KAU, ngsebechem el menguiu a Biblia el tekoi er a Hebru? Nglocha diak. Nglocha dirkak a ta el mesa Biblia el tekoi er a Hebru. Me nguaisei, engdi ke locha kmal mo oba klou el omereng el saul sel lebo er ngii a Chedaol Biblia er kau e bo msubii a tekoi el dilubech er a bekord el 450 el rak er a uchei el kirel a chad el Elias Hutter me aike el eru el Biblia er ngii el tekoi er a Hebru.

A Elias Hutter a milechell er a 1553 er a Görlitz el kekerei el beluu el kmeed er sel oliochel er a beluu er a Dois er a delongelel ngii me a beluu er a Poland me a the Czech Republic. Ngika el Hutter a milsuub a tekoi er a Oriental er a Lutheran University er a Jena. E a uchei er a bo el 24 a rekil e ngmlengilt el mo ta er a brobesong er a tekoi er a Hebru er a beluu er a Leipzig. Ngika el chad a ngildechii a rolel a tekoi er a omesuub, e a uriul e ngmiluchelii a skuul el ngar er a Nuremberg, el sebechir a rengalek er a skuul el mo er ngii e mesuub a tekoi er a Hebru me a Grik me a Latin me a Dois er a di chelsel a eua el rak. E sel taem e ngdimlak a skuul me a lechub e ngii di el university el sebechel el kutmeklii tia el tekoi.

Sera 1587, e ngika el Hutter a ultebedii a Biblia el tekoi er a Hebru el ngklel a Old Testament. E a dai er tia el babier a Derekh ha-Kodesh, el mlengai a uchetemel er a bades er a Isaia 35:8 el belkul a kmo: “Ng rael er a Chelledaol.” E tiang a kmal klebokel e ungil chelderoder a tekoi er a chelsel a uchul me ngmedung tia el tekoi el kmo, “a rokui el tekoi er a chelsel ngii el babier a ochotii el kmo ngkmal klebokel e mengasireng el babier.” Engdi sel rullii tia el Biblia el lmuut el kmal mo mekreos a sel rolel e tirke el ngalek er a skuul a uluusbech er ngii el mo sebechir el mesuub er a tekoi er a Hebru.

Me bo dosaod a eru el omelsemai el blo lechelebangel tirke el milsuub er sera lolasem el menguiu er a Biblia el tekoi er a Hebru, me bo dodengelii a uchul me tia el Biblia er a Hutter a kmal ngilsuterir. A kot, e aike el tekoi a kmal mle ngodech e dirrek el dimlak a medengei a alphabet er ngii, e a ongerung, e aike el prefix me a suffix el obengkel a remuul ngii el tekoi el kmal mo meringel er tir el mo medengei. El ua tiang, ka molatk er a tekoi er a Hebru el נפשׁ (el moiuid el ne’phesh), el belkul a kmo “klengar er a chad.” Ngar er a Esekiel 18:4, e ngmesaod er a tekoi el ousbech er a prefix el ה (ha), el belkul a “the,” el rullii a compound er a tekoi el הנפשׁ (han·ne’phesh), me a lechub e ng “klengar er a chad.” Me a chad el diak lodengelii tia el omelekoi a sebechel el mo omdasu el kmo a tekoi el הנפשׁ (han·ne’phesh) a kuk ngodech er a tekoi el נפשׁ (ne’phesh).

 Me a Hutter a mlo sebechel el ngosuterir a rengalek er a skuul el kirel tiang el uluusbech aike el mera el llechukl el tekoi er a Hebru el ngar er a solid me a dirrek el outline form. Ngkiltmokl e otobed a bek el tekoi el ngar er a solid, e uluusbech a outline form el meruul aike el prefix me a suffix. Me tia el beot el rolel a mle sebechel el ngosuterir a rengalek er a skuul el mo medengei aike el mera el tekoi er a Hebru, me ngilsuterir el mo ungil suubii tia el omelekoi. Me tia el New World Translation of the Holy Scriptures​—With References a dirrek el ousbech er a osisiu el rolel sel losaod aike el footnote er ngii. * Me ngsebeched el mesang er tia el siasing. Sel mla moiuid a smiich el llechukl, e aike el prefix me a suffix a diak el siich a llecheklel. Me aike el domes el llechukl er bab a llechukl er a Biblia el lultebedii a Hutter el ngar er a Esekiel 18:4, e aikang a lousbech el ngar sel Reference Bible el ngar er a footnote er a osisiu el bades.

A Hutter a dirrek el ultebedii a Biblia el ngklel a New Testament, el ngar er a 12 el bedengel a omelekoi. E tia el Biblia a tilobed er a beluu er a Nuremberg er sera 1599, e a rechad a blechoel el omekedong er ngii el Nuremberg Polyglot. A Hutter a mle soal el oldak er tia el mla moiuid el tekoi er a Hebru el mo er aike el bades er a Christian Greek Scriptures. Engdi ngdilu el kmo, “ak kongei el mengoit a kmal betok el ududek el kirel tiang” me bo lsebechel el moiuid, engdi ngdi mo diak a ultutelel. * Me ngbai tilbir el di ngii el mo oliuid er a New Testament el tekoi er a Grik el mo tekoi er a Hebru. Me ngmilechei a rokui el tekoi el mle kirel el meruul, me ngdi mle chelsel a ta el rak e ngoidii tia el Biblia!

Ngerang a klungiolel a mloiuid el Christian Greek Scriptures el tekoi er a Hebru el babilengel a Hutter? Ngar er aike el rak er a 1900 e a chellimosk el chad er a Hebru el Franz Delitzsch a milluches el kmo: “A oidel a tekoi er a Hebru el lousbech a mera el dmolech, e tekoi el di kesai el Kristiano a medengei, e aikang a kmal ungil a dosuub el mo medengei me ngmla obeketakl el kmo, ngkmal mle ungil a oidel tia el babilengel a Hutter el New Testament.”

Tia el lureor el lurruul er ngii a Hutter a dimlak lerellii el mo merau, e le aika el babilengel a dimlak bo lungil a oterullel. Me nguaisei, engdi a urerel a kmal ngar er ngii a klou a ultutelel el tekoi el lerirellii, e dirrek el melemolem el me lmuut er chelecha el taem. El ua tiang, a babilengel el New Testament el tekoi er a Hebru a lulemekbeches er ngii e liluut el otebedii er a rak er a 1661 a chad el ngklel a William Robertson, e sera rak er a 1798 e a Richard Caddick a dirrek el liluut el otebedii. Ngar sel oidel a dimla tekoi er a Grik, e a Hutter a kmal mle melemalt a oidel el kirel a dui el Kyʹri·os (Lord) me a The·osʹ (God) el mo “Jehovah” (יהוה, JHVH) el ngar er aike el kirel el ngar er ngii er a chelsel aike el Bades el tekoi er a Hebru, me a lechub aike el tekoi el ngii a uluumerang el kmo ngmesaod er a ngklel a Jehovah. Me tiang a kmal mengasireng el tekoi e le betok el oidel a New Testament a diak lousbech er tia el ileakl el ngklel a Dios, engdi a oidel a babilengel a Hutter a lmuut el meketeklii el kmo, a ngklel a Dios a mera el mla er ngii er a chelsel aike el Bades er a Christian Greek Scriptures.

Me a bek el taem el mesa ngklel a Dios el Jehovah er a chelsel a Christian Greek Scriptures, me a lechub e ke omes a footnote er a Reference Bible, e molatk er a urerel a Elias Hutter me aike el mengasireng el Biblia er ngii el tekoi er a Hebru.