1. Ngera uchul me ngkired el mereng a sulel a Jehovah?

 A JEHOVAH a meskid a “bek el ungil e cherrungel sengk.” (Jak. 1:17) Ngdi ua betik a rengul el Mengkerengel a Sib el kerekikl el omekerreu er kid e meskid aike el dousbech. (Psa. 23:1-3) Me ngkmal kired el mereng a sulel! Ngii a “omderungel er kid e klisiched,” el ileakl er a chelsel aike el taem el decharm. (Psa. 46:⁠1) Me kede di ua uldesuel ngike el milluches er a psalm el dilu el kmo: ‘Moreng a sulel a Jehovah ele ngii a ungil, a bltkil a rengul a diak a ulebengelel.’​—Psa. 106:1.

2, 3. (a) Ngera sebechel el duubech a lsekum ngmo diak doba omereng el saul? (b) Ngera el ker a bo dosaod er tia el suobel?

² Ngera uchul me ngklou a ultutelel a doreng a saul? E le rebetok er chelechang a diak loreng a saul, el ua ulaoch el mildung er a uchei. (2 Ti. 3:2) Ngdiak loreng a sulel a Jehovah el kirel aike el ungil el tekoi el bla leruul el mo er tir. Tia el beluulechad el dekiei er ngii a melisiich er a rechad el mo omechar a betok el klalo el diak lousbech. Tiaikid a uchul me a rebetok a diak lungilbesul er a rengrir aike el ngar er ngii er tir. Me a lsekum ngdiak dekerekikl, e  ngsebeched el mo ua rechad er a Israel er a irechar el mo diak doba omereng el saul el kirel a deleuill er kid me a Dios me aike el ungil el tekoi el bla leruul el kired.​—Psa. 106:7, 11-13.

³ Ka di molatk a tekoi el sebechel el duubech er sel taem el bo dechelebangel a kmal meringel el mondai. Ngsebechel el kmal mo meringel a mondai er kid me kede di mo mechesang el melatk er ngii e mo diak dolatk aike el ungil el tekoi el bla leruul a Dios el kired. (Psa. 116:3) Me kede mekerang e melemolem el olecholt a omereng el saul? E mekerang e mo ungil a uldesued, alta kede chelebangel er a meringel el blekeradel? Me bo dosaod.

4. Kede mekerang e melemolem el olecholt a omereng el saul?

⁴ Ngar er ngii a tekoi el kired el meruul me dolemolem el oba omereng el saul. A kot e ngkired el melasem el omtab aike el ungil el tekoi el bla leruul a Jehovah el kired. E sola e ngkired el melebedebek el kmo, aika el tekoi ngmekerang e ochotii a bltkil a rengul a Dios el me er kid. A ta er a milluches er a psalm a mirruul el uaisei e mlo mechas a rengul er aike el betok el ungil el tekoi el lurruul a Jehovah el mo er ngii.​—Monguiu er a Psalm 40:5; 107:43.

5. Ngera kede suubii el kirel a omereng el saul er a apostol el Paulus?

⁵ A kerebil a apostol el Paulus a sebechel el ngosukid el mo oba omereng el saul. Kede medengei el kmo ngmillatk aike el ungil el tekoi el lurruul a Dios el kirel, e le ngmle blechoel el meluluuch el mereng a sulel. A Paulus a mle medengei el kmo, a uchei e ngmle chad el di “millekoi a mekngit” e “uleldechelakl, e uleltuub.” Me ngmle dmeu a rengul e le Dios me a Kristus a kilengei el ousubes er ngii e milsa techellel el mo omerk er a klumech el mo er a rebebil. (Monguiu er a 1 Timothy 1:12-14.) Ngdirrek el uleba omereng el saul el kirir a rekldemel er a klaumerang me ngmle blechoel el mereng a sulel a Jehovah el kirel a ungil el omerellir me a blakerreng er tir er a omesiungir. (Fil. 1:3-5, 7; 1 Th. 1:2, 3) Ngmirreng a sulel a Jehovah el kirel a ngelsurir er aike el taem el lechillebangel a ringel. (Rel. 28:15; 2 Ko. 7:5-7) Me ngdiak el mechas a rengud er a uleklatk er a Paulus el mo er a Rekristiano el kmo: “Lak mobes a sulel a Dios. . . e mkaosisechakl e mkellach . . . e mongitakl el olab a tekoi er a Chedaol Llechukl, . . . el oldanges e mereng a sulel a Dios.”​—Kol. 3:15-17.

6. Ngera el ungil el tekoi a bla leruul a Jehovah el kirem?

⁶ Kede mekerang e oukerebai er a Paulus? Ngungil a bo dolebedebek aike el tekoi el bla leruul a Jehovah el kired. (Psa. 116:12) Me ngera ke mo dmu er a chad el oker er kau el kmo: “Ke oba omereng el saul el kirel a ngera el tekoi el bla leruul a Jehovah el kirem?” Ke mo dmu el kmo, ngsel mekreos el deleuill er kau me Ngii? Me a lechub e ngklausubes el kirel a klengit el mei el okiu a olubet el tengetengel a Kristus? Me a lechub e te rudam me a rudos er kau el ngilsukau er a taem er a chelebulem? Me a lechub e ngchebechiielem me a rengelekem? Bo mungil el melebedebek aike el betok el rolel el bla lomekngeltengat er kau a Dios. Tiang a mo rullau me ngsoam el mereng a sulel er a bek el sils.​—Monguiu er a Psalm 92:1, 2.

7. (a) Ngera uchul me ngkired el meluluuch el mereng a sulel a Jehovah? (b) Tiang ngmo uchul a ngera el klungiolem?

⁷ Sel dolebedebek a betok el klengeltengat el bla lebeskid a Jehovah, e ngrullid me ngmo soad el meluluuch el mereng a sulel. (Psa. 95:2; 100:4, 5) A rebebil a di ousbech a nglunguuch el olengit aike el sorir er a Dios. Engdi a Jehovah a dmeu a rengul sel doreng a sulel el kirel aike el  tekoi el bla leruul el kired. Ngar er a chelsel a Biblia e ngsebeched el menguiu a betok el nglunguchir a remesiungel a Dios el ua Hana me a Hesekia el tir a milluluuch el mereng a sulel a Jehovah. (1 Sa. 2:1-10; Isa. 38:9-20) Me ngungil el moukerebai er tir el mereng a sulel a Jehovah el kirel aike el tekoi el bla leruul el kirem. (1 Th. 5:17, 18) Sel moruul el uaisei, e ngmo dmeu a rengum, e mukeroul a bltkil a rengum el mo er a Dios me ke melemolem el sechelil.​—Jak. 4:8.

8. Ngera sebechel el rullid el mo diak doba omereng el saul?

⁸ Ngera uchul me ngkired el kerekikl me lak doridii a omereng el saul er kid el kirel a ungil el omerellel a Jehovah? E le kid el diak demecherrungel e dirrek el uldiukes er a blekerdelir a rekot el demad me a delad el tir a dimlak loreng a saul. A Jehovah a milsang a Adam me a Eva a baradis el chutem el mo delengcheklir e milsterir aike el rokui el luluusbech, me ngmle sebechir el kiei el ngar er a budech el diak a ulebengelel. (Gen. 1:28) Engdi ngdimlak loba omereng el saul el kirel aika el ungil el tekoi, te bai mlo nguibes a rengrir el sorir a lmuut el betok. E tia el omerellir a mlo uchul e te urriid a rokui el klungiaol el lengilai. (Gen. 3:6, 7, 17-19) Me kid a kiei er a chelsel a beluulechad el diak loreng a saul me ngsebechel el mo uaisei a uldesued. Ngsebeched el mo mechesang a tekoi er tia el beluulechad me ngmo diak doba omereng el saul el kirel a tekoi el bla lebeskid a Jehovah, el ua kmes el deleuill er kid el obengkel me a techelled el mo chedal tia el klodam er kid er a beluulechad el rokir. (1 Jn. 2:15-17) Me ngkmal klou a ultutelel el deblechoel el melatk a betok el klengeltengat er a Jehovah el me er kid, e doreng a sulel el kirel tia el techelled el mo ta er a rechedal.​—Monguiu er a Psalm 27:4.

9. Ngera uchul me ngkired el melatk a ungil el omerellel a Jehovah el me er kid er a taem er a omelsemai?

⁹ A omereng el saul er kid a ngosukid me ngsebeched el outekangel er a taem er a omelsemai. A lebebil er a taem e ngduubech a tekoi el rullid el kmal mo mekngit a rengud, el ua sel sekum a bechid a ruebet er a laokreng, me a lechub e kede kmal mo smecher, me a lechub e ngmad a betik er a rengud, me sel lengar er ngii a klou el telemellel a beluu. Sel dolebedebek a ungil el omerellel a Jehovah el me er kid e ngmo mechelaod a rengud me ngmo sebeched el outekangel. Ka molatk aika el tekoi el dilubech.

10. Ngmilekerang e mongeseu a Irina e le ngii el millatk a ungil el omerellel a Jehovah el mo er ngii?

¹⁰ A Irina el ta er a regular pioneer er a beluu er  a Merikel a mle bechil a ta er a remechuodel er a ongdibel el mlo er a laokreng e chilitii ngii me a rengelekel. * Me ngmekerang a Irina e melemolem el blak a rengul el mesiou er a Jehovah? Ngdmu el kmo: “Ak oba omereng el saul el kirel a bltkil a rengul a Jehovah el me er ngak. Me ngak el melasem el melatk aike el ungil el tekoi er a klengar er ngak a uchul me ngdiak kubes er sel ileakl el techellek el mo ta er tirke el lodengelterir a Demad el ngar er a eanged el ngii a betik a rengul e omekerreu er a remesiungel. Ak medengei el kmo ngkmal diak bo lechitak.” Me alta ngmla duubech a betok el mekngit el tekoi el mo er a Irina, engdi a tabesul el osengel er a tekoi a ngosuir me ngsebechel el outekangel e dirrek el melisiich a rebebil.

11. Ngmilekerang a Kyung-sook e outekangel er a meringel el rektel?

¹¹ A Kyung-sook me a bechil el kiei er a beluu er a Asia a mla mo betok er a 20 el rak el dmak el pioneer. Ngmlo medengei el kmo ngsmecher el kasinoma a olemedel, e a toktang a dilu er ngii el kmo ngdi mle edei el mo er a elolem el buil el medechel er a uchei er a lemad. Ngii me a bechil a chillebangel a betok el omelsemai er a uchei, engdi ngdi mle blechoel el mesisiich a bedengir. Me ngdmu el kmo: “Tiang a kmal meringel er ngak el tekoi, el rirellak el mo medakt e omdasu el kmo ak kmal chebulang.” Me ngmilekerang a Kyung-sook e outekangel? Ngdmu el kmo: “Ak mo er a chedoel a blik er a bek el kebesengei er a uchei er a bo kbad, e meluluuch el omasech a eim el ungil el tekoi el dilubech er seikid el sils. E seikid e ngmo mechelaod a renguk, me ak ochotii a bltkil a renguk el mo er a Jehovah.” Me aika el nglunguuch ngmlo uchul a ngera el klungiolel? Ngdmu el kmo: “Ak mla mo medengei el kmo a Jehovah a smisichid me ngmo sebeched el outekangel a meringel el blekeradel, e ngar er ngii a betok a klengeltengat er a klengar er kid el kuk betok er aike el omelsemai.”

12. Ngmilekerang e mo mechelaod a rengul a Jason er a uriul er a lemad a bechil?

¹² A Jason el mesiou er a ta er a branch office er a beluu er a Africa a mla mesiou el mui el taem el betok er a 30 el rak. Ngdmu el kmo: “A euid el rak er a mla me mong e ngmlad a bechik, me a lebebil er a taem e ngkmal mo chuarm a uldesuek el melatk er ngii. Sel kulatk er ngii el kmal uluutekangel er a rektel el kasinoma, e ngkmal mo mekngit a renguk.” Me ngera mle sebechel el chemolodii a Jason? Ngdmu el kmo: “Ak mlo melatk er a ta el taem el kmal mle dmeu a renguk el dmak ngak me a bechik, me ak mirreng a sulel a Jehovah el kirel tia el tekoi. Ngkmal mlo mechelaod a renguk, me ngulemuchel er seikid el taem e ak mlo blechoel el mereng a sulel a Jehovah el kirel aike el ungil el tekoi el dilubech er a delongelek ngak me a bechik. Me a omereng el saul er ngak a mla rullak el mo ungil a uldesuek. Ngdirk mekngit a renguk er a bechik, engdi a omereng el saul er ngak el mo er a Jehovah el kirel a ungil el chebechiielek me sel techellek el mesiou er ngii el obengkel a chad el mera el mle betik a rengul er Ngii a mengelaod er ngak.”

13. Ngmilekerang a Sheryl e mo sebechel el outekangel er a uriul er a lemad a rechad er a blil?

¹³ Sel taem el Super Typhoon Haiyan a silbechii a beluu er a Huriping er a rak er a 2013, e a 13 a rekil el Sheryl a kmal mlo metacherbesul. Ngdmu el kmo: “A rechad er a blik a mlad e milteruud a blik.” A demal me a delal me a ta el ochedal me a reteru el odos er ngii a mlad er a lesiseb a ieleb er a belurir. Me ngmilekerang a Sheryl e mo sebechel el outekangel er tia el ringel e dimlak bo el mekngit a uldesuel? Ngdirk oba omereng el saul e le ngmelatk aike el ungil el tekoi el bla leruul a Jehovah el kirel. Ngdmu el kmo: “Ak ulemes a tekoi el lurruul a rudam me a rudos el olengeseu e melisiich er tirke el  uluusbech a ngeso. Ak dirrek el mle medengei el kmo a rudam er ngak el meliuekl er a beluulechad a meluluuch el kirek.” Ngdochelii el kmo: “Ngkmal dmeu a renguk e le ngak el oudios er a Jehovah. Ngdi blechoel el ngosukid er a chelebuled.” Me ngmo mechelaod a rengud sel sekum kede blechoel el oba omereng el saul el kirel a klengeltengat el bla dengai. E tiang a ngosukid me ngsebeched el outekangel a ngii di el omelsemai me a ringel el bo dechelebangel.​—Efe. 5:20; monguiu er a Filipi 4:6, 7.

14. Kede obang a ngera el ungil el omelatk? (Momes er a siasing er a uchelel a suobel.)

¹⁴ A rechedal a Jehovah er a irechar el mei a oba omereng el saul el kirel a klengeltengat el bla lengai. A rechad er a Israel a mle dmeu a rengrir el oldanges e mengitakl el mo er a Jehovah el mereng a sulel er a uriul er a losobelterir er a Farao me a resoldau er ngii er a Bekerkard el Daob. (Exo. 15:1-21) Me chelechang e ngkmal dmeu a rengud e le ngar er ngii a omeltked el kirel a taem el mo diak a ringel. (Psa. 37:9-11; Isa. 25:8; 33:24) Ka di molatk er a deuil a rengud er sel taem el Jehovah a mo okngemedeterir a recherrouel e ngoikid el mo soiseb er a beches el beluulechad el mui er a budech me a llemalt. Tiang a kirel el mo taem er a klou el omereng el saul er kid el mo er a Jehovah!​—Och. 20:1-3; 21:3, 4.

15. Ke mla tibir er a rengum el mo mekerang er a rak er a 2015?

¹⁵ Me kede kmal omes el bedul uchei el kirel a betok el klengeltengat el bo lebeskid a Jehovah er chelecha el rak er a 2015. Me alta kede mo chelebangel a omelsemai, engdi kede medengei el kmo a Jehovah a kmal diak lechitid. (Dut. 31:8; Psa. 9:9, 10) Ngmo meskid aike el dousbech me ngsebeched el melemolem el blak a rengud el mesiou er ngii. Mada me bo deua Habakuk el dilu el kmo: “Ng mo lmuut ma bo lak lourodech a kerrekar el fig, ma lak a rodech el tuobed er a dellomel bilong; e dirrek a di bo le mekngit a dellomel el olib; ma ikel sers lak lukdubech a redechel a wheat; e dirrek a di le mad a rokui el sib ma ikel blil a kerbou di bo le bechachau; me ngak a di mo mui er a deurreng e blekebek a medak, ele RUBAK el Dios a Osebelek.” (Hab. 3:17, 18) Me chelecha el rak e dolemolem el melatk a betok el klengeltengat el bla dengai e dotireklii a tekoi el medung er a bades er kid er a rak er a 2015 el kmo: ‘Moreng a sulel a Jehovah ele ngii a ungil.’​—Psa. 106:1.