A Naoko el dulsaod er ngii er a uchei a ouchais er a rolel e ngchilitii a omelamech el dekool el kmo, “Ngmlo sebechek el ngodechii a klengar er ngak e le ak silubii a klemerang el kirel a blekerdelel a Dios me a moktek er ngii.” Me a tekoi el lesiluub a debetik er a chelsel a Biblia. Me alta e a Biblia a diak a ta el taem el losaod el kirel a dekool, engdi ngsebechel el ngosukid el mo medengelii a uldesuel a Dios el kirel a omelamech el dekool. * Me a rebetok el chad a mle kirir el mo medengelii tia el tekoi me bo el sebechir el mo oltngakl me a lechub e te mo choitii tia el tekoi el bla bo el sau er ngii. (2 Timothy 3:16, 17) Me bo dosaod a edei el bleketakl el telemellel a omelamech el dekool e bo dodengei el kmo ngua ngera omesodel a Biblia el kirel ngii el tekoi.

Ngar er ngii a klekedall el ngar er a chelsel a dekool el ngklel a nicotine. Ngsebechel el rullii a chad el mo mesisiich a bedengel me a lechub e ngrullii a chad el mo ua lemechitechut a bedengel. Sel ta el detimetmii a dekool e a nicotine a di mereched el soiseb er a no er a bdelud. Me a chad el melamech a chimo el blil a dekool er a ta el sils a osiseb a nicotine er a bedengel el 200 el taem, el ngii a kuk betok er a ngii di el ildisel a kar el ousbech a chad er a chelsel a ta el sils. Me tiaikid el usbechel a nicotine a rullii a chad el kmal mo smau el ousbech er ngii. Me a chad el meksongii er tia el klalo a rullii a bedengel el mo osiik er ngii er a bek el taem.

A Biblia a ngosukid el meklemeltii a uldesued el kirel tia el tekoi sel ledu el kmo: “Kom ungil el medengei el kmo sel bo msibai, el orrenges er a tar a chad, e kom mla mo sibil ingikel chad el cho morrenges er ngii.” (Rom 6:16) Me a lsekum a uldesuel a chad a mocha oureng er a dekool, e seikid e ngdi mereched el mocha sibil a dekool. Me nguaisei, engdi a Dios el Jehovah a ngklel, * a kmal soal a bo demimokl er a ngii di el omeruul el tomellii a bedenged e dirrek el sebechel el tomellii a rengud me a uldesued. (Psalm 83:18; 2 Korinth 7:1) Me a chad sel lokurulii a omereng el saul er ngii me a omengull er ngii el mo er a Jehovah, e ngmo medengei el kmo ngkirel el msang a Jehovah aike el kot el ungil er ngii e dirrek el mo medengei el kmo ngdiak el sebechel el meruul er tiang a lsekum ngmelemolem el sibil tia el mekngit el omeruul. E tia el klemedengei er ngii a rullii me ngmo sebechel el oltngakl er a mekngit el ngelbesel a rengul.

A Olaf el kiei er a beluu er a Germany a ulemuchel el melamech a dekool er a le 12 a rekil e chilitii ngii el tekoi er a uriul er a 16 el rak. Ngulemdasu el kmo ngdiak a telemellel a lolamech a di chimo el dekool, engdi cherengel a taem e ngkmal mlo meringel er ngii el choitii tia el omeruul. Me ngdilu el kmo: “A ta el taem e ak kmal mlo oureng el melamech a dekool e dimlak a chemelek me ak ngilai a rokui el ulout er a dekool el mla er a chelsel a ashtray e odak el rokui e milii er a telkib el simbung e melamech er ngii. Ak kmal imis el merur er tia el omerellek.” Ngmilekerang e choitii tia el tekoi? Ngdilu el kmo: “Sel kot el ngarbab el uchul e ngmlo diak kulamech a dekool a sel urungulek el mle soak el oldeu er a rengul a Jehovah.  A bltkil a rengul a Jehovah el kirel a klechad me a omelatk el lebeskid a milskak a klisichek el mo sebechek el choitii tia el mekngit el omerellek.”

A babier el The Tobacco Atlas a mesaod el kmo, a omesubel a science a mla oterekeklii el kmo a omelamech el dekool a “sebechel el tomall a bek el klekedellel a chelsel a bedenged e dirrek el ongesecheklii a ildisel a secher me a kodellir a rechad.” Kede dirrek el medengei el kmo tia el tekoi a uchul aike el diak el bekoiueiuul el rakt el ua kasinoma, secherel a chaidirengud, me a telemellel a chedengad. Engdi a doltirakl er a tekoi el tilobed er a World Health Organization (WHO), e a omelamech el dekool a ta er a kot el klou el uchul a omekodall e bekoiueiuul el rakt el ua tuberculosis.

Ngokiu a Tekingel a Jehovah el Biblia e ngolisechakl er kid el mo tabesul a osenged el kirel a klengar er kid, bedenged, me a uldesued. A Ngelekel el Jesus a dilu el kmo: “Bo le betik a rengum er a Rubak el Dios er kau er a rengum el rokir, ma klengar er kau el rokir, ma uldesuem el rokir.” (Mateus 22:37) Me ngbleketakl el kmo a Dios a soal a bo dungil el omekerreu er a klengar er kid me a bedenged. Me sel dosuub el kirel a moktek er a Jehovah me aike el telbilel e ngmukeroul a bltkil a rengud el mo er ngii e mo omes a rokui el tekoi el loruul el mekreos. E tiang a rullid el mo soad el mengikiid er kid er a ngii di el tekoi el sebechel el kikingelii a bedenged.

A toktang el Jayavanth er a beluu er a India, a millamech a dekool el 38 el rak. Ngdilu el kmo: “Ak mlo medengei a telemellel a omelamech el dekool el okiu a omesubek er a babier er a ukeruul. Ak mle medengei el kmo ngmekngit, e dirrek el ulemeklatk er a rechad el mei er a ukeruul me bo longoit er ngii. Engdi ngak me ak dirrek el millasem el mengoit er ngii el betok er a eim el taem e dimlak el sebechek el choitii.” Me ngera rirellii me ngmlo sebechel el choitii? Ngdilu el kmo: “A omesubek er a Biblia a rirellak el mo sebechek el choitii. Me sel urungulek el mlo soak el oldeu er a rengul a Jehovah a silsichak me ngmle sebechek el mereched el choitii tia el tekoi.”

A chetul a dekool a dok. Me sel douteliil er ngii e ngsebeched el mo smecher er a kasinoma me a lmuut el bebil er a secher. Me a bek el rak, e te bekord el 600,000 el chad el diak lolamech a dekool a mad e le te outeliil a chetul a dekool, el oumesingd er tir a redil me a rengalek. A report el tilobed er a WHO a melekoi el kmo: “Ngdiak el sebeched el melungel a chetul a dekool e lak demetemall.”

A Jesus a milsaod el kmo a bltikerreng el mo er a rengar bita er kid, el tir a telungalek er kid, resechelid, me a rechad  el kiei el iliuekl er kid a ongeru el klou a ultutelel el uleklatk el okiuellel a bltikerreng el mo er a Dios. Ngdilu el kmo, “Bo le betik a rengum er a ngar bitar kau el ua le betik a rengum er kau.” (Mateus 22:39) A lsekum kede mo blechoel el meruul a tekoi el melemall er tirke el kmeed er kid, e ngkmal diak lolechotel a bltikerreng el mo er a rengar bita er kid. Me a bliochel el bltikerreng a rullid el mo oltirakl er a uleklatk er a Biblia el kmo: “Lak a chad el omdasu er a di ungil er ngii, e bai lomdasu er a ungil er a re bebil er a re chad.”​—1 Korinth 10:24.

A Armen el kiei er a beluu er a Armenia a melekoi el kmo: “A rechad er a blik a ullengit er ngak me kchitii a omelamech el dekool e le ngmla er ngii a letemellii er tir. Engdi ngak a dimlak kengei el kmo tiang a ngar er ngii a letemellii er tir.” Ngmilsaod er a uchul e ngmlo sebechel el ngodechii a uldesuel el kmo: “A klemedengei er ngak er a Biblia, me a bltkil a renguk el mo er a Jehovah a ngilsukak el mo choitii a omelamech el dekool e mlo kongei el kmo tia el omeruul a dimlak di lolemall er ngak e ngdirrek el tomelleterir tirke el rokui el kiei el iliuekl er ngak.”

A klemedengei el kirel a Biblia a ngilsuir a Olaf, Jayavanth, me a Armen me ngmlo diak loruul er tia el mekngit el omeruul el ngii a melemall er tir me a rebebil. Me tir el mlo mesisiich er tia el tekoi a diak lebelkul a kmo te mle medengelii a telemellel. Te mlo mesisiich er ngii e le ngbltkil a rengrir el mo er a Jehovah me sel urungulir el mlo sorir el oldeu er a rengul a uchul. Me a klungel a ultutelel tia el bltikerreng a medung er a 1 Johanes 5:3 el kmo: “Ele bltikerreng er a Dios a belkul a kmo kede oltirakl a llechul. E a ikeikid el tekoi a diak lesal meringel er kid el meruul.” Nguaisei, a otireklel a omellach er a Biblia a diak lebeot el tekoi, engdi a lsekum a chad a mo betik a rengul er a Dios, e ngmo beot er ngii el olengesenges.

Me ngoeak a berkel a klumech e a Jehovah a olengeseu er a rebetok el miliol er a beluulechad el rokir me ngmo diak el sibil a omelamech el dekool. (1 Timothy 2:3, 4) Me ngkmal di kmedung e a Jehovah a mo ousbech er a Rengedel, el ngii a kabelment el ngar er a eanged el longedereder er ngii a Jesus, el mo okngemed aike el rokui el rolel a oterullel a dekool el uchul me a rebetok el miliol el chad a sibil a omelamech el dekool. Ngmo okngemedii a omelamech el dekool e omekungil er a rebekongesenges el chedal me bo el cherrungel a bedengir me a uldesuir.​—Isaia 33:24; Ocholt 19:11, 15.

A lsekum ngmeringel er kau el mengoit er a omelamech el dekool, e lak bo lemechitechut a rengum. Sel mosuub el mo betik a rengum er a Jehovah e bo modengelii a uldesuel el kirel a omelamech el dekool e ngmo sebechem el mengoit er tia el mekngit el omeruul. Me a Resioning er a Jehovah a kmal dmeu a rengrir el ngosukau el mo mesuub e dirrek el mo oltaut a omellach er a Biblia. Bo lulterekokl a rengum el kmo a lsekum ngsoam a lolengeseu er kau a Jehovah el mo choitii a omelamech el dekool, e ngmo meskau a klisiich el mousbech er ngii.​—Isaia 12:2.