Segun Hosue 6:10-15 i 20, e ehérsito israelita a marcha rònt di Yériko durante seis dia, un biaha pa dia. I riba e di shete dia, nan a marcha shete biaha rònt di e stat, i despues Dios a pone e murayanan grandi di Yériko basha abou. Asina e sòldánan israelita a logra drenta e stat i konkist’é. Tin pruebanan arkeológiko ku por komprobá ku en bèrdat Yériko a keda konkistá den apénas un par di dia?

E ehérsitonan di antigwedat tabatin e kustumber di rondoná statnan fortifiká di manera ku ningun hende no por a drenta ni sali. Mas largu e sitiamentu a dura, ménos kuminda lo a sobra den e stat. Anto ora ku finalmente nan a konkistá e stat, e konkistadónan tabata plùnder henter e stat i bai ku tur loke tabata di balor i tambe loke a sobra na kuminda. No opstante, den e ruinanan di Yériko arkeólogonan a haña un gran kantidat di kuminda. E revista Biblical Archaeology Review a bisa ku ‘ademas di fragmento di klei, nan a haña hopi grano den e ruinanan di e stat.’ Segun e revista, esaki tabata un deskubrimentu úniko. Dikon? Pasobra normalmente arkeólogonan tabata haña kisas un òf dos poron di grano pero nunka un kantidat asina grandi.

Segun e relato di Beibel, e israelitanan no a bai ku nada di e grano di Yériko pasobra Yehova a bisa nan pa no hasi esei. (Hos. 6:17, 18) Ademas, e israelitanan a ataká Yériko durante lènte, nèt despues di e temporada di kosecha, ora ku tabatin abundansia di grano den e stat. (Hos. 3:15-17; 5:10) E echo ku a sobra asina tantu grano na Yériko ta duna prueba ku e israelitanan a konkistá e stat ei den apenas un par di dia, manera Beibel ta indiká.