Enoc A Cana cu Dios den un Mundu Malbado

DIABEL ta pretendé cu e por kita tur hende for di Dios, i tin bes a parce como si fuera el a logra. Pa casi cincu siglo despues di morto di Abel no tabatin ningun hende cu a distinguí su mes como un sirbidó fiel di Jehova. Al contrario, conducta pecaminoso i malbado a bira algu normal.

Ta durante e tempu di degeneracion spiritual aki Enoc a biba riba tera. Segun cronologia bíblico, el a nace na aña 3404 P.E.C. Distinto di su contemporáneonan, Enoc tabata un homber bon mirá den bista di Dios. Apostel Pablo a mencion’é entre e sirbidónan di Jehova, kende nan fe ta sirbi como un ehempel pa cristiannan. Ken Enoc tabata? Cua problemanan e mester a enfrentá? Con el a trata cu nan? I di con su integridad ta relevante pa nos?

Den e dianan di Enos, casi cuater siglo promé cu e tempu di Enoc, “hende a cuminsá inbocá e nomber di Jehova.” (Génesis 4:26) Desde comienso di historia humano, hende a usa e nomber di Dios. P’esei, evidentemente, loke a cuminsá tempu cu Enos tabata na bida no tabata e acto di inbocá Jehova den fe i adoracion puru. Algun experto dje idioma hebreo ta pensa cu mester comprendé Génesis 4:26 den e sentido cu hende “a cuminsá profaná” of cu “e ora ei blasfemia a cuminsá.” Podisé hende a cuminsá aplicá Jehova su nomber na nan mes of na otro hende via ken nan a pretendé di acercá Dios den adoracion. Of kisas nan a duna e nomber di Dios na ídolo.

‘Enoc A Cana cu e Dios Berdadero’

Maske Enoc tabata rondoná cu maldad, el “a sigui cana cu e Dios berdadero,” Jehova. Bijbel no ta bisa cu su antepasadonan—Set, Enos, Kenan, Mahalalel i Jared—a cana cu Dios. A lo ménos, nan no a haci esei n’e mésun grado cu Enoc, kende su manera di biba aparentemente a distinguié for di nan.—Génesis 5:3-27.

Cana cu Jehova a encerá cu Enoc mester tabatin un relacion íntimo cu Dios, i e por a logra esaki solamente dor cu el a biba na armonia cu e boluntad di Dios. Jehova a aprobá e debocion cu Enoc a manifestá. De facto, Septuaginta griego ta bisa cu “Enoc a agradá [Dios] hopi,” i esei ta un pensamentu cu apostel Pablo tambe a expresá.—Génesis 5:22, nota na pia di página; Hebreonan 11:5.

Enoc su fe tabata di vital importancia den su bon relacion cu Jehova. E mester a ehercé fe den e “simia” primintí di e “muher” di Dios. Si el a conocé Adam personalmente, Enoc lo por a obtené algun informacion tocante Dios su trato cu e promé pareha humano den Eden. E conocimentu cu e tabatin di Dios a haci Enoc e clase di persona cu tabata “busk’é cu empeño.”—Génesis 3:15; Hebreonan 11:6, 13.

Den Enoc su caso i tambe den di nos, un bon relacion cu Jehova ta rekerí mas cu djis conocé Dios. Si nos ta duna hopi balor na un relacion íntimo cu un cierto persona, no ta asina cu su punto di bista lo influenciá nos  manera di pensa i di actua? Nos ta evitá palabra of actonan cu lo por ruiná e amistad ei. I si nos ta pensa di haci algun cambio den nos mes circunstancianan, nos no ta tuma na consideracion tambe con esaki lo bai afectá e relacion ei?

Asina tambe, e deseo pa mantené un relacion estrecho cu Dios tin influencia riba loke nos ta haci. Un rekisito esencial ta conocimentu exacto di loke Dios ta aprobá i desaprobá. Anto nos mester laga e conocimentu ei guia nos, haciendo esfuerso pa agrad’é den pensamentu i accion.

Sí, pa cana cu Dios, nos tin cu agrad’é. Esei ta loke Enoc a haci pa cientos di aña. De facto, e forma dje verbo hebreo cu ta indicá cu Enoc “a cana” cu Dios ta denotá accion continuo. Un otro homber fiel cu ‘a cana cu Dios’ tabata Noe.—Génesis 6:9.

Enoc tabata un tata di famia cu tabatin un esposa i “yu homber i yu muher.” Metúsalem tabata un di su yu hombernan. (Génesis 5:21, 22) Sin duda, Enoc lo a haci tur loke tabata na su alcanse pa presidí riba su famia di cas den un manera excelente. Sin embargo, cu tur e maldad ei rond di dje, no tabata fácil p’e sirbi Dios. Podisé ta Lamec, tata di Noe, tabata su único contemporáneo cu a ehercé fe den Jehova. (Génesis 5:28, 29) Tog, Enoc a practicá adoracion berdadero cu curashi.

Kico a yuda Enoc keda fiel na Dios? Sin duda, e no a asociá cu esnan cu a blasfemá Jehova su nomber of cu otro hende cu no tabata compañero apropiado pa un adoradó di Dios. E echo cu Enoc a busca Jehova su yudansa den oracion tambe mester a fortalecé su determinacion pa evitá cualkier cos cu por a desagradá su Creador.

Profecia Contra e Malbadonan

Ta hopi duru pa tene nos mes na normanan haltu ora nos ta rondoná di hende malbado.  Pero Enoc a declará tambe un mensahe di huicio categórico contra hende malbado. Dirigí p’e spiritu di Dios, Enoc a declará proféticamente: “Mira! Jehova a bini cu su miriadanan santu, pa ehecutá huicio contra tur, i pa proba e culpabilidad di tur e malbadonan pa nan obranan malbado cu nan a cometé den un manera malbado, i en cuanto tur e cosnan ofensivo cu pecadónan malbado a papia contra dje.”—Hudas 14, 15.

Ki efecto e mensahe ei lo tabatin riba incrédulonan perverso? Ta razonabel pa suponé cu e palabranan skerpi ei a haci Enoc impopular, kisas provocando mofa, cherche i menasa. Algun hende lo mester a deseá di mat’é. Sin embargo, nan no a intimidá Enoc. E tabata sa kico a pasa cu hustu Abel, i mescos cuné, Enoc tabata decididu pa sirbi Dios, cueste loke cueste.

“Dios A Tum’é”

Aparentemente, Enoc tabata den peliger di morto ora “Dios a tum’é.” (Génesis 5:24) Jehova no a permití su profeta fiel sufri na man di enemigunan furioso. Segun apostel Pablo, “Enoc a ser transferí p’e no mira morto.” (Hebreonan 11:5) Hopi hende ta bisa cu Enoc no a muri, cu Dios a hib’é shelu caminda el a sigui biba. Sin embargo, Jesus a declará bon cla: “Ningun hende a subi na shelu sino esun cu a baha for di shelu, e Yu di hende.” Jesus tabata e “precursor” di tur esnan cu ta bai shelu.—Juan 3:13; Hebreonan 6:19, 20.

Pues, kico a pasa cu Enoc? E echo cu el a ser “transferí p’e no mira morto” kisas ta nificá cu Dios a lagu’e pasa den un trans profético i despues a terminá su bida miéntras e tabata den e estado aki. Bou di tal circunstancia, Enoc lo no a sinti e dolornan di morto. Anto “e no a ser hañá na ningun parti” pasobra aparentemente Jehova a deshací di su curpa, mescos cu el a deshací dje curpa di Moises.—Deuteronomio 34:5, 6.

Enoc a biba 365 aña—relativamente poco compará cu mayoria di su contemporáneonan. Pero e cos importante pa stimadónan di Jehova ta pa nan sirbié fielmente te na fin di nan bida. Nos sa cu Enoc a haci esei pasobra “promé cu su transferencia el a ricibí testimonio di cu el a agradá Dios bon.” E Scritura no ta revelá con Jehova a comunicá esaki na Enoc. Sin embargo, promé cu Enoc a muri, Dios a sigur’é di su aprobacion i nos por ta sigur cu Jehova lo corda riba dje den resureccion.

Imitá e Fe di Enoc

Ta bon pa nos imitá fe di hende deboto na Dios. (Hebreonan 13:7) Ta dor di su fe Enoc a sirbi como e promé profeta fiel di Dios. E mundu den tempu di Enoc tabata mescos cu esun di nos; violento, profano i malbado. Sin embargo, Enoc tabata diferente. E tabatin berdadero fe i e tabata un ehempel den debocion na Dios. Sí, Jehova a dun’é un mensahe di huicio importante pa declará, pero tambe el a fortalec’é p’e por a proclamá e mensahe aki. Cu curashi Enoc a cumpli cu su comision, i Dios a percurá p’e ora el a hañ’é confrontá cu oposicion di enemigu.

Si nos ehercé fe manera Enoc, Jehova lo fortalecé nos pa declará su mensahe den e último dianan aki. Lo e yuda nos enfrentá oposicion cu curashi, i nos debocion na Dios lo haci nos hopi distinto for di hende malbado. Fe lo capacitá nos pa cana cu Dios i comportá nos den un manera cu ta haci su curason alegrá. (Proverbionan 27:11) Dor di su fe, hustu Enoc a logra cana cu Jehova den un mundu malbado, i nos tambe por.

[Kuadro na página 30]

Ta for dje Buki di Enoc Bijbel Ta Cita?

E Buki di Enoc ta un texto apócrifo atribuí falsamente na Enoc. Probablemente el a ser producí durante siglo 2 i 1 P.E.C, i e ta un coleccion di mitonan hudiu no-histórico i exagerá, evidentemente un producto di splicacionnan elaborá di e mencion breve cu e buki di Génesis ta haci di Enoc. Esaki so caba ta motibu suficiente pa amantenan dje Palabra inspirá di Dios descart’é.

Den Bijbel, ta e buki di Hudas so ta contené e palabranan profético di Enoc: “Mira! Jehova a bini cu su miriadanan santu, pa ehecutá huicio contra tur, i pa proba e culpabilidad di tur e malbadonan pa nan obranan malbado cu nan a cometé den un manera malbado, i en cuanto tur e cosnan ofensivo cu pecadónan malbado a papia contra dje.” (Hudas 14, 15) Hopi erudito ta pretendé cu e profecia di Enoc contra su contemporáneonan malbado ta directamente citá for dje Buki di Enoc. Ta posibel cu Hudas a usa un buki apócrifo inconfiabel como su fuente di informacion?

E Scritura no ta revelá con Hudas a haña sa dje profecia di Enoc. Kisas el a simplemente cita un fuente comun, un tradicion confiabel cu a originá desde hopi tempu den antigwedad. Evidentemente, Pablo a haci algu similar ora el a mencioná Janes i Jambres, cu na otro parti den Bijbel ta ser mencioná como magonan anónimo den corte di Fárao cu a oponé Moises. Si e escritor dje Buki di Enoc tabatin acceso na un fuente antiguo, di con nos mester nenga cu Hudas tambe tabatin tal acceso? *—Éxodo 7:11, 22; 2 Timoteo 3:8.

Con Hudas a ricibí e informacion tocante e mensahe di Enoc p’e malbadonan ta di poco importancia. Cu e informacion ta confiabel a ser confirmá dor dje echo cu Hudas a skirbi bou di inspiracion di Dios. (2 Timoteo 3:16) Dios su spiritu santu a proteh’é p’e no declará nada cu no ta berdad.

[Nota]

[Plachi na página 31]

Cu curashi Enoc a declará e mensahe di Jehova