1. Ngua ngera klungel a ultutelel a klaumerang er kid? (Momes er a siasing er a uchelel a suobel.)

 NGMLA ta el molatk el kmo: ‘Ngak ak ta er tirke el chad el lesemeriar a Jehovah el mo olsobel er tir er a taem er a kloul ringel e mo olsiseb er tir er a beches el beluulechad?’ Kede medengei el kmo ngbetok a kired el meruul me bo el sebeched el mo suobel, engdi sel kot el klou a ultutelel el tekoi el kired el meruul er ngii a lulsaod er ngii a apostol el Paulus el kmo: “Ng diak a chad el diak loumerang e sebechel el odeuir a rengul a Dios.” (Heb. 11:6) Tiang a ua lebeot el tekoi engdi kede ungil el medengei el kmo “ng diak le rokui el chad a oumera tekingel a Dios.” (2 Th. 3:2) Me aika el bades a ngosukid el mo medengelii a uchul me ngklou a ultutelel el dolisiich er a klaumerang er kid.

2, 3. (a) Ngera kede suubii er a omesodel a Petrus el kirel a klungel a ultutelel a klaumerang? (b) Ngera el ker a bo dosaod?

² A apostol el Petrus a milsaod er sel uchul me a klaumerang er kid a kirel el “measem” me bo de ‘modanges, e mongesechekl, e mukebkall er sel Sils el be ledum er ngii a Rubak el Jesus Kristus.’ (Monguiu er a 1 Petrus 1:7.) Me chelecha el di lolekedang a temel a kloul ringel e ngkmal soad el mo teloi er tirke el chad el klaumerang er tir a oldanges er ngike ngarbab el King er kid. Me ngkmal soad el mo teloi er tirke el “oumerang me kede mo suobel.” (Heb. 10:39) Me a lsekum tiang a turrekong er kid, e kede meruul er a ongtid el ua chad el dilu el kmo:  “Mngesukak me bo kmesisiich el oumerang!” (Mk. 9:24) Me a lechub e kede mo ua rechapostol er a Jesus el dilu el kmo: “Mrellemam el mo mesisiich el oumerang.”​—Lk. 17:5.

³ Ngmo duubech a ker el kirel a mesisiich el klaumerang el kmo, Kede mekerang e smisichii a klaumerang er kid? Kede mekerang e ochotii el kmo kede oumerang? Ngmekerang e mo ulterekokl a rengud el kmo a ongtid el kirel a mesisiich el klaumerang a sebechel el monger?

4. Ngkerebai er a rua techang a rullid el mo soad el melisiich er a klaumerang er kid?

⁴ Me “a ikel ngar a Chedaol Llechukl a melluches el olisechakl er kid” a uchul me ngsebeched el mesuub a kerebai er a klaumerang er a rebetok el chad el ngar er a Biblia. (Rom 15:4) Me sel donguiu el kirir a rechad el ua Abraham me a Sara me a Isak me a Jakob me a Moses me a Rahab me a Gideon me a Barak me a lmuut el bebil, e ngrullid me ngmo soad el di kid el merriter er a klaumerang er kid. (Heb. 11:32-35) Me a lmuut el tang, sel donguiu a chisel a klaumerang er a rudam me a rudos er kid er chelecha el taem, e ngrullid el mo blak a rengud el melisiich er a klaumerang er kid.

5. Ngmilekerang a Elias e ochotii el kmo ngmle mesisiich a klaumerang er ngii er a Jehovah, e a kerebil ngrullid el mo melatk a ngerang?

⁵ A ta er a ungil el kerebai el ngar er a Biblia a profet el Elias. Ka di molatk a tekoi el lurruul el ulechotii a mesisiich el klaumerang er ngii er a Jehovah. Sera louchais er a King el Ahab el kirel a Jehovah el mle soal rullii a beluu me ngmo er ngii a kemtimt er ngii, e ngdilu el kmo: “Ng oeak a RUBAK el di ngar el Dios . . . e ak subedau el kmo ng mo diak a nguches ma lechub e ng chull . . . el dimerkmo bo kdu el kmo ng mor ngii.” (1 Ki. 17:1) Me a Elias a uluumerang el kmo a Jehovah a mo msang aike el rokui el lousbech ngii me a rebebil er a temel a kemtimt. (1 Ki. 17:4, 5, 13, 14) Ngulechotii a klaumerang er ngii el kmo a Jehovah a sebechel el okisii a ngalek el mla mad. (1 Ki. 17:21) Ngdirrek el kmal uluumerang el kmo a Jehovah a mo odureklii a ngau el durur a tengetengel el mla er a Rois Karmel. (1 Ki. 18:24, 37) Me sera bocha letemel a Jehovah el torebengii a kemtimt e a Elias a dilu er a Ahab el kmo: “Le mereko e morael el mo omengur. Ak urrenges er a rrokel a chull el mermang.” (1 Ki. 18:41) Me a chouaika el cheldecheduch a kmal omeklatk er kid el mo ungil el merriter er a klaumerang er kid.

6. Ngera kede ousbech er ngii er a Jehovah el mo melisiich a klaumerang er kid?

⁶ Ngdiak el sebechel el di klisiched e bo lemesisiich a klaumerang er kid. Tia el klaumerang a ta er a blekerdelel a Jehovah. (Gal. 5:22) Me nguchul a llomeserreng a lsekum kede olengesenges er a ulekrael el lulsaod er ngii a Jesus sel doluluuch el olengit er a chedaol reng. E le Jesus a oterekokl a uldesued el kmo a Demal a mo ‘mesterir a Chedaol Reng tirkel olengit er ngii!’​—Lk. 11:13.

7. Mosaod er a okesiu el ochotii a rolel e ngmelemolem el mesisiich a klaumerang er kid.

⁷ Sel ta el lemeteketek a klaumerang er kid e ngkmal kired el melemolem el melisiich er ngii. Tia el klaumerang er kid a sebeched el omekesiu er ngii er a ngau. Sel domuchel el chumlii a ngau e ngmerael el mo mesisiich a ngeuil. Engdi a lsekum e ngdiak dolecha idungel e dolsiu er tia el ngau e ngdi merael el mo bas a idungel e mo chab e mad. Engdi a lsekum kede melemolem el melecha idungel er ngii e ngdi melemolem el melilial a ngau. Me ngdi osisiu, a klaumerang er kid a melemolem a lsekum kede blechoel el menguiu er a Tekingel a Dios. Me sel deblechoel el mesuub er a Biblia e kede mekurulii a bltkil a rengud el mo er ngii me ngike el Oubabier er ngii. E tiaikid a mo smisichii a klaumerang er kid.

8. Ngera bebil er a tekoi el sebechel el meleketek e melisiich a klaumerang er kid?

⁸ Ngera lmuut el sebechem el meruul me lolemolem el mesisiich a klaumerang er kau? Lak momdasu el kmo a klaumerang er kau a mla mo mesisiich  er sera cho bo metecholb. (Heb. 6:1, 2) Bo leblak a rengum el omtab a ulaoch el ngar er a Biblia, e aikang a dirrek el sebechel el lmuut el smisichii a klaumerang er kau. Ngdirrek el sebechem el ousbech er a Tekingel a Dios el merriter e omekrael er kau me bo el sebechel el melemolem el mesisiich a klaumerang er kau.​—Monguiu er a Jakobus 1:25; 2:24, 26.

9, 10. Ngmekerang e mo sebechel aika el tekoi el melisiich a klaumerang er kid, el ngii a: (a) ungil klausechelei? (b) miting er a ongdibel? (c) berkel a klumech?

⁹ A apostol el Paulus a dilu er a rekldemel el Kristiano el kmo: “Ak mo ngosukemiu me kemiu a mo ngosukak el mo mesisiich el oumerang.” (Rom 1:12) Me sel deteloi er a rudam er kid e ngsebeched el dul kasisiich a klaumerang er kid, e ileakl sel dobengterir tirke el mla ‘outekangel a ringel’ el klaumerang er tir a uchul. (Jak. 1:3) A mekngit el klausechelei a melemall a klaumerang engdi a ungil el klausechelei a meleketek a klaumerang er kid. (1 Ko. 15:33) Tiaikid a ta er a uchul me kede muklatk el kmo ngungil a “lak dongoit a ongdibel er kid” e bai bo le “blak a rengud el kasisiich.” (Monguiu er a Hebru 10:24, 25.) A ta er a uchul e ngmo mesisiich a klaumerang er kid a okiu aike el suobel el tuobed er a temel a miting er kid. Me ngdi ua lullekoi a Paulus el kmo: A “chad a mo oumerang el okiu a tekoi el le renges.” (Rom 10:17) Me kid, kede melisiich a deleuill er kid me a rekldemed el Kristiano er a bek el taem el dengar er a miting?

¹⁰ Me sel deteloi er a berkel a klumech e ngdiak di dolisiich er a rudam er kid e ngdirrek el smisichii a klaumerang er kid. Me kede ua Rekristiano er a irechar el mesuub el mo mui el ultuil a klaumerang er kid er a Jehovah e mo bekeu el mesaod er a klemerang er a chelsel a ngii di el blekeradel.​—Rel. 4:17-20; 13:46.

11. Ngera uchul me ngmle mesisiich a klaumerang er a Kaleb me a Josua, e kede mekerang e mo uai tir?

¹¹ Me sel bo dodengelii a rolel e a Jehovah a olengeseu er kid me a rolel e ngonger a nglunguched e ngmelisiich er a klaumerang er kid. E tiang a millisiich er a klaumerang er a Kaleb me a Josua. Te dul ulechotii a klaumerang er tir el mo er a Jehovah er sera bo el ourabek er a Beluu er a Nglat. Me sel lolengit a ngeso e lesa Jehovah el omekrael a tekoi er a klengar er tir e ngliluut el mo mesisiich a klaumerang er tir. Seikid a uchul me ngmle sebechel a Josua el mesisiich a tekingel el mo er a rechad er a Israel el kmo: “Ng diak a tar a ikel rokui el le tilib a RUBAK el Dios er kemiu el kiriu el dimlak bo le tekoi.” E a uriul e ngdilu el kmo: “Chelechang, e mongull el meluluuch er a RUBAK, e le mera er a rengmiu el mesiou er ngii el oba blakerreng. . . . Ngdi ngak ma re chad er a blik a mo mesiou er a RUBAK.” (Jos. 23:14; 24:14, 15) Me sel bo dechermii a ungilreng er a Jehovah e ngdirrek el smisichii a klaumerang er kid.​—Psa. 34:8.

12. Ngera el tekoi a lulechotii a Jakobus el ngii a klou a ultutelel el kirel a klaumerang er a chad?

¹² Kede mekerang e ochotii el kmo ngar er ngii a klaumerang er kid? A disaiplo el Jakobus a onger el kmo: “Ngak a mo ochotii er kau el kmo ak uumerang el oeak a omerellek.” (Jak. 2:18) Me a omerelled a mo ochotii el kmo ngar er ngii a klaumerang er kid. Me bo dosaod a bebil el kerebai el kirel a klaumerang.

13. Ngokiu a ngera el rolel e a berkel a klumech a olechotel a klaumerang er kid?

¹³ A ta er a kot el ungil el olechotel a klaumerang er kid a sel deteloi er a ureor er a berkel a klumech. E ngera uchul? Kede meruul er tia el ureor e le kid el oumerang el kmo a ulebongel er tia el mekngit el blekeradel a kmedu el mei, e kmal “diak bo le meoud.” (Hab. 2:3) Me a ta er a rolel e kede merriter er a klaumerang er kid a sel dolemolem el menglou er a omesiunged. Me kid, kede melasem el osiik a bek el techall e menglou er a omesiunged? (2 Ko. 13:5) Nguaisei, me sel bo domerk aike el tekoi el doumerang el uchul a osobel, e tiang a olechotel a kmo a klaumerang er kid a mera el ngar er a chelsel a rengud.​—Monguiu er a Rom 10:10.

14, 15. (a) Kede mekerang e ochotii a klaumerang er kid er a bek el sils? (b) Mosaod er a tekoi el dilubech el olechotel a mesisiich el klaumerang.

 ¹⁴ Ngdirrek el sebeched el ochotii a klaumerang er kid er sel taem el dechelebangel a mondai er a klengar. Alta e kede smecher, me a lechub e ngmechitechut a rengud, e meringel a uldesued e kmal metacherbesud me a lechub e ngkuk di bebil er a mondai, engdi ngulterekokl a rengud el kmo a Jehovah me a Ngelekel a “mo ngosukid sel dousbech er ngii.” (Heb. 4:16) Kede ochotii a klaumerang er kid el okiu sel doluluuch el olengit a ngeso. A Jesus a dilu el kmo ngsebeched el meluluuch el olengit aike el dousbech er a klechad, el uldimukl er a keled er a bek el sils. (Lk. 11:3) Ngar er ngii a cheldecheduch er a Biblia el oterekokl a rengud el kmo a Jehovah a kmal sebechel el omekerreu er kid. Sel temel a kemtimt er a beluu er a Israel e a Jehovah a ulemsa kelel me a imelel a Elias. Me “ng millim er a ralm er omoachel, e a suebek el charm el raven a ullab a blauang ma techel a charm el mo omsang er a bek el tutau ma bek el kebesengei” el ua ledilung a Jehovah. (1 Ki. 17:3-6) Me kede oumerang el kmo a Jehovah a sebechel el omekrael a tekoi me ngmo sebeched el ngmai aike el dousbech.

¹⁵ Ngdirrek el ulterekokl a rengud el kmo a doltaut a omellach er a Biblia e ngsebechel el mo uchul e ngmo er ngii a keled. A Rebecca el bechiil el redil er a Asia a kongei ngii me a telungalek er ngii el kmo tiang a klemerang el tekoi. Te ultireklii a bades er a Mateus 6:33 me a Osisechakl 10:4 el ngiluu a Renged el mo kot e mlo blak a rengrir el oureor. Ngdmu el kmo a ta el taem e a bechil a mlo melechesuar el kmo a urerel er a klechad a mla er ngii a techellel el choitechetur a deleuill er tir me a Dios, me ngmlo merek el oureor. Me nguaisei, engdi ngmla er ngii a reteua el ngelekir el mle kirir el mesiou er tir. Me a Rebecca a ouchais el kmo: “Aki mlo meruul a kiande e olterau. Me a cherengel a taem el ki moruul el uaisei, e ngmle sebecham el mesang el kmo a Jehovah a dimlak lechitemam. Ngdi mle blechoel el ngar er ngii a kelam.” Me kau, ke dirrek el kongei el kmo a klaumerang er kau er a Biblia a meskau a kot el ungil el ulekrael el sebechir a rechad el nguu er chelechang?

16. Ngera mo rsel a tekoi a lsekum kede oumerang er a Dios?

¹⁶ Ngkmal kirel el mo ulterekokl a rengud el  kmo a lsekum kede oltirakl a ulekrael er a Dios e ngdi mo uchul a klungioled. A Paulus a milsaod a tekoi el ledilu Habakuk el kmo: “Ng di ngikel oumerang a mo meruul el mo ungil er a rengul a Dios.” (Gal. 3:11; Hab. 2:4) Me a leuaisei, e ngklou a ultutelel el kired el mo mui el oumerang er Ngika el Dios el mera el sebechel el ngosukid. A Paulus a omeklatk er kid el kmo a Dios a “ngikel okiu a klisichel el oureor er a chelsed me ng sebechel kudmokl a lmuut el kmal obdois el tekoi er a ikel sebeched el olengit, ma me soiseb er a uldesued.” (Efe. 3:20) Me a remesiungel a Jehovah a mo er aike el sebechir el oltirakl a soal a Dios, engdi te medengei aike el sebechir e dirrek el ultuil a klaumerang er tir er a Jehovah el kmo ngmo omekngeltengat er tir. Me kede ulterekokl el rokui el kmal dmeu a rengud e le Dios a obengked er a bek el taem.

17. (a) Ngmilekerang e monger a ongterir a rechapostol el kirel a klaumerang er tir? (b) Kede mekerang e medengei el kmo ngmonger a ongtid el kirel a klaumerang er kid?

¹⁷ Me ngokiu a omesodel tia el tekoi e kede locha mla mo medengei a uldesuir a rechapostol er a lolengit er a Rubak el kmo: “Mrellemam el mo mesisiich el oumerang.” (Lk. 17:5) Me tia el ongterir a mlonger er sera Pentekost er a rak er a 33, er sel taem el chedaol reng a mloitel er bebrir me ngdirrek el mlo sebechir el mtab a ulekrael el kirel a moktek er a Dios. Me tiang a silisichii a klaumerang er tir, el mlo uchul e ngmlo sebechir el kutmeklii a kot el mle klou el ureor er a berkel a klumech er sel taem. (Kol. 1:23) Me kid, ngsebechel a ongtid el kirel a klaumerang el mo monger? A Biblia a oterekokl a rengud el kmo ngsebechel a lsekum kede olengit “a ikel tekoi el ungilbesul er a rengul [a Dios].”​—1 Jn. 5:14.

18. Ngmekerang a Jehovah e omekngeltengat er tirke el melisiich a klaumerang er tir er ngii?

¹⁸ Me ngbleketakl el kmo a Jehovah a dmeu a rengul er tirke el otuil a klaumerang er tir er ngii. Ngmo onger a ongtid el kirel a klaumerang er kid me ngsebechel el mukeroul el lmuut el mo mesisiich el mo uchul e ngsebeched el “mo rredemelel a Rengedel a Dios.”​—2 Th. 1:3, 5.