’Sis yusht normal fa vunra favass leit shtauva, especially vann’s ebbah is es ma nayksht is ditzu. Di Bivvel sawkt: “Da shtechah [adda pain] fumm doht is di sind.”​—1 Korinther 15:56.

Favass dutt alli-ebbah sindicha un shtauva?

 Di eahshti mensha, da Adam un di Ayfaw, henn iahra layva faloahra koss si henn ksindicht geyyich Gott. (1 Mosi 3:17-19) Da doht voah vass si betzawla henn missa because si henn nett Gott keicht, fa bei Gott “is di shpring funn layva.”​—Psalm 36:9; 1 Mosi 2:17.

 Da Adam hott di sind uf awl mensha gebrocht noch een. Di Bivvel sawkt: “Vi deich ay mensh di sind in di veld kumma is, un deich di sind da doht, so is da doht uf awl mensha kumma, veil si awl ksindicht henn.” (Römer 5:12) Awl mensha shtauva koss si doon awl sindicha.​—Römer 3:23.

Vi da doht zu en end gebrocht vadda zayld

 Gott hott fashprocha es “eah shlukt da doht uf fa’immah.” (Jesoiya 25:8) Fa da doht zu en end bringa, muss eah di shuld funn da doht vekk nemma, un sell is di sind. Gott zayld dess du deich da Jesus Christus, “da vann vo di veld iahra sinda vekk nemd.”​—Johannes 1:29; 1 Johannes 1:7.