Abo ta kore e rísiko di haña burnout (òf di bira demasiado kansá)? Si ta asina, e artíkulo akí por yuda bo!

•  Dikon bo ta haña burnout?

•  Dikon no ta bon pa kansa bo mes asina tantu?

•  Loke bo por hasi

•  Loke otro hóben ta bisa

•   Muchu kos di hasi. Un hóben ku yama Julie a bisa: “Den tur aspekto di nos bida nan ta bisa nos pa hasi algu mas mihó, pa nos bira mas ábil, pa nos pone meta superior i presta lo mihó ku ta posibel. Ta difísil pa ta konstantemente bou di e preshon ei!”

•   Teknologia. Ku smartphone, tablet i otro aparato elektróniko, nos ta disponibel bintikuater ora pa dia—loke ta duna nos strès i ku tempu burnout.

•   Keda sin drumi sufisiente. Un hóben ku yama Miranda a bisa: “Debí di skol, trabou i rekreashon, hopi hóben ta lanta trempan mainta i ta keda lantá te lat den anochi, lokual ta malu pa nan, pero ta parse ku nan ta keda den e mesun patronchi.” Esei ta hiba hopi biaha na un burnout.

 Beibel ta animá nos pa no sea floho. (Proverbionan 6:​6-8; Romanonan 12:11) Pero Beibel no ta animá nos pa traha di tal manera ku nos no ta sobra tempu i energia pa hasi nada otro den bida i ku asta nos salú ta bai atras.

 “Un biaha mi a ripará ku mi no a kome henter dia pasobra mi tabata asina enfoká riba tur loke mi mes a aseptá pa hasi. Mi a siña ku no ta sabí pa aseptá tur tarea​—a kosto di mi salú.”​—Ashley.

 Ku bon motibu, Beibel ta bisa: “Un kachó bibu ta mihó ku un leon morto.” (Eklesiástes 9:4) Ora bo pusha bo mes te na un límite, bo por pensa ku bo ta fuerte manera leon​—a lo ménos pa un tempu. Pero, kansa bo mes di mas, por tin konsekuensianan desastroso pa bo salú.

•   Siña bisa nò. Beibel ta bisa: “Sabiduria ta serka e humildenan.” (Proverbionan 11:2) Un hende humilde ta rekonosé su límite i no ta aseptá mas ku loke e por dil kuné.

   “Un hende ku por haña burnout fásil ta un hende ku no por bisa nò i ku ta aseptá tur trabou ku nan pidié hasi. Asina bo no ta modesto. Tardi òf trempan esei lo por hiba na un burnout.”​—Jordan.

•   Tuma tempu pa sosegá sufisiente. Beibel ta bisa: “Un man yen di sosiegu ta mihó ku dos moketa yen di trabou i korementu tras di bientu.” (Eklesiástes 4:6) Tin un dicho ku ta bisa: “Drumimentu ta kuminda pa bo selebro,” pero mayoria hóben no ta drumi e kantidat di ocho pa dies ora ku nan mester drumi anochi.

   “Ora mi programa tabata muchu yen, mi no tabata drumi sufisiente. Pero tin biaha ta nèt esun èkstra ora di drumi ei ta yuda mi pa e siguiente dia mi ta mas produktivo i kontentu.”​—Brooklyn.

•   Sea organisá. Beibel ta bisa: “E plannan di hende balente siguramente ta kondusí na abundansia.” (Proverbionan 21:5) Si bo siña kon pa organisá bo tempu i aktividatnan, esei lo ta un kualidat ku lo yuda bo henter bo bida.

   “Bo por evitá hopi strès ora bo ta traha un programa. Ora bo tin bo skema poní bo dilanti, ta fásil pa bo por mira unda bo tin ku hasi ahuste pa evitá di kansa bo mes demasiado.”​—Vanessa.