Winston, ka mouchais er kemam el kirel a rolel e ke ulsiik er a Dios.

Ngak a mlukeroul er a chelsel a telungalek el dimlak a klechelid er tir, er a beluu er a Queensland, Australia. Kemam el kiliei el cheroid er a rechad a uchul me ngdimlak a kmal techellek el mengedecheduch er a ngii di el chad, ngdi tirke el kmeed el chedal a telungalek er ngak. Me ngar a bekord el 12 a rekik e ak ulemuchel losiik er a Dios. Ak milluluuch el mo er ngii lolengit me bo kudengei a klemerang el kirel. Cherengel a taem, e ngmlo diak chad er a sers e miltik er a urerek er a beluu er a Adelaide, South Australia. E sera bo el 21 a rekik, e ak mlo medengelii a Pam er a taem el kuilil er a beluu er a Sydney, e nguluuchais er ngak el kirel a cheldebechel er a rechad el British-Israel religious movement, el tir a oumerang el kmo a rechad er a British a chedal aike el teruich el kebliil er a Israel el ririid. Tia el cheldebechel a mesaod el kmo aikang aike el teruich el kebliil er a rengedel a diluches el tir a mlo blebaol er a rak er a 740 B.C.E. Me sera kluut el mora Adelaide, e ak milsaod er tia el tekoi el mora ta el chad er a urerek el mla omuchel el mesuub a Biblia lobengterir a Resioning er a Jehovah. Me a uriul er a sesei el sikang el kim chadecheduch el oumesingd el taem e aki milsaod el kirel a klaumerang er a Resioning, e ak mlo mtebengii el kmo a nglunguchek er a dirk kekerei a mla monger. Ak silubii a klemerang el kirel ngika el Ulemeob er ngak me a dirrek el Rengedel! Ak mla metik er a “meringelchad el ngisel a chesiuch.”​—Mt. 13:45, 46, BT.

Pam, kau a dirrek lulemuchel losiik er tia el ngisel a chesiuch er a dirk mkekerei. Ke milekera e metik er ngii?

Ngak a mlukeroul er a chelsel a mesisiich a klaumerang er ngii el telungalek er a beluu er a Coffs Harbour, New South Wales. A demak me a delak me a demal me a delal a delak a kilengei a osisecheklel a cheldebechel er a British-Israel movement. Ngak me a kekerei el ochedak me a chudelek me a rebetok el ngelekir a rechedemam el sechal me a redil a mlukeroul el oumerang el kmo a Dios a soal a rechad el ngar ngii a rolir el mo chad er a British. Me nguaisei, engdi ngdimlak  bo kuumerang er tia el tekoi, e dirrek el dimlak a kmes el deleuill er ngak me a Dios. E sera bo el 14 a rekik, e ak mla mo mesarech a betok el bedengel a klechelid er a beluak, el uldimukl er a Anglican, me a Baptist, me a dirrek el Seventh-day Adventist. Engdi aikang a dimlak lsebechel ngosukak el mo ungil medengelii a Dios.

A uriul e a telungalek er ngak a millukl el mora Sydney, e ngar isei e ak mlo medengelii a Winston el sel taem e ngmlo milil er tia el beluu. Me ngua ike el lolekoi, a omesodel a klechelid a mlo uchul e ngulemuchel el mesuub lobengterir a Resioning. Me a uriul, e ngmilluches a babilengel el mei er ngak el di mesaod a bades! Me a uchelel e ngtelkib el mlo suebek a renguk, e dirrek el mlo kesib a renguk. Engdi a cherengel a taem e ak mlo mtebengii el kmo aika el tekoi el loluches a ulterekokl el mera el tekoi el kirel a Dios.

Ngar a rak er a 1962, e ak millukl el mora Adelaide el mo kmeed er a Winston. Ngilikak el mo kiei lobengterir a rubekel el Sioning el Thomas me a Janice Sloman el tir a mle missionari er a beluu er a Papua New Guinea. Ngkmal mle ungil a omerellir el bedul ngak, e sel taem e ngdirk 18 a rekik, engdi te kmal ngilsukak el smisichii a klereng er ngak. Me ak dirrek lulemuchel el mesuub a Tekingel a Dios, me ngdi mle telkib e ngkmal mlo ulterekokl a renguk el kmo ak mla metik er a klemerang. A uriul er a bok bechiil ngak me a Winston, e aki di mle mereched el mechelii a kot lungil rolel a klengar el mlo mesiou er a Jehovah, me alta e aki mlo chelebangel a betok lomelsemai, engdi a cherengel a taem e aki mera mla mekurulii a klou lomereng el saul er kemam el kirel tia el mekreos el ngisel a chesiuch el ki bla betik er ngii.

Winston, ka mouchais er kemam el kirel aike el kot el rak er a klengar er kemiu el mesiou er a Jehovah.

Telkib el taem er a uriul er aki bo bechiil ngak me a Pam, e a Jehovah a milekengii a chesmerel a betok el ‘techall’ er a omesiou el kiram. (1 Ko. 16:9) Me sel kot el techall a mlei el ulekiu a Brother Jack Porter, el ngii a milsiou er a kekerei el ongdibel er kemam el odam el oldingel a ongdibel. (Chelechang e ngmesiou el ta er a chedal a Chelechad el Omekerreu a Obis er a Resioning er a Jehovah er a Australasia Branch.) A Jack me a bechil el Roslyn, a millisiich er kemam el mo regular pioneer, el ngii a techall el mlo uchul a deurreng er kemam el eim el rak. E sera bo el 29 a rekik, e ngak me a Pam a mlodurech el mo meruul er a circuit work, er a beluu er a South Pacific Islands, el ngii a mlara cheungel a branch er a Fiji. Aike el beluu el ngar cheungel tia el branch a American Samoa, me a Samoa, me a Kiribati, me a Nauru, me a Niue, me a Tokelau, me a Tonga, me a Tuvalu, me a Vanuatu.

Ngar aike el taem, e a rechad er a bebil er aike el beluu el ngar a mesechesechel a diak lodengelterir a Resioning er a Jehovah, me ngmle kiram el mo kerekikl a tekoi el ki moruul. (Mt. 10:16) A ongdibel er ngii a kmal mekekerei, me ngdiak a basio el sebecham el mo mechiuaiu er ngii. Me aki osiik a blirir a rechad er a beluu el sebecham el mo kiei er ngii, e te dirrek el kmal mle ungil omerellir el bedul kemam.

Winston, ke kora kmal semeriar e soam a ureor el kirel a oidel a babier. Ngera sel rirellau el mo soam tia el ureor?

Sel taem, e a rudam er a beluu er a Tonga a mla er ngii a di mle kesai el tract me a mekekerei el babier el mloiuid el mo tekoi er a Tonga el omelekoi er a Polynesia. Me sel loldingel e te ousbech a tekoi er a Merikel el babier el The Truth. Me ngar a eua el sandei el skuul el kirir a remechuodel, e a retedei el mechuodel er sel beluu el di mle kekerei a klemedengei er tir er a tekoi er a Merikel, a kilengei el mo oliuid er a babier el The Truth That Leads to Eternal Life el mo tekoi er a Tonga. Me a Pam a mle ngerechelel el outype aike el manuscript, e aki oldurokl el mora United States branch el mo print. Tia el ureor a mle bekord el eai el sandei a klemengetel. Alta e ngdimlak el sal ungil a oidel, engdi tia el babier a ngilsuterir a rebetok el chad er a Tonga el mo suubii a klemerang. E ngak me a Pam a diak ki meduch el oliuid a babier, engdi ngokiu tia el tekoi e ngmlo uchul e aki kmal mlo semeriar e omekerreu er tia el ureor.

Pam, ngmekera omomekesiu er a klengar er a iungs el mora klengar er a Australia?

Ngkmal kakerous! Tiang a di mo ultuil er a basio el ki mngar ngii er sel taem, ngar a bebil basio e ngkmal betok a rekas, e kmal mekeald e dirrek el kmal klou a delekimes er a eolt, me a beab, me a rakt, me a lebebil er a taem, e ngkmal di kesai a kall. Engdi sel kuk lorael el mo ulebongel er a ta el sils, e ngkmal olengull a uldesued sel dengar a fale el ngii a blai er a Samoa el teuechel a chedoel, e di chelelluut. E sel kuk lungil a buil, e ngkmal mo mellomes me ngsebeched el omes a llel a lius, me a dichel a buil a dmiich er bebul a daob. Ngar chouaika el taem e ngrullemam el mo dmolech el melebedebek e dirrek el meluluuch, el mo uchul me aki  mo omdasu a ungil tekoi e mo diak di ki molatk a mekngit.

Ngkmal mlo betik a rengmam er a rengalek, e le ngkmal ungil a blekerdelir, e dirrek el kora mechas a rengrir sel leseterir a rebecheleleu el chad er a ngodech el beluu. A ta el taem e aki mlo oldingel er a beluu er a Niue, e a ta el kekerei el buik a merutech er a bsebsuchel el chimal a Winston e kmo, “Ngkmal soak aika el bsechem.” Me aki mlo medengei el kmo ngketengel el mesang a bsebsuchel el chimal a chad, e dirrek el dimlak lodengei el kmo ngmekera losaod er ngii!

Ngkmal mle mekngit a rengmam sel ki momes a chelebulir a rechad me a ringelel a klengar er tir. Ngkmal klebokel a beluu el lekiei er ngii engdi ngdi kesai a ilumel el ralm e dirrek el kmal mekngit a rolel a ukeruul. Me nguaisei, engdi sel kumes er a rudam e ngkora ua lak el lsebek a rengrir. Tiaikid a rolel a klengar er tir. Te kiei el dmeu a rengrir e le ngar ngii a telungalek er tir, e dirrek el mla er ngii a basio el lebo lekldibel er ngii e mengull e dirrek el dmeu a rengrir er a ileakl el techellir el mo oldanges er a Jehovah. Me a blekerdelir a ngilsukemam el mo kerekikl el melatk a meklou a ultutelel el tekoi e dirrek el mo omekbeot a rolel a klengar er kemam.

Pam, a lebebil er a taem e ngkirem el di kau el mo melai a lmem, e dirrek el mengetmokl a keliu el ngar a kmal ngodech el rolel. Me ngmilekera e mo sebechem el kutmokl aika el tekoi?

Ak mereng a sulel a demak. Ngulsisecheklak a betok el meklou a ultutelel tekoi, el ua sel rolel a dongumel er a ngau me a dirrek el rolel e kede ousbech a di kesai el klekedall e kutmokl a tekoi. A ta el taem e aki mlo oldingel er a beluu er a Kiribati, e mlo kiei er a kekerei el blai el teuechel a chedoel, e klboub er a bambuu, e di bertakl a ulolel. Me sel kuruul a kall e ngkirek el kisii a delluchel er a ulaol, e chumlii a ngau, e smuk a ulengchidel er a chelsel. E kirek el mo teloi er a rebebil el redil er tia el beluu el ngar a blechobech el mo melecheseb a ralm. Te mla rullii a kerrekar el bekord el elolem el fit a klemengetel e llechotel er ngii a chetngaid el ekil er a ulebengelel, el ua teletelel a kereel el lousbech er ngii el melecheseb a ralm. Engdi ngar a ulebengelel tia el ekil, e ngllechotel er ngii a beached el diak el chirocher. A derta er tirka el redil a mideklii a kerelel el kora omitech er a chimal e ngmo ungil socheseb a ralm. Me ngobitech tia el beached e socheseb a ralm. Me ak ulemdasu el kmo tiang a beot el tekoi el mo lmuut er a bocha el temek. Ak di ulemidokl er a kerelek el mo betok el taem, engdi tia el beached a di ulembibechakl e dimlak a ta el bo sbechii er a ralm! Me a uriul er a lemereko el ocherchur a rokui el chad, e a ta er tirka el redil a kmal mlo ungil ngosukak. A rechad er tia el beluu a oumesingd el ullengeseu e dirrek el kmal mle ungil a blekerdelir el mei er kemam.

Kom di dul kmal mlo betik a rengmiu er tia el ngerachel el mloterekokl er kemiu el ngar aika el iungs. Ngsebechiu louchais a bebil er a ungil tekoi el dilubech er a temiu el ngar isei?

Winston: Aki uluusbech er a telkib el taem el mlochu sebecham el mo medengei a bebil er a siukang. El ua tiang, sel taem el rudam a meruul a kall e te meskemam a rokui el kall el lurruul. Me a uchei, e ngdimlak ki modengei el kmo ngmle kiram el mechei a bebil er a kall el kirir. Me aki di kmang aike el rokui el kall el mei er a medemam! Engdi uriul, e sera ki bo modengelii a mera el rolel, e aki milechei a kall el kirir. Me alta e ngkora mle klebelung a omerellam, engdi ngdi mle ungilbesul er a uldesuir a rudam. Te kmal mle semeriar el omes er kemam er a chelsel a bek el elolem el buil me a lechub e sel kuk bo el temam el mo oldingel er a ongdibel er tir. Sel taem e ngdi mle ngak me a Pam a ngodech el chad el mla er isel beluu el teloi er a rudam el chad er ngii el beluu.

Aike el odngelam a mlo uchul a ungil sioning el mora rechad er a beluu. A rebetok el chad a ulemdasu el kmo tia el klechelid er a rudam a locha di mle tir el dibechii. Me sel taem el odam me a bechil el mlara ngodech el beluu a mlei e oldingel er a belurir e te kmal mlo mechas a rengrir, e dirrek el mlo medengei el kmo tiang a mera el klechelid el rechedal a kmal kaukerreu.

Pam: A ta el tekoi el kmal diak kubes er ngii a dilubech er a beluu er a Kiribati, el ngar a ta el ongdibel el di kesai a rudam me a rudos er ngii. Ngdi chimong a odam el mesiou el ta er a remechuodel el ngklel a Itinikai Matera. Ngikang a kmal mle ungil lomekerreu er kemam. A ta el tutau e ngmle duum loba sualo el seluk er ngii a chimo el ngais. Ngdilu el kmo, “Tia kelem.” Sel taem e ngkmal mle meringel el debetik a ngisel a malk. Me tia el ungil lomerellel alta e ngdi mle kekerei el tekoi, engdi ngkmal rirutech a rengmam.

Pam, a sesei el rak er a uriul e ke milengai el mlad a ngelekem. Me ngera ngilsukau el mo outekangel er tia el ringel?

Ak mlo dioll er a rak er a 1973 er sel taem el ngak me a Winston a mlara South Pacific. Me aki tilbir el lmuut  el mo remei er a Australia, e a uriul er a eua el buil e ngmlad a ngelekam. A Winston a dirrek el kmal mlo mekngit a rengul, e le ngika el ngalek a dirrek el ngelekel. Cherengel a taem e ngmlo mechelaod a renguk e mlo diak lsal mekngit a renguk, engdi tia el ringel a dimlak lsebechel mo nguemed el mo lmuut er a letobed sel Ongkerongel er a April 15, 2009. Tiang a mla er ngii a suobel el ngar “A Ker el Mla er a Remenguiu” el kmo: “Ngar ngii a omelatk el kirel a ngalek el mad er a chelsel a delel a delal?” Tia el suobel a kmal milengelaod er kemam e le ki mlo medengei el kmo tia el mondai er kemam a ngar chimal a Jehovah el ngike el di blechoel meruul a melemalt. Ngmo okngemed a rokui el ringel el kemam a mlo chuarm er ngii er a chelsel tia el mekngit a blekeradel er ngii el beluulechad lokiu sel bo lungil lomekrael er a Ngelekel er sel taem el bo ‘lolemall a urerel a Diabelong.’ (1 Jn. 3:8) Tia el suobel a dirrek el ngilsukemam el lmuut el mo omes er tia el “ngisel a chesiuch” el kmal mekreos e le kemam el chedal a Jehovah! Ngkmal diak el sebecham el melatk el kmo aki mo er ker el diak ki moba omelatk el kirel a Renged.

Me a uriul er a lemad a ngelekam, e aki liluut el mo soiseb er a mui el taem lomesiou. Me aki mlara Australia Bethel el sesei el buil e liluut el mukngerachel el mo meruul er a omesiou el merael loldingel a ongdibel. Ngar a rak er a 1981, er a uriul er a eua el rak el ki mosiou el ngar a beluu er a New South Wales me a dirrek el Sydney, e aki mlokedong el mora bethel el mle Australia branch a ngklel er sel taem. E kemam tiang er a ki mosiou el ngar isei el me lmuut er chelechang.

Winston, aike el tekoi el dilubech er sel taem er a cho mngar aike el iungs er a South Pacific, ngmlo sebechel ngosukau er a urerem el mesiou el ta er a chedal a chelechad el omekerreu a obis er a Resioning er a Jehovah er a Australasia Branch?

Nguaisei, el lokiu a betok el rolel. A kot e a Australia a mlo ngerechelel el omekerreu a beluu er a American Samoa me a Samoa. E a uriul e a New Zealand branch a mlo dmak ngii me a Australia. E chelechang e aike el beluu el ngar cheungel a Australasia branch a uldimukl er ngii a Australia, me a American Samoa me a Samoa, me a Cook Islands, me a New Zealand, me a Niue, me a Timor-Leste, me a Tokelau, me a dirrek el Tonga, e a oumesingd er ngii a mlo er ngii a techellek el mo oldingel er ngii el omtechei er a chedal a chelechad el omekerreu a obis er a Resioning er a Jehovah. Me a tekoi el dilubech er aike el temek loureor lobengterir tirke el blak a rengrir el rudam me a rudos er aika el iungs a kmal klou a lerellii er ngak er chelecha el taem el kusiou er tir el ngar a obis er a Resioning er a Jehovah.

A ulebongel engdi soak louchais el kmo ngmla mo betok el rak el ngak me a Pam a mla mo medengei el kmo ngdiak di el remeklou el chad a osiik er a Dios. Ngoeak a tekoi el dilubech er a klengar er kemam e aki mlo mtebengii tia el tekoi. A remekekerei el chad a dirrek el sorir tiaikid el mekreos el “ngisel a chesiuch” el mo lmuut er a taem el rebebil el chedal a telungalek a diak el semeriar. (2 Ki. 5:2, 3; 2 Kr. 34:1-3) Me bo lulterekokl a rengud, a Jehovah a betik a rengul Dios el kmal soal a rokui el chad el meklou me a remekekerei a bo lenguu a klengar!

Sel taem el ngak me a Pam a ulemuchel losiik er a Dios er a mla mo merek el betok er a 50 el rak, e ngkmal dimlak ki modengei el kmo tia el skel a Dios el ki moruul er ngii, ngmo bedul ker. A klemerang el kirel a Renged a mera el mekreos el ngisel a chesiuch el diak a ngii di el ngerang el sebechel mo mekesiur! Me ngkmal ulterekokl a rengmam el melemolem lurrekodel er tia el mekreos el ngisel a chesiuch el mora tkurrebab el sebecham!