E leshon ku mi a kousa mi kontrinkante durante un pelea tabata mas grave ku mi a pensa. Mi a dal e un skòp den su nanishi. Mi a sinti mi asina malu ku mi a kuminsá pensa si tabata sabí pa sigui praktiká arte marsial. Dikon e fayo ei a pone mi kuminsá duda den un deporte ku mi tabata gusta praktiká pa asina tantu aña kaba? Wèl, promé, laga mi konta kon mi a kuminsá praktiká arte marsial.

 Mi a lanta den un famia katóliko den e stat Buffalo, New York. Mi a bai un skol katóliko i mi a bira sirbidó di misa. Mi mayornan tabata ke pa ami i mi ruman muhé tin éksito den bida. P’esei, nan a laga mi hasi deporte despues di skol òf kohe djòp, basta nos a haña bon resultado na skol. Esei a obligá mi desaroyá disiplina na un edat hopi yòn.

 Ora mi tabatin 17 aña di edat, mi a kuminsá siña arte marsial. Pa vários aña, mi a train tres ora pa dia, seis dia pa siman. Ademas, mi a dediká hopi tempu tur siman, repasando e téknikanan i moveshonnan. Fuera di esei, mi tabata wak vidio ku a siña mi kon pa bira mas mihó. Mi tabata gusta train ku kara tapá i asta ku arma den mi man. Mi por a kibra stapel di planki òf blòki den un solo gòlpi ku mi man. Mi a subi di kategoria, i mi a gana vários trofeo den kompetensia. Arte marsial a bira e kos di mas importante den mi bida.

 Mi a sinti ku mi tabata eksitoso. Mi a kaba universidat, i mi a gradua ku masha bon punto mes. Despues, mi a bai traha pa un kompania grandi komo ingeniero di kòmpiuter. Mi a disfrutá di e benefisionan èkstra ku e kompania tabata duna mi, i mi tabatin mi propio kas. Mi tabatin un namorada tambe. Den bista di hende, tabata parse ku mi tabatin un bon bida, pero mi tabatin hopi pregunta tokante bida.

 Pa haña kontesta riba mi preguntanan, mi a kuminsá bishitá iglesia dos bes pa siman. Mi tabata hasi orashon i pidi Dios yuda mi. Riba un dia, un kòmbersashon ku un amigu a kambia mi bida. Mi a puntr’é: “Bo a yega di puntra bo mes dikon nos ta eksistí? Dikon tin asina tantu problema i inhustisia?” El a bisa mi ku e tambe a yega di hasi su mes e preguntanan ei i ku el a haña kontesta satisfaktorio den Beibel. El a duna mi e buki Bo por biba pa semper den Paradeis riba tera. a El a bisa mi ku e ta studiando Beibel ku Testigunan di Yehova. Na promé instante, mi a duda pa kuminsá un estudio di Beibel pasobra mi a pensa ku no tabata bon pa lesa literatura di otro religion. Sinembargo, mi deseo pa haña kontesta pa mi preguntanan a motivá mi pa wak si loke e Testigunan di Yehova tabata siña hende ta kuadra ku e bèrdat.

 Mi a keda masha kontentu ora mi a haña sa loke Beibel ta siña realmente. Mi a haña sa ku Dios su propósito tabata pa hende biba pa semper den un paradeis aki riba tera i ku Dios su propósito no a kambia. (Génesis 1:28) Mi a keda babuká di mira e nòmber di Dios, Yehova, den mi propio Beibel, vershon King James. Mi a haña sa ku esei ta e nòmber ku mi tabata pidi p’e den e orashon Nos Tata. (Salmo 83:18; Mateo 6:9) Por fin, mi por a komprondé dikon Dios ta permití sufrimentu. Tur kos tabata masha lógiko. Mi a bira masha kontentu.

 Mi no ta lubidá nunka mas kon mi a sinti e promé biaha ku mi a bai un reunion di Testigunan di Yehova. Tur hende tabata asina amabel, i nan tur a puntra mi kon yama mi. Na e promé reunion ei tabatin un diskurso spesial tokante e klase di orashon ku Dios ta skucha. Mi tabata masha interesá den e tema ei, pasobra mi tabata hasi hopi orashon pa pidi Dios yuda mi. Despues mi a asistí na e konmemorashon di Hesus su morto. Na e reunion ei, mi a keda asombrá di mira kon asta e muchanan tabata sigui e lesamentu di teksto den nan Beibel. Na kuminsamentu, mi no tabata sa kon pa buska teksto den Beibel. Pero e Testigunan di Yehova tabata kla pa yuda mi i siña mi kon pa usa mi Beibel.

 Segun ku m’a sigui bishitá e reunionnan, m’a desaroyá un gran apresio pa e kalidat haltu di siñansa ku e Testigunan di Yehova tabata duna. Na kada reunion mi tabata siña mas. Semper mi tabata bai kas animá i refreská. Despues, nan a ofresé mi un estudio di Beibel.

 Loke ku mi tabata mira entre e Testigunan di Yehova tabata kontrali na loke mi tabatin kustumber di mira na mi iglesia anterior. E Testigunan di Yehova tabata hende sinsero ku tabata hasi nan bèst pa agradá Dios. Mi tabata konvensí ku nan tabata desplegá e aktitut ku ta identifiká e kristiannan berdadero, esta, ku nan ta stima otro.—Huan 13:35.

 Mas mi tabata studia Beibel, mas kambio mi tabata hasi pa mi biba di akuerdo ku e normanan di Beibel. Sinembargo, mi a pensa ku nunka lo mi a stòp ku arte marsial. Mi tabata gusta train i partisipá den kompetensia. Ora mi a bisa esei na e ruman ku tabata studia ku mi, el a kontestá masha amabel. El a bisa mi: “Sigui studia Beibel i mi sa ku lo bo tuma e desishon korekto.” Esei tabata presis loke mi kier a tende. Mas mi a sigui studia Beibel, mas mi kier a agradá Yehova.

 Loke realmente a pone mi kambia tabata e aksidente ku mi a menshoná na kuminsamentu. Sin ku mi por a yuda mi a dal mi kontrinkante un skòp den su nanishi. E aksidente ei a pone mi puntra mi mes seriamente si ta posibel pa mi bira un sirbidó mansu di Kristu i a la bes sigui praktiká arte marsial. Na Isaías 2:3, 4 mi a siña ku Yehova a bisa di su siguidónan: “Nan lo no siña pa bringa den guera mas.” Hesus tambe a siña hende pa no usa violensia, ni maske bo risibí trato inhustu. (Mateo 26:52) P’esei, mi a stòp ku e deporte ku mi tabata gusta asina tantu.

 Despues di esei mi a sigui e konseho di Beibel pa “entrená bo mes ku e meta di kultivá deboshon na Dios.” (1 Timoteo 4:7) Tur e tempu i energia ku mi tabata dediká na arte marsial, mi ta dediká awor na mi rutina spiritual. Mi namorada no tabata di akuerdo ku loke mi tabata siña for di Beibel, p’esei nos a separá. Dia 24 di yanüari 1987, mi a batisá komo un Testigu di Yehova. Despues, mi a bira un predikadó di tempu kompleto i mi ta usa mi tempu pa siña otro hende tokante Beibel. Mi a sigui den e trabou ei i despues mi a bai sirbi na e sede mundial di Testigunan di Yehova na Merka.

 Awor ku mi a siña e bèrdat tokante Dios, mi ta satisfecho ku mi bida. Mi no ta sinti un bashí mas. Awor mi tin berdadero propósito den bida i un speransa pa futuro, i esei ta hasi mi masha kontentu. Ainda mi ta hasi ehersisio ku regularidat. Pero e no ta e kos di mas importante pa mi. Mi prioridat ta pa sirbi Yehova Dios.

 Tempu ku mi tabata praktiká arte marsial, mi tabata preokupá tur ora ku hende rònt di mi i mi tabata pensa kon lo mi defendé mi mes si un di nan ataká mi. Te ainda mi ta opservá hende rònt di mi, pero awor pa un otro motibu; mi ta pensa kon mi por yuda nan. Beibel a yuda mi bira un persona ku ta gusta duna i un bon kasá pa Brenda, mi kerida esposa.

 Anteriormente, arte marsial tabata mi bida. Pero awor, mi a remplas’é ku algu mihó. Beibel ta bisa: “Pasobra entrenamentu físiko ta yuda ku algu; pero deboshon na Dios ta probechoso pa tur kos, ya ku e ta inkluí e promesa di bida tantu pa awor komo pa futuro.”—1 Timoteo 4:8.