A rebebil a merort a chebechiielir el melatk el mo rullii a klengar er tir el mo ungil, e a rekuk bebil a sorir el di melemolem el bechiil engdi ngdiak el sebechir el rulleterir a rebecherir me lolemolem el kiei. Nguaisei, engdi oumesingd er tirke el medort a chebechiielir a metik el kmo a klengar er a uriul a lmuut el meringel er sel lulemdasu er ngii. A mera er ngii, a lsekum e ngdirk mildort a chebechiielem, e ke locha mo metik er ngii el ta er a kot el uchul a sebekreng. Me a leuaisei, e ngungil a bo momtab a bebil el ungil el ulekrael er a Biblia el sebechel el ngosukau el mo outekangel aike el omelsemai er a dertel a chebechiil.

A sebekreng el kirel a mondai er a udoud, okurulir a rengalek, me a klsabisi a sebechel el kmal mo oberaod, e aika el uldasu a diak di lemereched el mo dibus er a uldesued. A mla mo smecher el Judith Wallerstein el toktang er a uldasu a miltik el kmo, betok el rak er a uriul er a dertel a chebechiil, e a rebebil a dirk omelechesiu er tir el ua bla lemecheblad e lemlechoit, e oumerang el kmo “a klengar a diak el tabesul, e uchul a klengiterreng me a klsabisi.”

TEKOI EL SEBECHEM EL MERUUL

• Ngsebechel mo mekngit a rengum er a tekoi el ririid. Ke locha dirk melatk el kirel a chelmengem el dirk betik a rengum  er ngii. Alta e a deleuill er kemiu a mlo uchul a ringel, engdi ngsebechem el mo mekngit a rengum e le ngdiak sel deurreng el mullatk er ngii el ngar er a chebechiil. (Osisechakl 5:18) Me lak bo merur el mecherei a taem el kirel a “belsechel a klengiterreng.”​—Olisechakl 3:1, 4.

• Lak mongeroid er kau er a rechad. Me alta ngkirem el di mo kau el tang el kirel a kngtil a rengum, engdi ngdiak lungil a omongeroid er kau er a rebebil el kemanget el taem. (Osisechakl 18:1) Mousbech a tekoi el melisiich a omongedecheduch er a resechelim, e le oblechoel el mengeremrum el kirel a mle bechim, alta e ngar er ngii a ungil el uchul, engdi ngsebechel el mo uchul e a rechad a mo chetirir el obengkem. A lsekum e ngkirem el di mereched el meruul a meklou a ultutelel el omelilt er a uriul er a dertel a chebechiil, e bo molengit a ngeso er a chad el moumerang er ngii.

• Momekerreu er a klisichel a bedengem. A sebekreng er a dertel a chebechiil a blechoel el mo uchul a secherel a bedenged el ua high blood me a bingsbedul. Bo lungil omengelem, e molisiich a bedengem, e bo lungil a cheliuem.​—Efesus 5:29.

• Mngai el chemoit aike el uchul a klsbengel a rengum el kirel ngike el mle bechim me a lechub aike el diak mousbech, engdi mketmokl aike el meklou a ultutelel el babier. A lsekum a klalo el ua siasing er a merengel a chebechiil a mo uchul a kngtil a rengum, e mlecha er a baks e mketmokl el kirir a rengelekem.

• Bo mesisiich er a uldasu el mengitechut. A Olga, el dilertii a chebechiielel er a uriul er a lerebet er a laokreng a bechil a dilu el kmo: “Ak di mle blechoel el oker el kmo, ‘Ngera ngar ngii er ngika el redil el diak er ngak?’” Me a uriul, e a Olga a mlo melechesuar el kmo a lolemolem el melatk aike el uldasu el mengitechut e ngsebechel el mo uchul a “chelemuul el reng.”​—Osisechakl 18:14.

A rebetok a metik el kmo a loluches a ngar er a uldesuir e ngosuterir el mo omeketakl e omtebechel aike el lomdasu. Me a lsekum e ke meruul er tiang, e molasem el omtechei aike el mengitechut el uldasu er a beches el uldasu el sebechel el melisiich. (Efesus 4:23) Ka molatk aika el eru el tekoi:Dimla Uldasu: Ngak a mle uchul a kngtil a bechik er a chebechiil.Beches el Uldasu: A chelitechetuk a dimlak lebsa bechik a llemeltel el mo mengeblad er ngak.Dimla Uldasu: Ak chiloit a kmal ungil rak er a klengar er ngak el obengkel a chad el dimlak lungil kldemek.Beches el Uldasu: Ngbai mo dmeu a renguk a kumes el beduluchei er a klengar, el diak el beduluriul.

• Lak momtab a medung el tekoi el uchul a ringel. A rungil a uldesuir el sechelid me a rechedad a locha mo dmung a tekoi el uchul a kngtil a rengud e dirrek el diak el melemalt el kirel a tekoi el dilubech el kmo: ‘Ngika el redil a dimlak lungil el kirem’ me a lechub ‘A Dios a ouketui a dertel a chebechiil.’ * Me ngar er ngii a ungil el uchul e a Biblia a melekoi el kmo: “Lak di morrenges a bek el tekoi el lolekoi a rechad.” (Olisechakl 7:21) A Martina el mildort a chebechiielel el eru el rak a kmo: “Ngdiak di kulatk a tekoi el tomellii a renguk, ak bai melasem el omes a tekoi el oba osengel a Dios. A uldesuel a lmuut el ngarbab er a uldesued.”​—Isaia 55:8, 9.

• Moluluuch el mo er a Dios. Ngmelisiich er a remengull er ngii el mo ‘oterekokl a ikel rokui el tekoi el suebek a rengrir er ngii,’ el ileakl sel lechelebangel a ringel.​—1 Petrus 5:7.

A Juliana el mle bechiil el 11 el rak a kmo: “Ak ullengit er a bechik me di lekiei el obengkek. Engdi uriul er a lorael e ngkmal mlo kesib a renguk er ngii me ngike el redil el blo lekiei el obengkel.” A rebetok el chad el medort a chebechiielir a melemolem el kesib a rengrir er a remle becherir el  betok el rak. Me nguaisei engdi ngkirir el blechoel el chadecheduch el ileakl a lsekum e ngar er ngii a rengelekir.

TEKOI EL SEBECHEM EL MERUUL

• Molemolem er a ungil el deleuill el obengkel ngike el mle bechim. Di mosaod a meklou a ultutelel el tekoi e bo el kedeb e lebleketakl a cheldechedecham. A rebetok el chad a mla metik el kmo tiaikid el rolel a cheldecheduch a mo uchul a budech.​—Rom 12:18.

• Lak molekoi aike el tekoi el melemall er a rengul a chad. Me a lsekum e ke omelechesiu er kau el ngosecha rengum, e a mellomes el ulekrael er a Biblia a kmo: “Ngikel diak di longedecheduch a ngar ngii a klemedengei er ngii.” (Osisechakl 17:27) Me a lak el sebechem el lomelemii a ungil el cheldecheduch, e ngsebechem el melekoi el kmo: “Ngkirek el mo omdasu aike el tekoi el bla mdung e mo mengedecheduch er kau er a uriul.”

• Molasem el imakl aike el tekoi el kirel a dimla chebechiielem el ngii a tekoi er a llach, udoud me a rekord er a ukeruul.

A Maria a dirk melatk er a blekeradel er a uriul er a lemedort a chebechiielel el kmo: “Ngike el kekerei el ngelekek el redil a di mle blechoel el lemangel e liluut el mo mengemochem er a dukllel. E ngike el klou el ngelekek el redil a millasem el omart a tekoi el ngar er a rengul, engdi ak milsa blekerdelel el mla mengodech.” Ngklengiterreng e le ke locha mo omelechesiu er kau el diak a temem me a klisichem el mo ngosuterir a rengelekem er sel taem el lesal ousbech er kau.

TEKOI EL SEBECHEM EL MERUUL

• Molisiich er a rengelekem me louchais er kau aike el ngar er a rengrir, alta ngmo ‘mechas a rengum er a tekoi el lolekoi.’​—Job 6:2, 3.

• Mruul a ngerechelem. Me alta e ke oureng a ngeso er a uldasu e a ngelekem a kora soal el ngosukau, engdi tiang a diak el melemalt e dirrek el diak el ungil er a okurulel a ngalek a omolengit er ngii el kirel a ngeso er a mondai er a remeklou el chad. (1 Korinth 13:11) Lak mrellii a ngelekem el mo blil a bertelem me a lechub e bo el oderuchel er a delongelem kau me ngike el mle bechim.

• Mlemelemii sel mle blekerdelel a klengar er a ngelekem. A omolemolem el kiei er a osisiu el blai e moltirakl er a osisiu el blekerdelel a klengar a ungil, engdi nglmuut el klou a ultutelel a omolemolem el meruul a tekoi el melisiich er a deleuill er kemiu el obengkel a Dios, el uldimukl er a omengiuel a Biblia me a omengull el telungalek.​—Duteronomi 6:6-9.

Ngsebechem el lomelemii a klengar er kau er a uriul er a dertel a chebechiil. A Melissa, el mle bechiil el 16 el rak a kmo, “Sera lemedort a chebechiielam, e ak ulemdasu el kmo, ‘Ngdimlak el soak a klengar er ngak a bo el uaisei.’” Engdi chelechang e ngmla metik a deurreng er a chelsel a klengar er ngii. Ngmelekoi el kmo, “Ngkmal mla mo ungil a renguk e le ngdikea kulasem el melodech a tekoi er a ngar er a mong.”