NOE i su famia a hala masha serka di otro den e arka miéntras ku awa tabata kai masha duru mes. Nan tabata sintá den skuridat banda di un lampi di zeta; nan tabata tur spantá segun ku nan ta tende áwaseru ta basha riba dak i ta dal na e bandanan di e arka. Awa tabata kai asina duru ku e mester tabata hasi hopi bochincha.

Segun ku Noe tabata wak kara di su esposa i su tres yunan fiel ku nan kasánan, sin duda, lo el a keda masha gradisidu. Durante e tempu difísil ei, probablemente Noe a sintié aliviá ku su sernan kerí tabata sano i salvo huntu kuné den e arka. Siguramente lo el a hasi un orashon huntu ku su famia pa gradisí Dios, i debí na e bochincha, lo e mester a hisa su bos pa nan por a tend’é.

Noe tabata un hòmber ku un fe fuerte; p’esei su Dios, Yehova, a protehá tantu e komo su famia. (Hebreonan 11:7) Pero nan no tabatin mester di fe mas ora áwaseru a kuminsá kai? Al kontrario, nan tabatin mester di e kualidat ei mas ku nunka pa nan por a enfrentá e difikultatnan ku tabata spera nan. Nos tambe tin mester di fe den e tempu trabahoso akí. Pues, laga nos wak kiko nos por siña for di e ehèmpel di Noe.

Áwaseru a sigui basha riba tera “kuarenta dia i kuarenta nochi.” (Génesis 7:4, 11, 12) I e nivel di awa a keda subi mas i mas. Segun ku esei tabata sosodé, Noe por a mira kon Yehova tabata protehá hende hustu i na mes momento kastigá e malbadonan.

E Diluvio a pone fin na un rebelion ku a lanta entre e angelnan. Bou di influensia di Satanas su aktitut egoista, hopi angel a disidí di “bandoná nan propio lugá di biba” den shelu pa biba ku hende muhé aki riba tera i a haña yu ku a bira gigante, konosí na e idioma original komo nèfilim. (Hudas 6; Génesis 6:4) Satanas sin duda a alegrá ora el a mira kon e rebelion ei a sigui korumpí hende, esta, e obra maestro di Yehova su kreashon riba tera.

Sinembargo, segun ku e awa di e Diluvio a sigui subi, e angelnan malbado mester a bandoná nan kurpa di karni i sanger i regresá na e region spiritual. Nunka mas Dios no a permití e angelnan ei tuma kurpa humano. Nan a bai laga nan kasá i yunan kendenan a muri den e Diluvio huntu ku tur e otro hendenan ku tabata riba tera.

For di tempu di Enok, kasi shete siglo promé ku e Diluvio, Yehova a duna spièrtamentu ku lo E destruí tur hende malbado. (Génesis 5:24; Hudas 14, 15) Pero, for di e tempu ei padilanti, hende a bira mas pió; nan a kousa daño na e tera i a yen’é ku violensia. P’esei, Yehova a destruí nan. Akaso Noe i su famia a alegrá ora Yehova a destruí e malbadonan?

Nò! I nan Dios miserikòrdioso tampoko no a alegrá. (Ezekiel 33:11) Yehova a hasi tur loke tabata posibel pa salba mas tantu hende. El a manda Enok spièrta e hendenan i a bisa Noe pa traha e arka. Pa dékadanan, Noe ku su famia a traha riba e proyekto inmenso ei, i tur hende por a mira kiko nan tabata hasi. Es mas, Yehova a duna Noe e mandato pa sirbi komo “predikadó di hustisia.” (2 Pedro 2:5) Meskos ku Enok, Noe a spièrta hende di e huisio binidero. Kon e hendenan a reakshoná? Hesus, kende tabata den shelu i a mira loke a sosodé, a  bisa siglonan despues: “Nan no a hasi kaso te ora e Diluvio a bini i lastra nan tur bai kuné.”​—Mateo 24:39.

Bo por imaginá kon e situashon tabata pa Noe i su famia despues ku Yehova a sera e porta di e arka? Durante e promé 40 dianan, segun ku áwaseru tabata basha riba e arka dia tras dia, e ocho personanan akí probablemente a establesé un rutina. Nan tabatin ku perkurá pa otro, tene e lugá limpi i sòru pa tur e bestianan. Pero, na dado momento, e arka a kuminsá sagudí i a kuminsá move. E awa a sigui subi i a lanta e arka mas i mas te ku “el a keda mas haltu ku e tera.” (Génesis 7:17) Ki un muestra impreshonante di e poder di Yehova, e Dios Todopoderoso!

Noe mester tabata masha gradisidu ku Yehova a protehá tantu e komo su famia i tambe pa e echo ku Dios tabata asina miserikòrdioso ku el a usa nan pa spièrta tur e hendenan ku a muri pafó di e arka. Por a parse ku e trabou duru ku nan a hasi durante tur e añanan ei no tabata bale la pena. E hendenan no tabata ke skucha. Pensa riba esaki un ratu: Noe probablemente tabatin ruman hòmber i ruman muhé, primu i prima, subrino i subrina kendenan tabata na bida promé ku e Diluvio, pero tòg ta su famia mas yegá so a hasi kaso di e spièrtamentu ei. (Génesis 5:30) Ora ku e ocho personanan ei tabata sano i salvo den e arka, sin duda nan a haña konsuelo pensando riba tur e tempu ku nan a dediká na yuda hende haña un oportunidat pa sobrebibí.

For di e tempu di Noe te awor, Yehova no a kambia. (Malakías 3:6) Hesukristu a splika ku nos tempu lo ta meskos ku “e dianan di Noe.” (Mateo 24:37) Nos ta biba den un tempu remarkabel, un tempu yen di problema ku lo kaba ora Dios pone un fin na e mundu korupto akí. Awe tambe, e pueblo di Dios ta spièrta tur hende ku ke skucha e mensahe di Dios. Lo bo hasi kaso di e mensahe ei? I si bo a aseptá e mensahe di salbashon akí, lo bo ke djòin nos den kompartié ku otro hende? Noe ku su famia a laga un bon ehèmpel pa nos tur.

Segun ku e arka tabata drif riba e laman brutu, e personanan den e arka sigur lo a tende e zonido di  krakmentu di e biganan di e arka. Akaso Noe tabata preokupá ku e olanan grandi lo a hasi daño na e struktura di e arka? Nò! Ta hende den nos tempu kisas lo duda ku e struktura lo por a wanta, pero Noe sí no a duda. Beibel ta bisa: “Pa medio di fe Noe . . . a traha un arka.” (Hebreonan 11:7) Den kiko Noe tabatin fe? E tabatin fe den un pakto, esta, un kombenio, den kua Yehova a primintí ku lo e protehá Noe i su famia durante e Diluvio. (Génesis 6:18, 19) Esun ku a krea universo, planeta Tera i tur kos bibiente riba dje no por a sòru pa e arka keda intakto? Ta klaru ku e por a hasi esei. Noe tabatin tur rason pa konfia ku Yehova lo kumpli ku Su promesa. I esei ta eksaktamente loke a sosodé: Noe i su famia “a pasa sano i salvo dor di e awanan di diluvio.”​—1 Pedro 3:20.

Finalmente, despues di 40 dia i 40 anochi, áwaseru a stòp di kai. Segun nos kalènder, esei lo a tuma lugá na desèmber di aña 2370 promé ku Kristu. Pero, e aventura di e famia den e arka no a kaba einan. E arka yen di kriatura a keda drif riba e laman inmenso ku a tapa e tòp di tur e serunan kompletamente. (Génesis 7:19, 20) Nos por imaginá kon Noe a repartí e trabounan mas pisá entre e ku su yu hòmbernan Sèm, Kam i Jafet pa nan por a alimentá tur e bestianan i sòru pa nan keda limpi i bon di salú. Ta klaru ku Yehova Dios, kende a hasi tur e kriaturanan salbahe mansu pa nan por a drenta e arka, por a perkurá pa nan keda mansu tambe durante e Diluvio. a

Noe a tene un registro konfiabel di tur e susesonan. E registro ei ta menshoná ki dia áwaseru a kuminsá kai i ki dia el a stòp. E ta menshoná tambe ku mundu a keda kompletamente bou di awa pa 150 dia. Finalmente, e awa a kuminsá baha. Riba un dia históriko, na luna di aprel di aña 2369 promé ku Kristu, e arka a keda pegá riba “e serunan di Ararat,” ku ta keda den un region di Turkia di awendia. I tabata na luna di yüni, 73 dia despues, ku tòp di e serunan di mas haltu a bira visibel. Tres luna despues, na sèptèmber, Noe a disidí di kita un parti di e dak di e arka. Tur e trabou ei tabata bale la pena ya ku nan a haña klaridat i aire fresku. Promé ku esei, Noe a kuminsá wak si e tera tabata bon kaba pa biba riba dje; pa kuminsá el a manda un raf, pero esaki tabata bai bin komo ku e no por a haña un lugá pa sosegá. Despues, Noe a manda un palomba ku a bai bin un par di biaha te ora ku el a haña un lugá pa traha su nèshi.—Génesis 7:24–8:13.

Sin duda, e kosnan spiritual tabata mas importante pa Noe ku tur otro kos. Nos por imaginá ku Noe i su famia tabata bini huntu regularmente pa hasi orashon i pa papia tokante nan Tata selestial ku tabata kuida nan. Noe a dependé riba Yehova pa tur desishon importante ku e mester a tuma. Asta ora Noe a mira ku finalmente e tera “tabata seku”—despues ku nan a pasa mas ku un aña den e arka—tòg e no a disidí di habri e porta di e arka pa nan tur sali pafó. (Génesis 8:14) El a warda te ora Yehova a bis’é pa sali.

Kabesnan di famia por siña hopi for di e ehèmpel di Noe. E hòmber fiel akí tabata bon organisá, diligente, e tabatin pasenshi i tabata traha na bienestar di tur esnan bou di su kuido. Pero e kos mas importante p’e tabata pa hasi e boluntat di Yehova Dios. Si nos imitá e fe di Noe den e aspektonan akí, esei lo resultá den hopi bendishon pa tur nos sernan kerí.

Finalmente, Yehova a duna Noe e mandato: “Sali for di e arka, abo i bo esposa i bo yu hòmbernan i esposanan di bo yu hòmbernan huntu ku bo.” Noe i su famia a obedesé Dios i a sali huntu ku tur e bestianan. Pero nos no mester pensa ku nan a sali di un manera kaótiko. Beibel ta bisa ku “segun nan sorto, [nan] a sali for di e arka.” (Génesis 8:15-19) Ora Noe i su famia tabata pafó, nan por a disfrutá di e aire fresku i a wak e serunan di Ararat tur rònt di nan. Nan tabatin dilanti nan un tera limpi limpi: sin nèfilim, sin violensia, sin angel rebelde i sin hende malbado. b Por fin humanidat tabatin e oportunidat pa kuminsá un bida nobo.

Noe tabata sa kiko e mester hasi. Pa kuminsá, el a traha un altar pa rindi adorashon na Dios. El a  usa algun di e bestianan ku tabata limpi den bista di Dios—manera esnan ku nan a hiba den e arka den grupo di “shete”—pa sakrifiká komo un ofrenda kimá na Yehova. (Génesis 7:2; 8:20) Yehova a keda kontentu?

Beibel ta kontestá e pregunta ei ku e palabranan alentador akí: ‘Yehova a sinti un holó dushi.’ Sí, Yehova no a sinti e doló di kurason mas ku e tabata sinti ora hende a yena e tera ku violensia. Mas bien, el a sinti un alegria di mira un famia di adoradó fiel ku tabata determiná pa hasi su boluntat. Pero, Yehova no a spera perfekshon di nan, pasobra e mesun teksto sitá aki riba ta sigui bisa: “E intenshon di kurason di hende ta malu for di su hubentut.” (Génesis 8:21) Laga nos wak kon Yehova a sigui demostrá pasenshi i kompashon na humanidat.

Dios a maldishoná e tera despues di e rebelion di Adam ku Eva. P’esei no tabata fásil pa nan kultivá e tera. Pero dado momento, Dios a kita e maldishon ei. Lamèk, e tata di Noe, a profetisá ku su yu lo guia humanidat na un tempu di deskanso, es desir, un tempu ku e tera lo no ta maldishoná mas. Lamèk a duna su yu e nòmber Noe ku probablemente ta nifiká “Deskanso” òf “Konsuelo.” Noe mester a keda masha kontentu ora el a haña sa ku e lo a mira e profesia ei kumpli i ku djei padilanti lo tabata muchu mas fásil pa kultivá e tera. No ta nada straño anto ku mesora Noe a kuminsá planta!—Génesis 3:17, 18; 5:28, 29; 9:20.

Na mesun tempu, Yehova a duna tur e desendientenan di Noe algun lei masha kla i simpel pa guia nan den bida, entre otro, pa no mata i pa no hasi mal uso di sanger. Ademas, Dios a sera un pakto ku humanidat den kua el a primintí ku nunka mas lo e kaba ku tur bida riba tera pa medio di un diluvio. Komo prueba ku e lo kumpli ku su promesa, Yehova a laga hende mira un fenómeno natural maravioso den shelu, esta, e regenbog. Te awe, kada regenbog ku nos mira ta rekordá nos di e bunita promesa ei ku Yehova a hasi.​—Génesis 9:1-17.

Si e historia di Noe tabata djis un kuenta anto lo el a kaba einan, esta ku e regenbog. Pero, Noe tabata un hòmber ku realmente a eksistí, i su bida no tabata fásil. Den e tempu ei hende tabata biba hopi mas largu ku awor, i Noe no tabata un eksepshon, el a biba 350 aña despues di e Diluvio, i durante e siglonan ei, el a pasa den hopi sufrimentu. Por ehèmpel, na un okashon, Noe a kometé un piká serio ora el a bira burachi. Su nietu Kanan a probechá di e situashon i a kometé un piká mas serio ainda, un pika ku tabatin konsekuensia teribel pa e desendientenan di Kanan. Ademas, Noe a biba bastante largu pa mira entre otro ku e tera a yena ku violensia den e dianan di Nimròd i kon su desendientenan a kuminsá adorá dios falsu. Pero ta klaru ku Noe a mira kosnan positivo tambe, entre otro, el a mira ku su yu Sèm a pone un ekselente ehèmpel di fe pa su famia.​—Génesis 9:21-28; 10:8-11; 11:1-11.

Meskos ku Noe, nos tin ku keda fiel pase loke pase. Maske hende rònt di nos no ta hasi kaso di e spièrtamentu ku e Dios berdadero ta duna òf ta stòp di sirbié, nos sí tin ku sigui e ehèmpel di Noe. Yehova ta apresiá mashá ora nos ta fiel i ta perseverá. Manera Hesus a bisa: “Esun ku perseverá te na fin ta esun ku lo ser salbá.”—Mateo 24:13.