Pero e Skritura ta spièrta nos: “For di kurason ta sali pensamentu malisioso, matamentu, adulterio, fornikashon, ladronisia, testimonio falsu i blasfemia.” (Mat. 15:19) Nos kurason figurativo, esta, e persona ku nos ta di paden, por gaña nos i pone nos hasi kosnan ku ta bai kontra e boluntat di Dios. I kisas ta te despues ku nos a kometé un fayo, nos ta bin realisá ku nos kurason a gaña nos. P’esei, pa evitá ku nos ta dal un paso robes, nos mester sa kiko tin den nos kurason. Kiko por yuda nos haña sa esei?

Lesa Beibel tur dia i meditá riba loke e ta bisa.

Apòstel Pablo a skirbi: “E palabra di Dios ta bibu i poderoso, i e ta mas skèrpi ku kualke spada ku ta kòrta tur dos banda, i e ta penetrá asina profundo ku e ta separá alma for di spiritu.” Sí, e mensahe di Dios ku nos ta haña den Beibel “por saka pensamentu i intenshon di kurason na kla.” (Heb. 4:12) Ora nos ta studia Beibel, nos mester saminá nos pensamentu- i echonan pa wak si nan ta na armonia ku loke Beibel ta bisa. Di e manera ei, nos por saka afó kiko realmente tin den nos kurason. Pues, ta masha importante pa lesa Beibel tur dia i meditá riba loke e ta bisa. Esaki lo yuda nos pensa manera Yehova i mira kosnan for di su punto di bista.

Ora nos ta aseptá e konsehonan di Beibel i ta apliká su prinsipionan, nos ta entrená nos konsenshi. Nos konsenshi ta manera un stèm interno ku ta papia ku nos. E ta bisa nos ora un kos ta malu i  ta pone nos stòp di bini ku èksküs pa hasi malu. (Rom. 9:1) Ademas, den Beibel nos ta haña ehèmpelnan ku por sirbi komo “spièrtamentu pa nos.” (1 Kor. 10:11) Si nos siña for di nan, nos por evitá di tuma desishonnan robes. Kiko kada un di nos mester hasi?

Pidi Dios yuda bo saka afó kiko ta e intenshonnan di bo kurason.

Yehova ta esun ku ta “skrudiñá kurason.” (1 Kró. 29:17) E “ta mas grandi ku nos kurason i sa tur kos.” (1 Huan 3:20) Nos no por gaña Dios. Si nos laga Dios sa onestamente kon nos ta sinti i kiko ta nos preokupashon- i deseonan, e por yuda nos saka afó kiko realmente ta e intenshonnan di nos kurason. Nos por asta pidié pa ‘krea un kurason limpi den nos.’ (Sal. 51:10) Pues, si nos ke pa Yehova yuda nos haña sa kiko ta biba den nos kurason, nos mester hasi orashon.

Presta bon atenshon na reunion.

Ora nos ta presta bon atenshon na nos reunionnan, esaki ta yuda nos ser franko ku nos mes i realisá ki tipo di hende nos ta di paden. Ta bèrdat ku kisas no ta tur biaha nos ta siña algu nobo na reunion. Pero komo ku nos ta presente na tur reunion, nos lo haña un mihó komprondementu di prinsipionan di Beibel. Ademas, nos ta haña rekordatorionan balioso ku ta yuda nos haña sa kiko ta biba den nos kurason pa nos por hasi e kambionan nesesario. Un otro yudansa balioso ta e komentarionan di nos rumannan. (Pro. 27:17) Pero si nos ta isolá nos mes i no ta bini reunion regularmente pa disfrutá di kompañerismo kristian, nos por kuminsá ‘buska nos mes deseo’ i tuma desishonnan ku no ta sabí. (Pro. 18:1) P’esei, ta bon pa nos puntra nos mes: ‘Mi ta asistí na tur reunion i benefisiá di nan?’—Heb. 10:24, 25.

Nos kurason por gaña nos den vários manera. Laga nos wak kiko asina por bira un trampa pa nos: e deseo pa kos material, konsumo di alkohòl, e amistatnan ku nos ta skohe i rekreo.

E deseo pa kos material.

Ta normal ku hende ke satisfasé nan nesesidatnan físiko. Pero nos no mester pone kos material na promé lugá den nos bida. Hesus a spièrta nos pa no hasi esei. Den un di su ilustrashonnan, e ta hala nos atenshon na e kaso di un hòmber riku ku tabatin mangasinanan yen di trigu. Komo ku e hòmber no tabatin lugá pa warda mas trigu di un otro bon kosecha, el a disidí di basha su mangasinanan abou pa e traha mangasina mas grandi. El a rasoná den su mes: “Den nan mi ta bai warda tur mi trigu i tur mi biennan, i lo mi bisa mi alma: ‘Alma, bo tin hopi kos bon wardá pa hopi aña; bai trankil, kome, bebe i gosa.’” Sinembargo, e hòmber riku akí no a tene kuenta ku un realidat di bida: E por a muri e mesun anochi ei.—Luk. 12:16-20.

Segun ku nos edat ta subi, nos por kuminsá preokupá tokante nos situashon finansiero pa futuro. Kisas nos ta kuminsá traha overtaim, falta reunion, prediká ménos i neglishá nos responsabilidatnan kristian djis pa yega na poko sèn pa ora nos bira bieu. Un aktitut asina ta peligroso. Òf kisas bo ta den flor di bo hubentut i bo ta realisá ku no tin un mihó  karera ku sirbishi di tempu kompleto. Pero bo ta vasilá pa dal e paso pa traha pionero pasobra bo ta pensa ku bo mester ta finansieramente bon pará promé. Wèl, si ta asina bo ta pensa, kòrda riba esaki: Ta awor nos mester hasi nos bèst pa sirbi Dios. Nos no sa si mañan nos ta na bida.

Konsumo di alkohòl.

Proverbionan 23:20 ta bisa: “No anda ku esnan ku ta gusta dal nan biña.” Ora un hende tin deseo fuerte pa alkohòl, e ta kuminsá buska èksküs pa e bebe. Kisas e ta bisa ku e ta bebe djis pa trankilisá su mes, no pa bira burachi. Wèl, si nos tin mester di alkohòl pa nos por sinti nos trankil, anto ta tempu pa nos analisá nos kurason onestamente, i no lag’é gaña nos.

E amistatnan ku nos ta skohe.

Ta klaru ku nos no por evitá di tin kontakto ku hende ku no ta Testigu di Yehova, sea na skol, na trabou òf den sirbishi. Pero e asuntu ta kambia henteramente na momento ku nos kuminsá anda ku nan mas di lo nesesario i asta sera amistat íntimo ku nan. Akaso nos ta purba di hustifiká esei, rasonando ku nan tin bon kualidatnan? Beibel ta spièrta nos: “No laga hende gaña boso. Mal kompania ta daña bon kustumber.” (1 Kor. 15:33) Kòrda ku un tiki venenu so por kontaminá awa limpi; di igual manera, si nos tin amistat ku hende ku no ta sirbi Yehova, nos por bai atras spiritualmente i kuminsá imitá mundu su manera di pensa, bisti, papia i aktua.

Rekreo.

Teknologia moderno a pone ku awendia nos tin tur sorto di entretenimentu na nos alkanse, di kua hopi ta kuestionabel i asta malu pa un kristian. Pablo a bisa e promé kristiannan pa nan no papia mes di kosnan impuru. (Efe. 5:3) Pero kiko si nos ta gusta skucha òf wak kosnan impuru? Podisé nos ta hustifiká esei i bisa ku tur hende mester di un poko plaser den nan bida i ku loke nos ta skohe pa entretené nos mes ta un asuntu personal. Pero nos mester tuma e konseho di Pablo na serio i no wak ni skucha nada impuru.

Asta si nos a bira víktima di nos kurason engañoso i a kria e kustumber di hasi malu i hustifiká esei, nos por kambia. (Efe. 4:22-24) Laga nos wak dos ehèmpel di nos tempu.

Miguel * mester a kambia su aktitut pa ku kos material. El a bisa: “Ami ku mi kasá i nos yu hòmber ta bini di un pais kaminda ta masha importante pa bo tin lo último i lo mihó den teknologia i kosnan di luho. Dado momento, mi tabata pensa ku mi por a dediká mi bida na optené tur loke mundu ta ofresé, sin bira materialista.” No a dura muchu ku Miguel a bin realisá ku korementu tras di kos material ta puru banidat. P’esei el a pidi Yehova yud’é kambia su manera di pensa. Miguel a sigui bisa: ‘Mi a laga Yehova sa ku tantu ami komo mi famia ke sirbié di henter nos kurason. P’esei nos a disidí di simplifiká nos bida i muda bai biba kaminda tin mas nesesidat di predikadó di Reino. Poko despues, nos a kuminsá traha komo pionero. Nos a bin realisá ku un hende no mester di hopi kos material pa e por ta satisfecho i felis.’

Lee su eksperensia ta siña nos kon un saminashon onesto di nos mes por yuda nos stòp di anda ku mal amigu. Lee ta konta: “Debí na mi trabou, mi tabata sali regularmente ku kliente. Mi tabata sa ku na e reunionnan ei semper tin bebementu di mas, pero mi tabata gusta bai. Hopi biaha mi a hera di bira burachi, i despues mi tabata sinti duele di loke mi a hasi. Mi tabatin ku analisá mi kurason onestamente i pensa kiko mi ke hasi. E konseho di e Palabra di Dios i e sugerensianan di e ansianonan a yuda mi realisá ku loke mi tabata buska realmente ta amistat ku hende ku no ta stima Yehova. Awor, mi ta atendé mi asuntunan di negoshi mas tantu via telefòn i mi ta sòru pa masha poko biaha mi tin ku reuní ku e hendenan ku mi ta hasi negoshi kuné.”

Nos mester ta onesto ku nos mes i buska pa saka afó kiko realmente ta e intenshonnan di nos kurason. Kon nos por hasi esei? Nos por pidi Yehova yuda nos, pasobra “e konosé e sekretonan di kurason.” (Sal. 44:21) Yehova a proveé tambe su Palabra, ku por fungi manera un spil i yuda nos mira e klase di persona ku nos realmente ta. (Sant. 1:22-25) Yehova ta konsehá nos mediante nos publikashonnan i e reunionnan tambe. Tur e provishonnan balioso akí ta pa yuda nos protehá nos kurason i sigui hasi loke ta korekto.