“Tin hopi problema di salú mental entre hóbennan awendia. Anto ret sosial ta un di e kousanan mas grandi di e problemanan akí.”—Dr. Vivek Murthy, hefe di departamento di salubridat públiko na Merka, New York Times, 17 di yüni 2024.

 Kon mayornan por protehá nan yunan kontra e peligernan di ret sosial? Beibel ta duna bon konseho.

 Pensa riba e siguiente konsehonan ku Beibel ta duna.

 “Un persona sabí ta pensa bon promé ku e dal un paso.”—Proverbionan 14:15.

 Ret sosial por tin mal influensia riba bo yunan. P’esei, ta importante pa pensa bon promé ku bo laga bo yunan usa ret sosial. Pues, no tuma un desishon purá purá. Tin algun kos ku bo mester sa tokante bo yunan promé ku bo laga nan usa ret sosial: Nan por tene nan mes na regla tokante kuantu tempu nan tin mag di usa ret sosial? Nan sa kon pa mantené bon amistat ku nan amigunan en persona? I nan amigunan no ta online so? Nan sa ku nan tin ku evitá entretenimentu ku no ta bon?

•   E siguiente artíkulonan na spañó tin bon konseho tokante uso di ret sosial: “Ta Bon Idea pa Mi Yunan Usa Ret Sosial?” i “Siña Bo Yunan Tiner Tokante e Peligernan di Ret Sosial.”

 “[Usa] boso tempu di e mihó manera.”—Efesionan 5:16.

 Si bo laga bo yunan usa ret sosial, ta bon pa pone regla tokante e manera ku nan lo usa ret sosial. Ademas, splika nan kon e reglanan ei lo protehá nan. Segun ku bo yunan ta usa ret sosial, sigui wak kon ret sosial ta afektá nan. Si bo ripará ku e ta afektá nan komportashon, kisas ta nesesario pa limitá nan uso di ret sosial.

•   Usa e vidio Usa Ret Sosial na un Manera Sabí pa yuda bo yunan mira dikon ta importante pa sigui sierto regla relashoná ku uso di ret sosial.

 Beibel ta bisa ku nos ta biba den “tempunan krítiko, difísil pa trata kuné.” (2 Timoteo 3:1-5) Es mas, e ta duna nos bon konseho ku por yuda nos trata ku e tempunan difísil ei. Den un artíkulo online tokante tiner ku problema di salú mental, mayornan i nan yunan por haña mas ku 20 artíkulo òf vidio basá riba Beibel ku por yuda nan.