Eric: Pa mi ta franko ku bo, mi no ta un hende religioso. P’esei, mi no ta kere ku nos tin muchu kos di papia.

Brian: Danki pa bisa mi. Mi nòmber ta Brian. I di bo?

Eric: Eric.

Brian: Muchu gustu, Eric.

Eric: Di mi parti tambe.

Brian: Mi ke puntra bo algu: Bo a lanta den un famia religioso?

Eric: Sí, pero ora mi a kuminsá bai universidat, mi a stòp di bai misa.

Brian: M’a komprondé. I kiko bo a studia na universidat?

Eric: Siensia sosial i historia. Semper mi a gusta historia, esta, kon sosiedat humano a desaroyá atraves di historia.

Brian: Historia ta un tópiko fasinante. Manera lo bo sa, Beibel ta un buki di historia. Bo a yega di analisá loke e ta bisa?

Eric: Nò, bo sa. Mi sa ku Beibel ta un bon buki, ma nunka mi no a mir’é komo un buki históriko.

Brian: Bo ta parse mi un hende ku tin un mente habrí. Si bo tin un par di minüt, mi ke djis mustra bo kon Beibel ta kuadra ku historia.

Eric: Sigur no. Ma mi no tin un Beibel.

Brian: No ta problema. Mi por mustra bo den mi mes Beibel. E promé ehèmpel ta di 1 Krónikanan kapítulo 29, versíkulo 26 i 27. Ei e ta bisa: “Asina David, yu hòmber di Isaí, a reina riba henter Israel. I e temporada ku el a reina riba Israel tabata kuarenta aña; el a reina shete aña na Hebròn i trint’i tres aña na Herúsalèm.”

Eric: Pero, kiko bo ke bisa ku esaki?

Brian: Wèl, un tempu algun hende tabata bisa ku Rei David nunka no a eksistí.

Eric: Bèrdat? Dikon nan tabata duda?

Brian: Pasobra te asina leu ta Beibel so tabata hasi menshon di dje. Ma na aña 1993, un tim di arkeólogo a deskubrí un pida piedra ku un palabra riba dje ku tradusí ta nifiká “Kas di David.”

Eric: Interesante!

Brian: Un otro persona menshoná den Beibel ku hende a duda ku el a eksistí tabata Ponsio Pilato, un gobernador den tempu di Hesus. E ta ser menshoná aki na Lukas kapítulo 3, versíkulo 1, entre vários otro funshonario di gobièrnu di e époka ei.

Eric: Sí, mi ta mir’é aki. E ta bisa ku “tempu Ponsio Pilato tabata gobernador di Hudea, Heródes tabata gobernante di distrito di Galilea.”

Brian: Korekto. Pa hopi aña algun eksperto riba tereno di Beibel a duda ku Ponsio Pilato a  eksistí. Pero, mas o ménos 50 aña pasá nan a deskubrí un piedra na Medio Oriente ku su nòmber grabá riba dje.

Eric: Ahn sí? Nunka mi no a tende di esei.

Brian: Ta p’esei mi ta kontentu pa kompartí e informashon akí ku bo.

Eric: Pa ta franko ku bo, semper mi a mira Beibel komo un obra literario; ma mi no ta kere ku e por yuda nos mashá. E por ta kuadra ku historia, pero mi n’ ta kere ku e ta práktiko pa nos tempu.

Brian: Mi tin sigur ku hopi hende ta pensa meskos ku bo. Pero ami ta wak e otro. Bo sa dikon? Esei ta pasobra e nesesidatnan básiko di hende no a kambia for di prinsipio te awor. Por ehèmpel, semper nos tabatin mester di kuminda, paña i un dak riba nos kabes. I semper nos a sinti e nesesidat pa komuniká ku otro hende i pa por tin un bida di famia felis. Tur ta kosnan ku nos ta balorá, no ta bèrdat?

Eric: Bo tin rason.

Brian: Beibel por yuda nos ku tur e kosnan akí. Nos por bisa ku e ta un buki antiguo pero práktiko pa nos tempu.

Eric: Kon bo ke men?

Brian: Laga mi pon’é asin’akí: Aunke Beibel a ser skirbí hopi siglo pasá, e prinsipionan fundamental ku e ta kontené ta aplikabel te awe.

Eric: Oké, den ki área asina?

Brian: Por ehèmpel, prinsipionan di Beibel por yuda nos haña un punto di bista balansá di plaka, hiba un bida di famia felis i ser un bon amigu. E ta manera un mapa ku por guia nos riba nos kaminda di bida. Bo no ta haña ku awe no ta fásil pa bo por ta un bon esposo i kabes di famia?

Eric: Bèrdat, ei sí bo tin un punto. Mi tin un aña kasá i no ta semper ami ku mi esposa ta riba e mesun liña.

Brian: Ta esei ta e reto. Pero Beibel ta kontené konseho práktiko ku por yuda nos. Laga nos wak un ehèmpel na Efesionan kapítulo 5. Nos por lesa versíkulo 22, 23 i 28. Bo por lesa nan?

Eric: Sigur no! E ta bisa: “Laga esposanan ta sumiso na nan esposo, manera nan ta sumiso na Señor, pasobra e esposo ta kabes di su esposa meskos ku Kristu ta kabes di e kongregashon, esta, su kurpa, di kua e ta salbador.” Anto 28 ta bisa: “Di e manera akí, esposonan mester stima nan esposa manera nan mes kurpa. Esun ku ta stima su esposa ta stima su mes.”

Brian: Bon. Danki. Si tur dos partner trata di apliká e konseho simpel akí, bo no ta kere ku nan bida di famia lo mehorá?

Eric: Sí, mi por imaginá mi. Pero ta mas fásil pa bisa ku pa hasi.

Brian: Esei ta bèrdat; niun hende no ta perfekto. Den e mesun kapítulo ei di Beibel tin un teksto ku ta konsehá nos pa ta rasonabel. * Den tur relashon ta importante pa nos keda balansá i dispuesto na sede. Beibel a yuda ami ku mi kasá haña e balansa ei.

Eric: Mi ta mira kiko bo ke men.

Brian: Testigunan di Yehova tin un website ku tin konseho práktiko pa bida kasá i bida di famia. Si bo tin un par di minüt, mi por mustra bo loke e tin di ofresé.

Eric: Bon, mi tin un tiki tempu.

Brian: Oké. Nos website ta www.pr2711.com/pap i esaki ta su página inisial.

Eric: E esenanan ta bunita.

Brian: Eseinan ta duna bo un idea di e trabou di prediká ku nos ta hasi rònt mundu. Aki bo ta haña un tab di “Publikashon.” Bou di dje, bo ta haña revista nobo i otro publikashonnan ku ta  trata diferente tópiko, manera bida di famia. Por ehèmpel, laga nos wak e foyeto Dios Tin Bon Notisia pa Nos! Un di su lèsnan tin e tema: “Kon Bo Por Tin un Famia Felis?”

Eric: Esei ta un tópiko interesante. Mi tin gana di sa e kontesta.

Brian: E lès akí ta menshoná vários punto ku por yuda bo pa bo por tin un matrimonio felis. Wak e paragraf akí, bou di pregunta 2. Bo por lesa e último dos frasenan?

Eric: Sí, e ta bisa: “Esposo i esposa mester stima otro i respetá otro. Komo ku nan ta imperfekto, nan mester siña pordoná otro si nan ke pa nan matrimonio ta felis.” Hmm, mi ta eens ku esei.

Brian: Danki pa a les’é. Un di e tekstonan di Beibel menshoná aki ta Efesionan 5:33. Mi tin mi Beibel aki. Bo por lesa esaki tambe?

Eric: Oké. E ta bisa: “Laga kada un di boso stima su esposa manera e ta stima su mes; di otro banda, e esposa mester tin rèspèt profundo pa su esposo.”

Brian: Bo a ripará ku e énfasis ta riba duna loke kada un ta ferwagt di risibí di e otro?

Eric: Kon bo ke men?

Brian: Wèl, e hòmber ke sinti ku su kasá ta respet’é, no ta bèrdat? I e esposa, na su turno, lo no ke ta sigur ku su kasá ta stim’é?

Eric: Konpolaga.

Brian: Si e esposo ta hasi kos ku ta mustra ku e ta stima su kasá, lo ta mas fásil pa su kasá respet’é.

Eric: Korekto.

Brian: Aunke e konseho akí a ser skirbí kasi 2.000 aña pasá, te ainda e ta útil tantu pa esposo komo esposa. Si nan tur dos aplik’é, nan lo haña bon resultado.

Eric: Mi tin ku atmití ku Beibel tin mas aden ku loke mi a kere.

Brian: Mi ta kontentu di tende esei, Eric. Lo mi tin gana di bini bèk pa tende bo opinion riba e di tres pregunta: “Bo mester pone fin na un matrimonio ku no ta felis?” den e mesun lès di e foyeto ei riba nos website. *

Eric: Ta bon. Mi ta warda bo. Ami ku mi kasá lo wak e huntu ora nos haña un chèns.