Dòlfein ta saka un variedat di zonido manera klek i flùit, i despues e ta skucha pa tende nan eko pa e por nabegá i orientá den su ambiente. Inspirá pa e sonar natural di e dòlfein mular, òf tuimelaar (Tursiops truncates), algun sientífiko ta trahando riba un sistema akústiko, esta un sistema di zonido, pa usa bou di awa pa resolvé problema ku teknologia aktual no por solushoná.

 Pensa riba esaki: E sonar di e dòlfein ta yud’é lokalisá piská skondí bou di santu den fondo di laman, i ta yud’é distinguí un piska for di un piedra. Segun ku Keith Brown, un profesor ku ta traha na Universidat di Heriot-Watt, Edinburgh, Eskosia, “for di un distansia di dies meter un dòlfein por distinguí ki ora un kònteiner ta yená ku awa dushi, awa salu, stropi òf zeta.” E sientífikonan lo tin gana di traha algun aparato ku por hasi esei.

 Algun investigadó a analisá zonido i oido di dòlfein i a purba di imitá eseinan. E resultado tabata un aparato sonar yená ku elementonan elektróniko sofistiká hinká den un silinder di kasi un meter largu. E aparato akí ta konektá na un robòt supmarino ku ta parse un torpedo. Nan a diseñ’é pa inspekshoná fondo di laman, pa buska kabel òf pipa ku ta derá bou di santu i analisá nan sin tin ku mishi ku nan. E personanan ku a desaroyá e aparato akí ta mira e posibilidat pa us’é den e industria di zeta i gas tambe. E sistema ei, ku ta imitá e sonar di dòlfein, lo mester rekohé mas dato ku e aparatonan aktual por akumulá. Lo e yuda e téknikonan pone nan aparatonan na e mihó lugánan bou di awa, detektá kualke daño na nan—manera sker fini na pia di un planta pa bora zeta—i asta detektá blokeo den e pipanan.

 Kiko abo ta pensa? E sonar di e dòlfein mular, òf tuimelaar, ta kasualidat òf diseño?