A LUZIA A MELECHEDOI SEL LORAEL. Sera ledirk ngalek ngngiluu a rakt el poliomyelitis el ngii a bekoiueiuul el rakt el melemall er a nervous system er a chad. Sera le 16 a rekil e nguluureor el kirel a redil el dilu er ngii el kmo, “A Dios omals er kau le kau el dimlak morrenges er a delam e mekngit er ngii.” Betok el rak er uriul e a Luzia dirk melechesuar a ringelel a tekingel.

A DAMARIS ER A LESUBII EL KMO NGKASINOMA BDELUL e a demal uleker er ngii el kmo: “Ngera ke mla rullii me tiang a duubechang el lekor kau? Kau a locha rirellii a kmal mekngit el tekoi. Sei a uchul me a Dios a omals er kau.” A Damaris a kmal miltemall a rengul er a tekingel.

A rechad er aika el mla mo merek el betok el telael el rak oumerang el kmo a secher a blals el mlara Dios. A book el Manners and Customs of Bible Lands a melekoi el kmo a rebetok er a taem er a Kristus uluumerang el kmo a “chad a mo smecher el blals el kirel a kngtil me a lechub e ngkngtil a rechedal.” A Medieval Medicine and the Plague a mesaod el kirel aike el rak er a 400 el mora 1400 el kmo “a rebebil er a rechad uluumerang el kmo a Dios uleldurokl aika el rakt el omals er tir el kirel a kngterir.” Me a Dios ngulemals er a remekngit el chad er sera lebo er ngii a rakt er aike el rak er a 1300 e lemad a rebetok el miliol el chad er a Europe? Me a lechub e tia el rakt a mlo er ngii le baiking a mle infect er a rechad el ua bla le tirterii a rechad el mesuub a secher me a rakt? A rebebil a locha melatk el kmo, a Dios ngmera el lousbech a secher lomals er a rechad el kirel a kngterir? *

MUTEBENGII TIANG: Ngera uchul me a Jesus a ulemekungil er a rechad a lsekum a Dios ulemals er tir lousbech a secher me a ringel? Tia ngdiak lomtok er a llemalt er a Dios? (Mateus 4:23, 24) A Jesus a kmal diak el sebechel lomtok er a Dios. Ngdilu el kmo: “Kblechoel el meruul a ungil er a rengul” e “meruul a ikel ledu er ngak a Chedam.”​—Johanes 8:29; 14:31.

Ngkmal bleketakl aike el lolekoi a Biblia. A Jehovah el Dios a “melemalt.” (Duteronomi 32:4) El ua tiang, a Dios a kmal diak el sebechel rullii a skoki me ng accident el metemall lomekoad er a rebetok el dart el chad el omals er a chad el ngar er tia el skoki. A Abraham el ta er a mle blak a rengul mesiungel a Dios a millekoi loltirakl er a llemeltel a Dios el kmo ngkmal diak el sebechel “melemall er a re melemalt el di uldak er a re mekngit.” Ngdilu el kmo, “Ngdiak le ua isei!” (Genesis 18:23, 25) A Biblia dirrek el melekoi el kmo a Dios a diak loruul a “cheleuid” e kmal “diak loruul a mekngit.”​—Job 34:10-12.

Aike el ringel el bo dechebangel a diak el blals el kirel a klengit. A Jesus a mileketeklii tiang er sel taem el ngii me a redisaiplo er ngii a milsa chad el milechell el meiko. “Rubengkel a uleker er ngii el kmo, ‘Sensei, ng kngtil techa uchul me ng mlechell el meiko? Ng kngtil, ma lechub, e ng kngtil a demal ma delal?’ Ma Jesus a dilu el kmo, ‘Ng diak le kngtil el ka le kngtil a demal ma delal. A uchul me ng meiko a bai kirel me bo lecholt a klisichel a Dios el oureor er ngii.’”​—Johanes 9:1-3.

Te locha kmal mlo mechas a rengrir er a ledu el kmo ngdiak el kngtil me a lechub e le kngtil a rechad er a blil a uchul me nguaisei, e le tia kmal mle ngodech er a uldesuir a rebetok el chad. A Jesus a dimlak di lomekungil er ngika el chad ngdirrek el mileketeklii el kmo ngklsuul a uldasu el kmo a ringel a  blals el mlara Dios. (Johanes 9:6, 7) Tirke el ngar ngii a meringel secherel a bedengir a sebechel mechelaod a rengrir el kmo a Dios a diak luchul a ringel el lengar ngii.

A Bades olterekokl a rengud

• “Dios a diak el sebechel el mecharm er a mekngit, ma diak longarm er a ngii di le chad.” (JAKOBUS 1:13) Nguaisei aika el “mekngit” el mla mo betok el telael el rak lomekcharm er a rechad el ua secher, ringel, me a kodall a di kmedu el mo nguemed.

• A Jesus Kristus a “ulemekungil er tirkel rokui el silecher.” (MATEUS 8:16) A ngelekel a Dios er a lomekungil er tirke el mlo er ngii e ngullecholt aike el bo longetmokl a Rengedel a Dios er a beluulechad el rokir.

• “[Dios a] mo smuld a rokui el chiuosech er a mederir. Ng dikea lluut el mor ngii a kodall, e mo diak a klengiterreng, ma langel, ma ringel. A di mla tekoi a mla mo diak.”​—OCHOLT 21:3-5.

Me ngera uchul me a rechad a kmal chuarm er a ringel? A rechad a meketeketang er a di lolatk er tia el ker. A lsekum ngdiak el Dios a uchul a ringel, e ngtechang? A nger er aika el ker a mo soadel er sel ongingil el suobel.