Estelle * i su yunan tabata bai nan iglesia regularmente. Un dia el a bisa su pastor ku e ke komprondé Beibel, pero nunka e pastor a hasi kaso i Estelle a stòp di bai iglesia. El a konta: “E lidernan di e iglesia a skirbi mi un karta i básikamente nan a bisa mi ku si mi no por bini iglesia, sikiera manda mi donashon. M’a mira klaramente ku e úniko kos ku tabata importá nan tabata mi plaka.”

Angelina, kende semper tabata un persona religioso, a bisa: “Na mi iglesia nan tabata pasa kolèkt tres bes durante e sirbishinan, i nan a ferwagt pa nos kontribuí tur biaha. Tur ora bai nan tabata pidi sèn. M’a pensa: ‘E hendenan akí no por tin e spiritu di Dios.’”

Bo konosé religion ku ta pone preshon riba hende pa, sea direktamente òf indirektamente, duna kontribushon? Esei ta na armonia ku Beibel?

Hesus, e fundador di kristianismo, a bisa: “Boso a risibí pòrnada, duna pòrnada.” (Mateo 10:8) Pues, e mensahe balioso di Beibel no ta kos di bende; e mester ta disponibel pa tur hende.

Kon e promé kristiannan a kubri e gastunan di kongregashon?

Kada un a kontribuí “manera el a disidí den su kurason, no di mala gana, ni fòrsá, pasobra Dios ta stima hende ku ta duna ku alegria.” (2 Korintionan 9:7) Apòstel Pablo tabata traha tènt pa asina e por a kubri e gastunan di su ministerio. (Echonan 18:2, 3) El a bisa: “Nos tabata traha di dia i anochi pa nos no pone un karga pisá riba ningun di boso ora nos tabata prediká e bon notisia di Dios na boso.”—1 Tesalonisensenan 2:9.

Testigunan di Yehova ta tene nan reunionnan den edifisionan simpel ku nan ta yama Salòn di Reino. Kon nan ta kubri e gastunan? Nan no ta pasa kolèkt ni parti ènvelòp pa pidi donashon. Mas bien, ken ku ta apresiá e instrukshon spiritual ku e ta haña na e reunionnan por tira un donashon diskretamente den e kahanan di kontribushon di e salòn.

Aunke ta kosta sèn pa imprimí i distribuí e revista akí, hamas lo bo mira aviso di propaganda òf pidimentu di plaka den dje. Su propósito ta pa yuda hende komprondé e bèrdatnan di Beibel.

Kiko bo ta pensa: E manera di kubri gastu akí ta kuadra ku loke Hesus a bisa i ku e ehèmpel di e promé kristiannan?