Hosht du ksenna in di piktahs in deah brochure vi shay gedrest es Jehova Sei Witnesses sinn vann si zu iahra fasamlinga gayn? Favass is’s so importand zu uns vass miah veahra un vi miah gukka?

Fa respekt veisa fa unsah Gott. Gott gukt veidah es vass eah sayna kann uf di autseit. (1 Samuel 16:7) Avvah, vann miah zammah kumma fa Gott deena, vella miah respekt veisa fa een un di breedah un shveshtra. Vann miah fannich en judge kumma mista in court, dayda miah andem shayni glaydah veahra fa respekt veisa fa veah eah is. So in da saym vayk, vass miah veahra zu di fasamling veist respekt fa Jehova, da Judge “funn di gans veld,” un veist respekt fa da blatz vo miah zammah kumma fa Een deena.​—1 Mosi 18:25.

Fa veisa es miah layva bei vass di Bivvel sawkt. Di Bivvel sawkt Christians sedda “shiklichi glaydah” veahra. (1 Timotheus 2:9, 10) Sell maynd ma dayt nett dressa in en vayk es attention bringd zu em selvaht, zu em sei glaydah, adda zu em sei body. So, bei di Bivvel lossa em geida, helft’s uns fa shayni glaydah pikka es nett shlabbich sinn adda es aw nett attention bringd zu em selvaht. Sell gebt uns alsnoch en latt blatz fa glaydah pikka es miah gleicha. Miah gevva praise zu Gott bei vi shay es miah dressa. (Titus 2:10; 1 Petrus 2:12) Bei ufdressa fa di fasamlinga, kann’s anri helfa sayna vass Jehova ekshpekt funn leit es een deena.

Even vann dei glaydah diffand sinn, loss sell nett dich halda funn zu di fasamling kumma. Miah missa nett deiyahri glaydah veahra fa shay un sauvah gukka.

• Favass is’s importand vi miah dressa vann miah Gott deena?

• Vi kann di Bivvel uns helfa goodi choices macha in vi miah gukka un vass miah veahra?