Ken Maria Magdalena Tabata?
E kontesta ku Beibel ta duna
Maria Magdalena tabata un fiel siguidó di Hesukristu. Muy probablemente, el a haña su nòmber Magdalena for di e stat Magdala (kisas Magadan) ku ta serka di Laman di Galilea kaminda kisas Maria a biba un tempu.
Maria Magdalena tabata un di e muhénan ku a biaha ku Hesus i su disipelnan i a sostené nan materialmente. (Lukas 8:1-3) El a mira kon Hesus a ser matá i tabata un di e promé personanan ku a wak e despues di su resurekshon.—Marko 15:40; Huan 20:11-20.
Maria Magdalena tabata un prostituta?
Beibel no ta bisa ku Maria Magdalena tabata un prostituta. Loke sí Beibel ta bisa tokante Maria Magdalena ta ku Hesus a saka shete demoño for di dje.—Lukas 8:2.
Dikon hopi hende ta kere ku e tabata un prostituta promé ku el a bira un disipel di Hesus? Siglo despues ku Maria Magdalena a muri algun hende a bisa ku e tabata e muhé (ku probablemente tabata un prostituta) ku a laba Hesus su pia ku su lágrimanan i a seka nan ku su kabei. (Lukas 7:36-38) Sinembargo, no tin base bíbliko pa esaki.
Maria Magdalena tabata “apòstel di e apòstelnan”?
Nò. Iglesia Katóliko ta yama Maria, “Santa Maria Magdalena” i “apòstel di apòstelnan” pasobra e tabata un di e promé hendenan ku a trese notisia tokante Hesus su resurekshon pa e apòstelnan. (Huan 20:18) Pero esei no ta hasié un apòstel. Anto Beibel no ta duna nos niun motibu pa kere ku e tabata un apòstel.
Maria Magdalena tabata kasá di Hesukristu?
Nò. Bon mirá, Beibel ta bisa bon kla ku Hesus no tabata kasá. a
a Wak e artíkulo “Hesus Tabata Kasá? E Tabatin Ruman?”
Otro Artíkulo Interesante
PREGUNTA KU BEIBEL TA KONTESTÁ
Hende Muhé den Beibel—Kiko Nos Por Siña for di Nan?
Wak e kontraste entre algun hende muhé den Beibel ku a pone bon ehèmpel i hende muhé ku tabata malbado.
IMITÁ NAN FE
Maria Magdalena—“Mi A Mira Nos Señor”
E muhé fiel ei a haña e privilegio di hiba e bon notisia pa otro hende.
SIÑANSA DI BEIBEL
Nos Ta Animá Bo pa Sigui un Kurso di Beibel ku Nos
Sigui un kurso di Beibel interaktivo grátis ku un maestro.