Gott Sei Reich is en rechtah government es Jehova ufksetzt hott. In di Bivvel is’s “Reich-Gottes” un aw “es Kaynich-Reich fumm Himmel” kaysa, siddah’s roold funn da himmel. (Markus 1:14, 15; Matthäus 4:17) In samm vayya is’s baut vi mensha governments, avvah’s is feel bessah in alles es’s dutt.

•   Di roolahs. Gott hott da Jesus Kaynich gmacht funn sell Reich un hott een may power gevva es ennichah mensha roolah selayva havva kend. (Matthäus 28:18) Da Jesus yoost dess power yusht fa goodi sacha du. Eah hott shund geprooft es eah en goot-maynichah Leader is es getrost sei kann. (Matthäus 4:23; Markus 1:40, 41; 6:31-34; Lukas 7:11-17) Gott hott da Jesus direction gevva fa leit funn alli lendah tshoosa fa “kaynicha sei ivvah di gans veld” un roola mitt da Jesus funn da himmel.​—Offenbarung 5:9, 10.

•   Di leng. Nett vi mensha governments es kumma un gayn, Gott Sei Reich zayld “nee nett unnah gay.”​—Daniel 2:44.

•   Di leit. ’S macht nix aus vo leit kumma difunn adda veah si sinn, ennich ebbah es dutt vass Gott havva vill kann bennafida funn sell Reich.​—Apostelgeschichte 10:34, 35.

•   Di laws. Di laws (adda gebodda) funn Gott Sei Reich doon may es yusht sawwa vass letz is. Si macha leit bessah bei si helfa layva in en vayk es pleesing is zu Gott. Fa’n example, di Bivvel sawkt: “‘Du solsht da Hah dei Gott leeva mitt dei gans hatz, un mitt dei gansi sayl un mitt dei gansi meind. Dess is es eahsht un graysht gebott. Un’s zvedda is demm aw gleicha: Du solsht dei nochbah leeva vi dich selvaht.’” (Matthäus 22:37-39) Leevi fa Gott un nochbra macht es selli unnich sell Reich anri’s eahsht du vella.

•   Di lanning. Gott Sei Reich dutt nett yusht goodi gebodda macha fa di leit, es dutt si lanna vi fa selli gebodda nohch kumma.​—Jesoiya 48:17, 18.

•   Da mission. Gott Sei Reich dutt nett di leit letz yoosa yusht fa aus gukka fa selli es roola zayla. In blatz funn sell, es zayld macha es Gott sei villa gedu vatt, un es awl selli es doon vass recht is da promise havva kenna fa layva uf’n paradise eaht fa’immah.​—Jesoiya 35:1, 5, 6; Matthäus 6:10; Offenbarung 21:1-4.