Fa’n baybi havva kann reeli exciting sei fa’n couple, un fleicht daylmohls seema vann’s yusht zu feel veah. Diah zaylet fashtaund sei vi feel funn eiyah zeit un energy es gyoost vatt fa acht gevva uf’s baybi. Nett genunk shlohf un da tshaynsh in eiyah feelings kann hatt sei uf keiyaht layva. Diah misset awl zvay eiyah part du fa acht gevva uf’s baybi un shaffa fa eiyah keiyaht layva ufgebaut halda. Vi kann di Bivvel eich helfa deela mitt dee sacha?

VASS DI BIVVEL SAWKT: “Di leevi is geduldich un bamhatzich.” Un, di leevi “gukt nett aus fa sich selvaht, see vatt nett kshvind grikt.” (1 Korinther 13:4, 5) Fa’n maemm sei fa’s eahsht moll, macht’s yusht sens es du dei baybi awl dei attention gevva vitt. Avvah, dei mann kend shteahra shpiahra vann eah nimmi importand veah, so fagess nett es eah aw dei attention brauch. Mitt dei leevi un geduld, kann eah shpiahra es eah aw gebraucht is fa helfa acht gevva uf’s baybi.

“Diah mennah, layvet bei eiyah veivah in en fashtendichah vayk.” (1 Petrus 3:7) So, du musht fashtay es dei fraw zayld’s mensht funn iahra energy yoosa fa’s baybi. See is nau en maemm un hott may fa du, un mecht daylmohls aus gvoahra shpiahra, adda even depressed vadda. See mecht even daylmohls upset vadda mitt dich, avvah boviah kawm bleiva, koss “es is bessah fa nett kshvind bays vadda es vi fa mechtich sei.” (Shpricha 16:32) Veis see es du fashtaysht , un gebb see’s hilf es see brauch.​—Shpricha 14:29.

VASS DU KANSHT:

• Daett: Helf dei fraw acht gevva uf’s baybi, even deich di nacht. Shpend nett so feel zeit uf anri sacha, so’s du may zeit shpenda kansht mitt dei fraw un’s baybi

• Maemm: Vann dei mann helfa vill acht gevva uf’s baybi, loss een helfa. Vann eah’s nett gans recht dutt, veis een inna shaynah vayk vi fa’s du in blatz funn een sawwa vass eah letz gedu hott

VASS DI BIVVEL SAWKT: “See vadda ay flaysh.” (1 Mosi 2:24) Diah hend nau en baybi in eiyah family, avvah fagesset doch nett es diah sind alsnoch “ay flaysh.” Doond alles es diah kennet fa eiyah relationship ufgebaut halda.

En fraw sett frohwa sei vann iahra mann see helft. Vann see een’s sawkt es see frohwa is kann’s feel sacha bessah macha. (Shpricha 12:18) En mann soll sei fraw sawwa vi feel leevi es eah hott fa see un vi feel es see maynd zu een. Sawk see vi frohwa es du bisht fa da vayk es see acht gebt uf di family.​—Shpricha 31:10, 28.

“Nimmand sett ausgukka fa’s goot funn sich selvaht, avvah sett ausgukka fa’s goot funn anri.” (1 Korinther 10:24) Du immah vass’s besht is fa dei partner. Nemmet zeit fa mitt-nannah shvetza un abheicha, un sawwet vass diah gleichet veyyich nannah. Seind nett selfish vann’s kumd zu eiyah sexual relationship. Du ausgukka fa vass dei partner brauch. Di Bivvel sawkt: “Ayns soll sich nett halda fumm anra, adda vann diah awl zvay aynich sind mitt, yusht fa en zeitlang.” (1 Korinther 7:3-5) Shvetzet veyyich dess un sawwet nannah vi diah reeli feelet. Boviahret nannah fashtay un seind geduldich. Dess zayld eiyah relationship bessah macha.

VASS DU KANSHT:

• Fagesset nett zeit nemma fa yusht eich zvay

• Dei partner zayld dei leevi shpiahra vann du even yusht glenni sacha dusht, so vi en note adda en glennah present gevva

VASS DI BIVVEL SAWKT: “Un evvah siddah es du en glay kind voahsht hosht du di Heilich Shrift gvist, dee vo diah veisheit gevva kann zu di saylichkeit.” (2 Timotheus 3:15) Diseiydet vass diah du zaylet fa eiyah kind lanna. ’Sis amaysing vi feel es en baybi lanna kann, even eb’s geboahra is. Even an selli zeit kann’s eiyah shtimm kenna un vissa vass fa moot es diah drinn sind. Layset zu eiyah kind even vann’s noch glay is. Es mecht nett fashtay vass du am laysa bisht, avvah’s kann eiyah kind helfa so’s gleicht laysa vann’s moll eldah is.

Eiyah baybi is selayva nett zu yung fa eich heahra shvetza veyyich Gott. Loss eiyah kind eich heahra bayda zu Jehova. (5 Mosi 11:19) Even vann diah shpeelet mitt-nannah, shvetzet veyyich di sacha es Gott gmacht hott. (Psalm 78:3, 4) Vi eiyah kind uf vaxt, zayld’s eiyah leevi sayna fa Jehova un zayld aw lanna fa leevi havva fa een.

VASS DU KANSHT:

• Baydet fa vissa vi fa eiyah kind uf zeeya

• Sawwet importandi sacha ivvah un ivvah so’s eiyah kind shteaht yung lanna veyyich Jehova