1, 2. Ngera ngrullii er kid sel rolel a okuruled me a blekeradel er a beluu el dekiei er ngii?

 KID el rokui a mukeroul el klengar er kid a mekesuseu el oeak a blekerdelir a rechad er a blid, resechelid me a blekeradel er a beluu el dekiei er ngii. Seikid a uchul me ngar er ngii a ileakl el soad el kall me a bail, me a omerelled a kuk ngodech er a rebebil er a rechad.

² Engdi ngar er ngii a tekoi el lmuut el meklou a ultutelel er a rolel a doubail me a kall el dongang. El ua tiang, sel demukeroul e kede mosisechakl el kmo a bebil el tekoi a ungil e a bebil a mekngit. Engdi ngkakerous a uldesuir a rechad el kirel a ungil me a mekngit el tekoi. Me a ukltked a dirrek el omekrael er kid sel dolilt a tekoi el doruul. A Biblia a melekoi el kmo: “A re Chisentail a dimlak le bor tir a Llach,” engdi ngsebechir el “oltirakl er a rengrir el meruul a ikel lolekoi a Llach.” (Rom 2:14) Engdi a lsekum e ngdiak a ulterekokl el llechul a Dios, e kid ngsebeched el di oltirakl a llecherir a rechad er a blid me a tekoi el lolisiich a beluu el dekiei er ngii?

3. Mosaod a eru el uchul me a Rekristiano a diak el kirir el oltirakl a uldesuir a rechad er tia el beluulechad.

³ Ngar er ngii a kesengil e ngeru el meklou el uchul me a Rekristiano a diak loruul el uaisei. A kot, e a Biblia a kmo: “Ngar ngii a rael el rengul a chad ng ungil rael, e a lechub e ng kodall a ulebengelel.” (Osi. 16:25) Kid el diak demecherrungel a uchul me ngdiak el sebeched el di kid el mo ungil el omtebechel a blekekled. (Osi. 28:26; Jer. 10:23) Ongerung, e a Biblia a kmo a Satan a “mekngit el chelid er tial beluulchad.” Me ngii a omekrael a uldesuir a rechad er tia el beluulechad el kmo ngera ungil me a mekngit e ngera el tekoi a mo merael a chisel. (2 Ko. 4:4; 1 Jn. 5:19) Me a lsekum e ngsoad a bo ledeu a rengul a Jehovah e bo lomekngeltengat er kid e ngkmal kired el oltirakl a tekoi el medung er a Rom 12:2.​—Monguiu.

4. Ngera kede mo mesaod er tia el suobel?

⁴ Tia el suobel a mo mesaod a edei el meklou a ultutelel  el tekoi el ngar er a Rom 12:2. Me a (1) Ngera uchul me ngkired el melodech a blekerdeled? (2) Ngera el tekoi a kired el melodech er ngii? E a (3) Kede mekerang e melodech a blekerdeled?

5. A Paulus ngmilluches er a uleklatk el ngar er a Rom 12:2 el mo er a rua techang?

⁵ A Paulus er sera loluches er a babilengel el mo er a rechad er a Rom er a rak er a 56, e ngdimlak loluches er ngii el mo er a rokui el chad er sel beluu. Ngmilluches er ngii el mo er a rengellitel el Kristiano el kiliei er isei. (Rom 1:7) Ngmilengelechel er tir me bo lolodech a blekerdelir e dilu el kmo: “Lak di moltirakl a blekerdelel a tekoi er tia el beluulechad.” Me a “blekerdelel a tekoi er tia el beluulechad” a mle uldimukl er a uldesuir a rechad er a Rom el kirel a ungil me a mekngit me a dirrek el siukang er tir, omerellir, me a rolel a loubail. Me a Paulus a milluches er tia el uleklatk e le te mla er ngii a rudam me a rudos el dirk ulemdasu e meruul a tekoi el ua rechad er a Rom. Te milekerang e mo uaisei a omerellir?

6, 7. Ngera el omelsemai a ble lechelebangel a Rekristiano el kiliei er a Rom er a temel a Paulus?

⁶ A rechad sel lebo losarech er a beluu er a Rom er chelecha el taem e ngsebechir el omes aike el miltemall el templo, olekull, me a meklou el blai me a btangch el mle dechor er a betok el telael el rak er a uchei. Aikang a dirrek el ngosukid el mo medengei el kmo ngmle ua ngerang a blekerdelel a klengar me a rolel a omengull er a beluu er a Rom er a irechar. Ngar er aike el babier er a reksi e kede menguiu el kirel a kdekudel el klekool el rechad er ngii a kakoad, klaidesachel er a kuruma, me a sibai me a klekool el melisiich a tekoi er a deleboes. Me a beluu er a Rom a mle merau el beluu me a rechad er ngii a mla er ngii a klou el techellir el mengereker.​—Rom 6:21; 1 Pe. 4:3, 4.

⁷ A rechad er a Rom a mla er ngii a betok el templo er tir e dirrek el milengull a betok el chelid, engdi a ruumesingd er tir a dimlak lolasem el olekes a deleuill er tir me aike el chelid er tir. Engdi ngmla er ngii a ileakl el tekoi el kmal mle kirir a rechad el meruul el ua temel a cherellel a ngalek, chebechiil, me a dirrek el kemeldiil. Aika el tekoi a mle tedebechel a klengar er tir er a bek el sils. Ngulterekokl el kmal mle meringel er a Rekristiano el kiliei er a beluu er a Rom. A rebetok er tir a milechell e mlukeroul er a chelsel a delengchokl el milengull a klsuul el chelid, me ngmle kirir el melodech a blekerdelir me bo el sebechir el mo Kristiano. Mo lmuut er a uriul er a bo lemetecholb me tir a dirk mle kirir el melodech a blekerdelir.

8. Ngera uchul me a beluulechad er chelechang a kdekudel el kirir a Rekristiano?

⁸ Me ngdi osisiu, a beluulechad er chelechang a kmal kdekudel el kirir a Rekristiano. E ngera uchul? E le tia el beluulechad a di mui er a mekngit el uldasu. (Monguiu er a Efesus 2:2, 3; 1 Johanes 2:16.) Tia el beluulechad a melasem el mengesuseu er kid el mo oltirakl a ngibeserreng, me a uldasu el kirel a ungil me a mekngit, el ngii a uchul me ngklou a techelled el mo ua rechad er tia el beluulechad. Me ngkmal kired el mo olengesenges er tia el uleklatk el kmo, “Lak  di moltirakl a blekerdelel a tekoi er tia el beluulechad, e bai bsa techellel a Dios me lukbeches a rengmiu e le ngodech a blekerdeliu.” Me kede mekerang e melodech a blekerdeled?

9. Ngera el omelodech a loruul a rebetok me bo el sebechir el mo metecholb?

⁹ A chad sel lomuchel el mesuub a Biblia e loltaut aike el lesuub er a klengar er ngii e ngmerael el mo kmes a deleuill er ngii me a Jehovah. Ngmo tuobed er sel klsuul el klechelid el lebla er ngii, e melodech er a blekerdelel a klengar er ngii. Ngblak a rengul el omekeroul er a beches el blekerdelel e dirrek el mo mesuub a blekerdelel a Jesus. (Efe. 4:22-24) Ngkmal dmeu a rengud e le rebetok el telael el chad a oltaut er tia el omeruul er a bek el rak el tuib a rengrir el mo er a Jehovah el Dios e mo metecholb. Tiang a ulterekokl el rullii a Jehovah el kmal mo dmeu a rengul. (Osi. 27:11) Engdi ngdi ikaikid a tekoi el kirel a chad el melodech e merekong?

10. Ngera uchul me a dolodech a blekerdeled e ngdiak el belkul a kmo kede di ngmodech a bebil er a omerelled e ngungiang?

¹⁰ A dolodech a blekerdeled e ngdiak el belkul a kmo kede di ngmodech a bebil er a omerelled e ngungiang. A ta el dictionary er a Biblia a mesaod er a belkul a “lukbeches a rengmiu” el ngar er a Rom 12:2 el kmo, a chad a kirel el omekbeches me a lechub e ngmelodech er a uldesuel el ousbech er a ngelsuil a chedaol klisichel a Dios. Me a lsekum a Kristiano a mla mo diak lolemolem a mekngit el omerellel me a cheldechedechal, e loruul a deleboes, e ngdiak el belkul a kmo ngmla omekbeches er a rengul. E le rebebil er a rechad el diak lodengei a tekoi el losaod a Biblia a dirrek el mengeroid er tir er aika el mekngit el omeruul. Me a leuaisei e kid el Kristiano, ngera kired el meruul me bo el sebeched el melodech a blekerdeled me a uldesued?

11. A doltirakl er a tekingel a Paulus, e ngerang a kirel a chad el melodech er ngii?

¹¹ A Paulus a milluches el kmo: “Bsa techellel a Dios me lukbeches a rengmiu e le ngodech a blekerdeliu.” Ngar er tia el bades e a tekoi er a Grik el moiuid el “blekerdeliu” a mesaod er sel duch er kid el omdasu a tekoi. Me ngar er a Biblia e tiang a uldimukl er a tekoi el soad el melatk, blekerdeled me a duch er kid el melebedebek a tekoi. Ngar er a uchelel a babilengel el mo er a ongdibel er a Rom e ngmilsaod er a rechad el mle ‘mekikiongel a uldesuir’ e le te “kmal mlo imis er a bek el bedengel a chelebirukel, ma delengerenger, ma ngibes, ma delebsochel.” Te dirrek el “kmal di mle mechechei, e ngar a koadelchad, e kautok, e mengeblad” me a lmuut el bebil er a mekngit el blekeradel. (Rom 1:28-31) Me ngsebeched el mesa sel uchul me a Paulus a milengelechel er a Rekristiano el kiliei el teloi er tirka el chad me bo lolodech a uldesuir.

12. Ngerang a uldesuir a rebetok el chad er chelechang? E ngera uchul me tia el uldasu a kdekudel el kirir a Rekristiano?

¹² Ngklengiterreng, e le rebetok el chad er a beluulechad a omdasu a tekoi el ua lulsaod a Paulus. Te omdasu el kmo a otireklel a llach el kirel a tekoi er a kldung a kmal tekoi er a irechar, e dirrek el diak el kirel a ta er a chad el  orrimel er a rebebil el mo kiei el oltirakl ngii el llach. A rebetok el sensei me a ruungalek el chad a di mechititerir a rengalek me te di meruul aike el sorir. Te dirrek el olisechakl er tir el kmo kede rokui el ngar er ngii a ilmekled el melilt el kmo ngera ungil me a mekngit. Chouaitirka el chad a oumerang el kmo ngdiak a rolel e bo dodengei el kmo ngera ungil me a ngera mekngit. Te dirrek el ngar er ngii a rebetok el melekoi el kmo te oumerang er a Dios engdi te omdasu el kmo ngdiak a ultutelel a loltirakl a llechul. (Psa. 14:1) E tia el uldasu a kmal kdekudel el kirir a Rekristiano. Me a lsekum e ngdiak dekerekikl e ngsebeched el mo diak doltirakl a ulekrael el lomeskid a cheldebechelel a Dios, e dirrek el di mo mengeremrum el kirel aike el tekoi el mo mekngit er a uldesued. Me a lechub e ngsebechel el mo mekngit a uldesued el kirel a uleklatk el dengai el okiu a Bades el kirel a tekoi er a ongelaod, usbechel a Internet, me a ngarbab el skuul.

13. Ngera uchul me ngkired el mo ungil el merriter el kmo kede ua ngera el chad?

¹³ A lsekum e ngdiak el soad el “oltirakl a blekerdelel a tekoi er tia el beluulechad,” e ngkired el mo ungil merriter er kid el kmo kid kede ua ngera el chad. Ngkired el mo ungil el merriter aike el dmolech el uldesued, tekoi el domdasu el mo meruul, me a uldesued el kirel a ungil me a mekngit. A rebebil a locha diak lungil medengelkid me ngsebechir el mo chemat er kid el kmo ngkmal ungil a blekerdeled. Engdi kid a di kid el medengelkid el kmo kede dirk melemolem el mechei aike el tekoi el desuub er a Biblia me ngmelodech a blekerdeled me a lechub e ngmla mo diak.​—Monguiu er a Jakobus 1:23-25.

14. Ngera sebechel el ngosukid el mo medengei aike el blekerdeled el kired el melodech?

¹⁴ Ngkired el melodech aike el dmolech el tekoi el ngar er a rengud, el ngii aike el mera el blekerdeled. Ngerang a ngosukid el mo meruul el uaisei? Sel dosuub er a Biblia, e kede suubii el kmo ngua ngera el blekeradel a soal a Jehovah a bo dobang. Me a uldesued el kirel a tekoi el donguiu er a Biblia a ngosukid el mo ungil el medengei el kmo ngera ngar er a chelsel a rengud. Ngokiu tiang e kede mo medengei el kmo ngera kired el melodech me bo el sebeched el meruul a soal a Dios.​—Rom 12:2; Heb. 4:12.

15. Kede mo ua ngera el chad sel lolodech er kid a Jehovah?

¹⁵ Monguiu er a Isaia 64:8. A okesiu el ledillii a Isaia a osisecheklid er a klou a ultutelel el tekoi. Kid a ua chutem e a Jehovah a ua chad el omeob a chutem. Me sel lomeob er kid e ngdiak lolodech er a bedenged. Ngbai melodech a blekerdeled me a rengud. Me a lsekum e kede kongei er ngii e ngmo ngosukid el mo melodech a blekerdeled, uldesued me a rengud. E tiaikid a tekoi el dousbech er ngii me bo el sebeched el oltngakl a omengesuseu er tia el beluulechad. Ngmekerang a Jehovah a lolodech a blekerdeled me a rengud?

16, 17. (a) Ngmekerang a chad el omeob a bekai e rullii a chutem el mo sebechel el ousbech er ngii el mebii a mekreos el bekai? (b) Ngokiu a ngera el rolel e a Tekingel a Dios a rullid el mo mekreos er a osengel a Jehovah me ngmo sebechel el ousbech er kid?

¹⁶ A lsekum a chad a omeob er a klebokel el bekai, e ngkirel el ousbech er a kmal ungil el chutem. Me ngar er ngii a eru el tekoi el kirel el meruul er a uchei er a lomeob er a bekai el ousbech er tia el chutem. A kot e ngkirel tia el chutem el mekikiid el mo diak a besbas er ngii. E dirrek el kirel el ousbech a ungil a ildisel el ralm el meremet er ngii e merderd er ngii el rullii me ngmo beot er a chad el omeob er ngii.

¹⁷ A chad el omeob a bekai a diak di lousbech er a ralm el mengikiid er a chutem e ngdirrek el ousbech er ngii el meruul er a chutem me ngmo beot el lobeob. Seikid e ngmo sebechel el meob a soal el bekai el uldimukl er aike el kmal okedeldaol el bekai. Me a Tekingel a Dios a sebechel el melodech a blekerdeled el di ua ralm el sebechel el rullii a chutem el mo beot  el obeob. Sera domuchel el mesuub el kirel a Dios, e a Biblia a ngilsukid el mo diak domdasu el ua beluulechad e ulemuchel el mo omdasu el ua Dios. Me ngmlo sebechel el melodech a blekerdeled el mo ua mekreos el bekai el sebechel el ousbech er ngii. (Efe. 5:26) Ngbetok el taem el de muklatk el mo menguiu er a Biblia er a bek el sils e mo er a bek el miting er a Rekristiano. Ngera uchul me ngkired el meruul aika el tekoi? E le doruul e kede kongei er a Jehovah me ngmelodech a blekerdeled.​—Psa. 1:2; Rel. 17:11; Heb. 10:24, 25.

18. (a) Ngera uchul me ngkired el melebedebek a Tekingel a Dios a lsekum e ngsoad a lolodech a blekerdeled? (b) Ngera el ker a sebechel el ngosukid el meruul er tia el tekoi?

¹⁸ A lsekum e ngsoad a Tekingel a Dios a lolodech a blekerdeled, e ngar er ngii a lmuut el bebil er a tekoi el kired el meruul el diak di el omengiued me a omesubed e lemerekong. A rebetok el chad a menguiu er a Biblia e dirrek el medengei a betok el tekoi el losaod. Ke locha mla metik er chouaitirka el chad er a taem el moldingel a obliil. Te ngar er ngii a rebebil er tir el mla mo chausbengdik a bebil er a bades er a Biblia. * Engdi tiang a diak lengedechii a uldesuir me a rolel a klengar er tir. E ngerang? E le Tekingel a Dios a di sebechel el melodech a blekerdelel a chad a lsekum e ngmera el mo rutechii a rengul ngii el chad. Ngkmal kired el melebedebek aike el tekoi el desuub er a Biblia. Ngkired el di kid el oker el kmo: ‘Ngak a kuumerang el kmo tiang a diak di losisecheklel a klechelid e lemerekong? Ak mla mes a tekoi el duubech er a klengar er ngak el meketeklii el kmo tiaikid a klemerang? Ak kultaut er a klengar er ngak a tekoi el kusuub el diak di kulisechakl el mo er a rebebil e lemerekong? Ak kuumerang el kmo a tekoi el kusuub a mla er a Jehovah el mei el ua longedecheduch er ngak?’ Sel dolebedebek chouaika el ker e ngsebeched el lmuut el mo kmeed er a Jehovah. Me a tekoi el dosuub sel lebo leretechii a rengud e ngmo soad el melodech er a klengar er kid el mo oldeu er a rengul a Dios.​—Osi. 4:23; Lk. 6:45.

19, 20. Ngmo uchul a ngera el klungiaol sel doltaut a uleklatk er a Biblia?

¹⁹ Sel deblechoel el menguiu er a Biblia e dolebedebek er ngii, e ngmo ngosukid el ‘medebedii el mo mecherei sel di mla klengar er kid el obengkel a omerellel’ e ‘milid er a beches el klengar.’ (Kol. 3:9, 10) Me a lsekum e kede mo ungil el medengei a osisecheklel a Biblia e oltaut aike el desuub, e ngmelisiich er kid el mo olecholt a blekerdelir a Rekristiano me ngmo diak dobedikl er a bedeklel a Satan.