a rabia; el a keda trankil, amabel i asta a pordoná. (Génesis, kapítulo 37-45) E hòmber di Spaña a bisa: “Ora mi a meditá riba Yosef su ehèmpel, esei a motivá mi pa no rabia lihé, pa ta amabel i mustra dominio propio. Komo resultado, awor mi tin un bida felis.”

E Santu Skritura ta duna mas konseho tokante kon nos mester trata otro hende. Laga nos wak mas detaye den e siguiente artíkulo.