“Mi ta sinti mi kómodo ku mi grupo di amigu i ta hopi difísil pa mi bai buska mas amigu.”​—Alan.

 “Mi grupo di amigu ta hopi chikitu i mi gust’é asina. Mi no ta e tipo di hende ku ta bai buska mas amigu i papia ku hende ku mi no konosé.”​—Sara.

 Bo ta pensa meskos ku Alan i Sara? Bo tin un grupo di amigu ku bo ta hopi será kuné i bo ta sinti bo inkómodo pa buska amigu nobo?

 Si ta asina, e artíkulo akí ta pa bo!

•  E problema ku grupo di amigu

•  Loke bo por hasi

•  Loke otro hóbennan ta bisa

 No tin nada malu den tin un grupo di amigu ku bo ta hopi será kuné. Esei por duna bo e sintimentu ku bo ta pertenesé einan i ku bo amigunan ta aseptá bo pa e persona ku bo ta, aunke bo ta imperfekto.

 “Ta dushi ora bo ta parti di un grupo di amigu ku ta gusta asosiá ku bo. Ora bo ta yòn, bo ke pa otro hende aseptá bo.”​—Karen, 19 aña.

 Bo tabata sa? E 12 apòstelnan di Hesus tabata parti di su grupo grandi di amigu, pero tres di e apòstelnan, Pedro, Santiago i Huan, tabata su amigunan di mas íntimo.​—Marko 9:2; Lukas 8:51.

 Pero, asosiá ku solamente un grupo di amigu spesífiko i sera porta pa otro hende, por trese problema. Por ehèmpel:

•   Bo por pèrdè e oportunidat di haña otro bon amistatnan.

   “Si solamente bo tin amigunan ku ta meskos ku bo, bo ta pèrdè e oportunidat di tin eksperensianan nobo i di konosé hendenan great.”​—Evan, 21 aña.

•   Bo por laga parse ku bo ta sinti bo mas ku otro hende.

   “Si bo tin solamente un grupo di amigu ku bo ta asosiá kuné, bo por duna e impreshon ku bo no ke papia ku otro hende.”​—Sara, 17 aña.

•   Bo por kuminsá pèst otro hende.

   “Kisas individualmente lo bo no pèst un hende, pero si bo grupo di amigu ta hasié, e ora ei por parse normal, te asta prèt pa hasié.”​—James, 17 aña.

•   Bo por haña bo den problema, spesialmente si bo ke pertenesé na un sierto grupo kueste loke kueste.

   “Ta tuma solamente ún mal hende den e grupo pa pone henter e grupo hasi kos malu.”​—Martina, 17 aña.

•   Pensa riba kiko ta bo norma- i balornan.

   Puntra bo mes: ‘Ki norma i balor mi tin? Mi amigunan ta hasié mas fásil òf mas difísil pa mi biba di akuerdo ku mi norma- i balornan? Mi ta dispuesto pa keda amigu ku nan kueste loke kueste?’

   Prinsipio di Beibel: “Mal kompania ta daña bon kustumber.”—1 Korintionan 15:33.

   “Si bo grupo ta konsistí di hende ku no tin mesun norma i balor ku bo, bo por haña bo ta hasi kosnan ku hamas lo bo a hasi.”​—Ellen, 14 aña.

•   Pensa riba kiko ta mas importante pa bo.

   Puntra bo mes: ‘Mi ta sinti mi asina uní ku mi amigunan ku mi ta dispuesto pa laga mi norma- i balornan kai basta mi keda bon ku mi amigunan? Kiko lo mi hasi si un di mi amigunan hasi algu ku ta robes?’

   Prinsipio di Beibel: “Mi ta reprendé i disipliná tur esnan ku mi tin kariño p’e.”​—Revelashon 3:19.

   “Si un di bo amigunan hasi algu ku ta malu i bo no sa sigur na ken bo mester ta leal, podisé bo por pensa ku bo ta traishoná bo amigu si bo bisa algu.”​—Melanie, 22 aña.

•   Buska mas amigu.

   Puntra bo mes: ‘Lo ta bon pa mi buska mas amigu i asina konosé otro hende?’

   Prinsipio di Beibel: “No buska boso mes interes so, ma tambe interes di otro hende.”​—Filipensenan 2:4.

   “Tin biaha muchanan ku no ta popular kisas tin un bida di famia difísil. Unabes bo konosé nan, kasi semper lo bo haña sa ku di bèrdat nan ta great.”​—Brian, 19 aña.

 E punto ta: No tin nada malu den tin un grupo di amigu ku bo ta será kuné. Pero na mes momento lo bo benefisiá si bo buska mas amigu. Beibel ta bisa: “Esun ku duna di bebe tambe lo haña di bebe.”—Proverbionan 11:25.