Gott vill havva es alli sadda leit naychah zu een kumma bei bayda zu een. (Psalm 65:2) Avvah, eah dutt nett abheicha zu awl gebaydah. Fa’n example, vann en mann sei fraw letz yoosa dutt, dann kann sell macha es sei gebaydah nett abkeicht vadda. (1 Petrus 3:7) Vo di Kinnah-Israel ohkalda henn shlechti sacha du, hott Gott nimmi iahra gebaydah abkeicht. So, miah sedda selayva nett fagessa vi speshel es’s is fa alawbt sei fa bayda zu een. Avvah, Gott dutt even di gebaydah abheicha funn leit es shlimmi sacha gedu henn vann si rumm drayya un nimmi so du vella.​—Lays Jesoiya 1:15; 55:7.

Vatsh da video Dutt Gott Abheicha zu Awl Gebaydah?

Jehova is da vann es uns gmacht hott, so miah sedda yusht bayda zu een. (Matthäus 4:10; 6:9) Miah sinn nett pirfikt, so miah sedda bayda in da Jesus sei nohma veil eah kshtauva is fa unsah sinda. (Johannes 14:6) Jehova vill nett havva es miah di saymi gebaydah ivvah un ivvah laysa adda sawwa. Eah vill havva’s miah sawwa vass in unsah hatz is.​—Lays Matthäus 6:7; Philipper 4:6, 7.

Da Vann es uns gmacht hott kann di gebaydah heahra in em sei hatz even vann si nett laut ksawt sinn. (1 Samuel 1:12, 13) Eah vill havva es miah bayda zu een ennichi zeit, so vi alli meiyet un alli ohvet, vann miah essa, un vann miah druvla henn.​—Lays Psalm 55:22; Matthäus 15:36.

Fa nayksht kumma zu Gott is nett eesi veil miah inna veld layva vo leit nett glawva in Gott. Si macha en kshpott aus vass eah fashprocha hott veyyich fridda uf di eaht.  (2 Timotheus 3:1, 4; 2 Petrus 3:3, 13) So miah missa zammah kumma mitt anri es saym glawva, so’s ma nannah ufbauwa kenna.​—Lays Hebräer 10:24, 25.

Vann ma bei leit sinn es leevi henn fa Gott dann kann’s em helfa naychah kumma zu Gott. Di fasamling funn Jehova Sei Witnesses gebt em di gleyyaheit fa ufgebaut vadda bei nannah iahra glawva.​—Lays Römer 1:11, 12.

Du kansht naychah kumma zu Jehova bei deef denka ivvah di sacha es du gland hosht funn di Bivvel. Denk ivvah vass ma lanna kann funn di sacha es eah gedu hott un am du is, un vass eah havva vill es miah doon, un vass eah fashprocha hott. Bei bayda un deef denka diveyya, kann’s em helfa fashtay vi grohs es Gott sei leevi un veisheit is.​—Lays Joshua 1:8; Psalm 1:1-3.

Em sei glawva helft em nayksht sei bei Gott avvah yusht vann ma een trost. Avvah em sei glawva is vi ebbes levviches es kfeedaht sei muss. Du musht immah dei glawva feedra bei ivvah di reesins gay es du hosht fa glawva vass du dusht.​—Lays Matthäus 4:4; Hebräer 11:1, 6.

Jehova gebt ebbes drumm veyyich selli vo een leeva. Eah kann si sayf halda funn ennich ebbes es si macha kend iahra glawva adda iahra hofning fa ayvich layva faliahra. (Psalm 91:1, 2, 7-10) Eah dutt uns vanna fa nett layva inna vayk es unsah ksundheit shawda dutt adda uns hald funn haebbi sei. Jehova land uns da besht vayk fa layva.​—Lays Psalm 73:27, 28; Jakobus 4:4, 8.