Shpricha 10:1-32
10 Dess sinn em Solomon sei shpricha:En boo mitt veisheit macht sei daett froh,avvah en unksheidah boo macht sei maemm bedreebt.
2 Shtoft es uneahlich grikt voah dutt diah kenn goot,avvah gerechtichkeit hald dich aus di kfoah fumm doht.
3 Da HAH lost di gerechta nett hungahrich gay,avvah eah hald di gottlohsa funn greeya vass si havva vella.
4 Fauli hend macha ebbah oahm,avvah fleisichi hend macha ebbah reich.
5 Veah’s frucht sammeld im summah is en boo mitt veisheit,avvah veah shlohft deich di eahn is en shandlichah boo.
6 Sayya sinn uf em kobb funn di gerechta,avvah unfashtand dekt’s maul funn di gottlohsa zu.
7 Es ohdenkes funn di gerechta is en sayya,avvah da nohma funn di gottlohsa vatt glei fagessa.
8 Ebbah mitt veisheit im hatz dutt vass eah kaysa is,avvah ebbah es dumhayda shvetz kumd zu nix.
9 Veah eahlich laybt, lawft unni kfoah,avvah veah uneahlich laybt vatt auskfunna.
10 Sellah es sei awk blikt geyyich ebbah, macht druvvel,un sellah es dumhayda shvetzt kumd zu nix.
11 Es maul funn di gerechta is vi en vassah-shpring funn layva,avvah unfashtand dekt’s maul funn di gottlohsa zu.
12 Da hass macht shtreit,avvah di leevi dekt awl unsah sinda zu.
13 Veisheit is kfunna uf di leftz funn di fashtendlicha,avvah en gayshel is fa da bukkel funn di unfashtendlicha.
14 Ebbah mitt veisheit haybt zrikk vass eah vayst,avvah’s maul fumm unksheida frohkt fa druvvel.
15 ’S geld fumm reicha is sei shteiki shtatt,avvah di oahma gayn unnah veil si kenn geld henn.
16 Da lohn funn di gerechta bringd eena layva,avvah di gottlohsa vadda betzawld mitt en shtrohf.
17 Veah sich famohna lost is uf em vayk zu layva,avvah veah’s recht-setza nett ohnemd gayt fafiaht.
18 Veah sei hass fashtekkeld, hott leftz es leeya,un ebbah es kshvetzah shtroit is nett ksheit.
19 Vo feel vadda sinn, datt is di sind aebt fa sei,avvah veah sei leftz zu haybt, hott veisheit.
20 Di zung funn di gerechta is vi fei silvah,avvah di meind funn di gottlohsa is nett feel veaht.
21 Di leftz funn di gerechta helfa feel,avvah di unksheida kumma um veil si kenn veisheit henn.
22 Da sayya fumm HAH macht em reich,un gebt kenn dreebsawl mitt.
23 En unksheidah mensh gleicht letz du,avvah en mann mitt eisicht gleicht veisheit.
24 Vass da gottlohs sich feicht diveyya kumd uf een,avvah da gerecht mann grikt vass eah havva vill.
25 Vann da shtoahm moll fabei is, dann sinn di gottlohsa nimmi datt,avvah di gerechta shtayna shtandhaftich fa’immah.
26 Vi essich zu di zay un shmohk zu di awwa,so is da faul mann zu selli es een shikka shaffa.
27 Di furcht fumm HAH macht’s layva lengah,avvah di yoahra funn di gottlohsa vadda fakatzt.
28 Di hofning funn di gerechta is frayt,avvah di hofning funn di gottlohsa kumd zu nix.
29 Da vayk fumm HAH is en Roo-Blatz zu di ufrichticha,avvah sei vayk bringd fadauves zu selli es letz doon.
30 Di gerechta vadda nee nett naus kshtohsa,avvah di gottlohsa zayla nett im land bleiva.
31 ’S maul funn di gerechta shvetzt mitt veisheit,avvah di zung es evil shvetzt vatt abkshnidda.
32 Di leftz funn di gerechta shvetza kshikti sacha,avvah’s maul funn di gottlohsa shvetzt falshheit.
