1, 2. Dikon Dios mester a protehá e desendiente di e muhé?

E PROMÉ profesia registrá den Beibel, esta, e promesa ku Yehova a hasi den Hòfi di Edén, ta di sumo importansia pa kumplimentu di Su propósito. Ora Yehova a hasi e promesa ei, el a bisa: “Lo mi pone enemistat entre abo [esta, Satanas] i e muhé, i entre bo simia i su simia.” Awor, te kon leu e enemistat akí lo a yega? Yehova a bisa: “E [simia di e muhé] lo heridá bo kabes, i abo [esta, Satanas] lo heridá su hilchi di pia.” (Gén. 3:15) E enemistat entre Satanas i e muhé lo ta asina fuerte ku Satanas lo a hasi tur su posibel pa destruí e simia, òf desendiente, di e muhé.

² P’esei, no ta nada straño ku e salmista a hasi orashon pa e pueblo di Dios. El a bisa: “Mira, bo enemigunan ta borotá; i esnan ku ta odia bo a halsa nan mes. Nan ta traha plannan astuto kontra bo pueblo, i ta konspirá huntu kontra esnan ku bo ta protehá. Nan a bisa: ‘Laga nos ban kaba ku nan komo nashon.’” (Sal. 83:2-4) Satanas su meta tabata pa korumpí òf kaba ku e personanan ku a forma e liña di desendensia di e simia. P’esei, pa protehá e desendiente di e muhé  i pa garantisá ku Su propósito pa ku tera lo kumpli, Yehova mester a sera mas pakto.

3, 4. (a) Na ki tempu e pakto di Lei a drenta na vigor, i kiko e nashon di Israel a bai di akuerdo pa hasi? (b) Kiko e pakto di Lei mester a evitá?

³ Ku tempu, e desendientenan di Abraham, Isak i Yakòb a multipliká i bira miónes. I Yehova a hasi nan un nashon—e nashon di Israel di antigwedat. Yehova a sera un pakto spesial ku nan pa medio di Moises i a duna nan e Lei. I nan a bai di akuerdo pa kumpli ku e Lei. Beibel ta bisa: “[Moises] a kohe e buki di aliansa i a les’é pa e pueblo tende, i nan a bisa: ‘Tur loke SEÑOR a bisa, nos lo hasi, i nos lo ta obedesidu!’ Asina Moises a kohe e sanger i a sprengu esaki riba e pueblo, i a bisa: ‘Mira e sanger di e aliansa ku SEÑOR a sera ku boso konforme tur e palabranan akí.’”—Éks. 24:3-8.

⁴ Na aña 1513 promé ku Kristu, e pakto di Lei a drenta na vigor na Seru Sinaí. Pa medio di e pakto akí, e nashon di Israel di antigwedat a bira un pueblo masha spesial. Dios a bira ‘nan Hues, Dunador di Lei i Rei.’ (Isa. 33:22) Historia di Israel ta mustra kiko ta pasa ora hende obedesé òf desobedesé e normanan hustu di Dios. E Lei a prohibí e israelitanan di kasa ku pagano i di adorá diosnan falsu. Di e manera ei, e Lei lo a evitá ku e liña di desendensia di Abraham lo a ser korumpí. —Éks. 20:4-6; 34:12-16.

5. (a) Ki oportunidat e pakto di Lei a duna Israel? (b) Dikon Dios a rechasá Israel?

⁵ E pakto di Lei a inkluí tambe e areglo pa nombra saserdotenan pa sirbi na Israel. E saserdotenan ei a prefigurá un grupo di saserdote ku den futuro lo a trese mayor benefisio pa humanidat. (Heb. 7:11; 10:1) Pues, mediante e pakto di Lei, Israel tabatin e privilegio i e oportunidat úniko di bira ‘un reino di saserdote,’ basta nan a obedesé e leinan di Yehova. (Lesa Éksodo 19:5, 6.) Pero Israel no a obedesé Dios su leinan. Nan no a aseptá e Mesías, e parti prinsipal di Abraham su desendiente; mas bien, nan rechas’é. P’esei, Dios tambe a rechasá nan.

6. Kiko tabata e propósito di e Lei?

⁶ E echo ku e nashon di Israel no a keda fiel na Yehova i konsekuentemente no a bira un reino di saserdote no a nifiká ku e Lei tabata defisiente. E propósito di e Lei tabata pa protehá e desendiente di e muhé i yuda hende identifiká e Mesías. Pues, unabes ku Kristu a yega i a ser identifiká, e Lei a kumpli ku su propósito. P’esei, Beibel ta bisa ku “Kristu ta  fin di Lei.” (Rom. 10:4) Pero e pregunta ta awor: Ken lo forma parti di un reino di saserdote? Wèl, Yehova Dios a sera un otro pakto pa forma un nashon nobo.

7. Kiko Yehova a profetisá pa medio di Yeremías?

⁷ Hopi tempu promé ku e pakto di Lei a yega na su fin, Yehova a profetisá pa medio di profeta Yeremías ku lo El a sera “un aliansa nobo” ku e nashon di Israel. (Lesa Yeremías 31:31-33.) E aliansa, òf pakto, ei lo tabata diferente for di e pakto di Lei den e sentido ku no tabata nesesario mas pa hasi sakrifisio di bestia pa hende haña pordon di piká. Pero kon esei tabata posibel?

8, 9. (a) Kiko a bira posibel pa medio di e sanger di Hesus? (b) Ki oportunidat e personanan den e pakto nobo ta haña? (Wak e promé plachi.)

⁸ Siglonan despues, dia 14 di nisan di aña 33 di promé siglo, Hesus a instituí e Sena di Señor. Relashoná ku e kopa di biña, Hesus a bisa su 11 fiel apòstelnan: “E kopa akí ta representá e pakto nobo a base di mi sanger ku lo mi drama pa boso.” (Luk. 22:20) I segun e relato di Mateo, Hesus a bisa: “Esaki ta representá mi ‘sanger di e pakto,’ ku lo mi drama pa pordon di piká di hopi hende.”—Mat. 26:27, 28.

⁹ Pues, e pakto nobo a bira bálido ora Hesus a drama su sanger presioso komo sakrifisio. Hesus su sanger a hasi posibel tambe pa hende haña pordon di piká. Hesus no ta forma parti di e pakto nobo pasobra e no tin piká, pues e no tin mester di pordon. Pero Dios ta usa e sakrifisio di Hesus na benefisio di humanidat. Ademas, e ta usa su spiritu santu pa ungi algun persona fiel pa asina adoptá nan komo “yu.” (Lesa Romanonan 8:14-17.) I komo ku Dios ta konsiderá e kristiannan ungí komo personanan liber di piká, den un sentido nan ta manera su Yu Hesus, kende no tin piká. E kristiannan ungí lo bira “heredero huntu ku Kristu.” Ademas, nan lo tin e privilegio ku e nashon di Israel a pèrdè, esta, di bira ‘un reino di saserdote.’ Relashoná ku e ‘herederonan huntu ku Kristu,’ apòstel Pedro a bisa: “Boso ta ‘un rasa skohí, saserdotenan ku ta sirbi komo rei, un nashon santu, un pueblo pa un propiedat spesial, pa boso proklamá tur kaminda e kualidatnan ekselente’ di esun ku a yama boso for di skuridat na su lus maravioso.” (1 Ped. 2:9) Pues, e pakto nobo ta masha importante. E ta habri kaminda pa Hesus su disipelnan bira e parti sekundario di Abraham su desendiente, òf simia.

10. Na ki tempu e pakto nobo a drenta na vigor, i dikon ta te na e tempu ei?

¹⁰ Awor, na ki tempu e pakto nobo a drenta na vigor? E no a drenta na vigor na e Sena di Señor. Dikon nò? Pa e por a drenta na vigor, Hesus mester a drama su sanger i presentá e balor di esaki na Yehova den shelu. Ademas, esnan ku mester a bira “heredero huntu ku Kristu” mester a ser ungí ku spiritu santu. Pues, e pakto nobo a drenta na vigor na Pentekòste di aña 33 di promé siglo ora Hesus su fiel disipelnan a ser ungí ku spiritu santu.

11. Kon e pakto nobo a hasi posibel pa tantu hudiu komo personanan no-hudiu forma parti di Israel spiritual, i kuantu persona ta den e pakto nobo?

¹¹ For di momento ku Yehova a anunsiá pa medio di Yeremías ku lo El a sera un pakto nobo ku Israel, esei a nifiká ku  lo a yega un tempu ku e pakto di Lei lo no ta vigente mas. I e pakto di Lei a yega su fin ora e pakto nobo a drenta na vigor. (Heb. 8:13) E pakto nobo a habri kaminda pa tantu hudiu komo personanan ku no tabata hudiu bira heredero di e Reino di Dios pasobra awor hende tabata ser sirkunsidá di kurason, “pa medio di spiritu, i no pa medio di un lei skirbí.” (Rom. 2:29) Desde e tempu ei, Dios ta pone su leinan ‘den nan mente i skirbi nan riba nan kurason.’ (Heb. 8:10) Ta 144.000 persona ta forma parti di e pakto nobo. Nan ta forma e nashon nobo ku ta ser yamá “e Israel di Dios,” òf Israel spiritual.—Gal. 6:16; Rev. 14:1, 4.

12. Ki diferensia tin entre e pakto di Lei i e pakto nobo?

¹² Kiko ta e diferensia entre e pakto di Lei i e pakto nobo? Pa kuminsá, Yehova a sera e pakto di Lei ku e nashon di Israel i e pakto nobo el a sera ku Israel spiritual. Moises tabata mediadó di e pakto di Lei i Hesus ta e Mediador di e pakto nobo. Ámbos pakto a bira bálido mediante dramamentu di sanger: e pakto di Lei mediante sanger di bestia i e pakto nobo mediante e sanger di Hesus. Bou di e pakto di Lei, e nashon di Israel tabatin Moises komo nan lider, miéntras ku e personanan den e pakto nobo tin Hesus, e Kabes di e kongregashon, komo nan Lider.—Efe. 1:22.

13, 14. (a) Ki relashon tin entre e pakto nobo i e Reino? (b) Kiko ta nesesario pa Israel spiritual por goberná huntu ku Kristu den shelu?

¹³ Awor, ki relashon tin entre e Reino di Dios i e pakto nobo? Wèl, e pakto nobo ta produsí un nashon santu ku tin e privilegio di bira rei i saserdote den e Reino selestial. E nashon ei ta e parti sekundario di Abraham su desendiente. (Gal. 3:29) Pues, e pakto nobo ta konfirmá ku e pakto ku Dios a sera ku Abraham lo bira realidat.

¹⁴ Pero tin un aspekto di e Reino ku ainda mester ser establesé. Ta bèrdat ku e pakto nobo ta produsí Israel spiritual i ta duna garantia ku su miembronan, esta e ungínan, lo bira “heredero huntu ku Kristu.” Sinembargo, mester a sera un otro akuerdo, òf pakto, pa nan por uni ku Hesus den shelu i fungi komo rei i saserdote.

15. Ki pakto Hesus a sera ku su fiel apòstelnan?

¹⁵ Despues di a instituí e Sena di Señor, Hesus a sera un pakto ku su fiel disipelnan, e pakto di Reino. (Lesa Lukas 22:28-30.) Distinto for di e otro paktonan ku Yehova a sera, ta Hesus a sera e pakto akí. Pues, esaki ta un akuerdo personal entre Hesus i su siguidónan ungí. Ora Hesus a bisa: “Meskos ku mi Tata a sera un pakto ku mi,” aparentemente e tabata referí na e pakto ku Yehova a sera kuné pa e ta “un saserdote pa semper na e manera di Melkísedèk.”—Heb. 5:5, 6.

16. Ki privilegio e pakto di Reino ta duna kristiannan ungí?

¹⁶ E 11 fiel apòstelnan a ‘keda leal na Hesus durante [tur] su pruebanan.’ E pakto di Reino a sigurá nan ku nan lo a sinta riba trono pa sirbi komo rei i saserdote huntu ku Hesus den shelu. Pero no ta e 11 personanan ei so a haña e privilegio ei. Hesus a aparesé na apòstel Huan den un vishon i a bisa: “Lo mi laga esun ku sali viktorioso sinta huntu ku mi riba mi trono, meskos ku ami a vense i a sinta huntu ku mi Tata riba su trono.” (Rev. 3:21) Pues Hesus a sera e pakto di Reino ku e 144.000 kristiannan ungí. (Rev. 5:9, 10; 7:4) E pakto akí ta duna nan e  derecho di goberná huntu kuné den shelu. Ta meskos ku ora un brùit kasa ku un rei ku ta na mando; debí na esei, e tambe ta haña derecho pa goberná huntu ku e rei. De echo, Beibel ta referí na e kristiannan ungí komo “e brùit” di Kristu, “un bírgen puru” komprometí pa kasa ku Kristu.—Rev. 19:7, 8; 21:9; 2 Kor. 11:2.

17, 18. (a) Duna un resúmen breve di e seis paktonan ku nos a trata relashoná ku e Reino. (b) Dikon nos por tin un fe sólido ku e Reino lo kumpli ku Dios su propósito?

¹⁷ Tur e paktonan ku nos a trata den e dos artíkulonan akí, di un òf otro manera, ta relashoná ku e Reino di Dios. (Wak e kuadro “E Manera Ku Dios Lo Kumpli ku Su Propósito.”) E paktonan akí ta duna garantia sólido ku e Reino di Dios lo kumpli ku Dios su propósito. Pues, nos por tin fe, òf pleno konfiansa, ku Dios lo usa e Reino Mesiániko pa kumpli ku su propósito pa ku tera i humanidat.—Rev. 11:15.

¹⁸ No tin duda, e Reino ta e úniko solushon pa hende su problemanan. Nos tin pleno konfiansa ku lo e trese bendishonnan eterno pa humanidat. P’esei, laga nos sigui prediká ku zelo i konta hende e maravioso bèrdat akí!—Mat. 24:14.