Feel leit denka es Jehova Sei Witnesses is da nohma funn en neiyi religion. Avvah, ivvah 2,700 yoah zrikk voahra di leit es da voah Gott gedeend henn, sei “zeiknisa” adda witnesses kaysa. (Jesoiya 43:10-12) Nuff biss 1931 voahra miah Bible Students kaysa. Favass henn miah kshteaht da nohma Jehova Sei Witnesses yoosa?

Es veist veah unsah Gott is. In di aldi kabbis funn di Bivvel, voah Gott sei nohma, Jehova, drinn dausends funn moll. In feel trenslayshins is sei nohma replayst vadda mitt titles, so vi Hah adda Gott. Avvah da voah Gott hott da Mosi vissa glost es sei nohma Jehova is. Gott hott no ksawt zu een: “Sell is mei nohma fa’immah.” (2 Mosi 3:15) In deah vayk, hott eah da diffans kliah gmacht zvishich een un awl di falshi gettah. Miah sinn haebbi fa kaysa sei bei Gott sei nohma.

Es veist vass miah doon. Es voahra feel leit funn lang zrikk es en witness gevva henn veyyich iahra glawva in Jehova. Da eahsht es ma laysa difunn, is da Abel. Deich Bivvel zeida voahra da Noah, da Abraham, di Sarah, da Mosi, da Dawfit un anri en part funn en ‘grohsi volk funn witnesses.’ (Hebräer 11:4–12:1) Vann du en goodah friend hetsht un anri leit shteahra shtoft sawwa veyyich een es nett voah is, vass daytsht du du? Du vetsht of course ufshtay fa dei friend un leit sawwa vass di voahret is veyyich een. In da saym vayk, miah vella ufshtay fa unsah Gott un leit sawwa vass di voahret aekshli is veyyich een.

Miah sinn am du vass da Jesus hott. Di Bivvel hayst een ‘da shtandhaftich un da voah witness.’ (Offenbarung 3:14) Da Jesus hott selvaht ksawt es eah hott ‘Gott sei nohma vissa glost zu leit’ un hott ohkalda en ‘witness gevva zu di voahret’ veyyich Gott. (Johannes 17:26; 18:37) Selli es da Jesus nohch kumma vella, missa en witness sei fa Jehova un sei nohma vissa macha zu anri. Dess is vass Jehova Sei Witnesses am boviahra sinn fa du.

• Favass henn di Bible Students kshteaht da nohma Jehova Sei Witnesses yoosa?

• Vi lang hott Jehova shund witnesses katt uf di eaht?

• Veah is da besht Witness fa Jehova?