Ngdilu el kmo: “A meklou el beluu a mo kaumekemad; ma renged a mo kaodechelakl. E mor ngii er ker me ker a kdekudel el desiu, ma bosech, ma meringel el rakt.” (Lukas 21:10, 11) Aika el tekoi a kmal obeketeklang el sebeched lomekesiu er ngii er a llecheklel a fingerprint er a chimal a chad. Me ngdi ua fingerprint er a chad el sebechel lochotii el kmo ngikang ngtecha el chad, aika el tekoi el dubechang er a osisiu el taem, a oterekeklii el kmo a ‘Rengedel a Dios a kmedang.’ Me aika el tekoi, ngdubecha er a beluulechad er a osisiu el taem? Me bo domes a olechotel.

1. MEKEMAD

Sera 1914, e ngulemuchel a mekemad el dirkak a ta el lengar ngii er a reksi er a klechad! A remesuub a reksi a mesaod el kmo tia el mekemad a mlo uchul a klou el omeldechel a klechad. Nguluusbech a imis el betok el tank, dub, machine gun, dok el eolt me a lmuut el bebil er a omekodall el klekedall el kuk betok er aike el mla er ngii el mekemad er a uchei. E ngar sel ongeru el mekemedil a beluulechad, e ngmle ketengir el lousbech a atomic bomb. Me sera 1914 el mei, e ngdi ngar ngii a mekemad er ker me ker, el mla mo uchul a kodellir a rebetok el miliol.

2. DESIU

A Britannica Academic a mesaod el kmo, a bek el rak e ngar ngii a bekord el 100 el meklou el desiu el “kmal meklou a telemellel.” E a United States Geological Survey a mesaod el kmo “a doltirakl a rekord (el ulemuchel er a rak er a 1900) el mei, e ngbekord el 16 el meklou el desiu a ngar ngii er a ngii di el taem er a rak.” Alta rebebil omdasu el kmo ngua lebetok a desiu e le ngmla mo er ngii a ungil klekedall el lousbech el omes a desiu, engdi a desiu el ngar ngii el meliuekl er a beluulechad a mla mo uchul a kmal imis el klou el ringel me a kodall.

 3. BOSECH ER A KALL

A mekemad, chelebirukel, mekngit el keizai, me a mekngit el omengetmeklel a sers, a uchul me ngmo er ngii a bosech er a kall. Sel The World Food Programme’s “2018 Year in Review” a kmo: “Meliuekl er a beluulechad, e a 821 el miliol a di songerenger, e a 124 el miliol a ulekoad er a kall.” Me a klengerenger a uchul a kodellir a rebekord el 3.1 miliol el ngalek er a bek el rak. E sera rak er a 2011, e ngkesengil e ng 45 el basent er a rengalek el meliuekl er a beluulechad a mlad el klengerenger a uchul.

4. SECHER ME A BEKOIUEIUUL RAKT

A babier el tilobed er sel World Health Organization a kmo: “Ngar aika el mereko el 20 el rak, e ngmla er ngii aike el kot el meklou el bekoiueiuul rakt. Aike el rakt er a irechar el ua cholera, bekoiueiuul el rakt el mlengai er a baiking, me a yellow fever a mla lmuut el mo er ngii, e mla mo er ngii a beches el rakt el ua SARS, mesisiich el bekoiueiuul el tereter, MERS, Ebola, me a Zika.” A COVID-19 pandemic a sel kot el beches el rakt el mla mo er ngii. Me alta e a re scientist me a retoktang a mla suub a betok el kirel aika el rakt, engdi ngdirkak bo lsebechir el omekungil a rokui el secher.

5. BERKEL A KLUMECH EL MELIUEKL ER A BELUULECHAD

A Jesus a milsaod er a ta er a telengtengil tia el olangch er a ledu el kmo: “Tial Ebangkelio el kirel ngii el Renged a mo mosisechakl er a beluulchad el rokir el kirel el mo ocholt el mor a rokui el chad, e sola e ng mochu er ngii a ulebongel er a beluulchad.” (Mateus 24:14) Me alta e a beluulechad a chuarm a betok el meringel el mondai, engdi te ngar ngii a rekuk betok er a eai el miliol el chad er a rokui el beluu el omerk er a ungil chais el kirel a Rengedel a Dios er a chelsel a 240 el beluu el ousbech a betok er a 1,000 el omelekoi. E tiang a ketengel meketmokl el tekoi.

Ngmeketeklii el kmo a tekoi el ledilu Jesus a domes el toutang er chelechang. Ngera uchul me kede semeriar er tiang? E le Jesus a dilu el kmo: “Sel mues a ikal tekoi el mochar ngii, e bo modengei el kmo a Rengedel a Dios a kmedal mei.”​—Lukas 21:31.

Me sel domtab er a olangch el ledillii a Jesus me a blechebechel a tekoi el ngar a Biblia, e kede mo medengei el kmo a Dios a tileketekii a Rengedel el ngar a eanged er a 1914. a E seikid e ngtiltkii a Ngelekel el Jesus Kristus el mo King. (Psalm 2:2, 4, 6-9) Ngdi kmedung e a Rengedel a Dios a mo mengedereder er tia el chutem, e mo okngemed a rokui el kabelment, e rullii tia el chutem el mo baradis el bo lekiei er ngii a rechad el mo cherechar.

Ngdi kmedung e aike el tekoi el medung er a nglunguchel a Jesus a mo tmaut el kmo: “A Rengedem le mei; bo le motaut a soam er a beluulchad el ua ingii er a eanged.” (Mateus 6:10) Me ngera mla remuul a Rengedel a Dios er sera lemeteketek er a 1914 el mei? E ngera kede omes el beduluchei el kirel er sel taem el Rengedel a Dios a mo mengedereder er a klechad?