En Rechti Hofning fa en Bessahrah Future
Denksht du sacha zayla bessah vadda in da future? Feel leit boviahra positive bleiva even vann ma feel problems henn heit. Avvah, kenna miah reeli glawva es sacha bessah vadda zayla? Yau! Di Bivvel gebt uns en rechti hofning fa da future.
Vass fa hofning dutt di Bivvel uns gevva?
Di Bivvel sawkt es mensha zayla deela mitt grohsi problems. Avvah, es sawkt aw es dee problems nett uns afekta zayla fa’immah. Denk moll an dee examples.
Da problem: Kenn blatz fa voona
Vass di Bivvel sawkt: “Si zayla heisah bauwa un zayla drinn voona.”—Jesoiya 65:21.
Vass’s maynd fa da future: Leit zayla iahra aykna haymet havva.
Da problem: Kenn eahvet un oahm sei
Vass di Bivvel sawkt: “Mei leit zayla sich lang froiya mitt em sach es iahra hend macha.”—Jesoiya 65:22.
Vass’s maynd fa da future: Alli-ebbah zayld eahvet havva es si enjoya un es mayning hott.
Da problem: Nett feah getreet sei
Vass di Bivvel sawkt: “Mitt-helfah zayla richta vass recht is.”—Jesoiya 32:1.
Vass’s maynd fa da future: Alli-ebbah zayld immah feah getreet sei, es macht nix aus veah si sinn adda vo si ufgvaxa sinn.
Da problem: Nett genunk havva fa essa
Vass di Bivvel sawkt: “Loss es frucht dikk shtay im land, loss es sich zrikk un faddi beeya drovva uf di hivla.”—Psalm 72:16.
Vass’s maynd fa da future: Alli-ebbah zayld able sei fa blendi ess-sach havva un alles zayld goot sei. Nimmand zayld zu’s bett gay hungahrich, adda grank vadda koss funn nett genunk havva fa essa.
Da problem: Crime un violence
Vass di Bivvel sawkt: “Alli-ebbah zayld unnich sei ayknah vei-shtokk hokka un unnich sei ayknah feiya-bohm. Nimmand zayld si macha sich feicha.”—Micha 4:4.
Vass’s maynd fa da future: Alli-ebbah zayld sayf shpiahra koss di veeshti leit zayla gone sei, un “di gerechta zayla’s land eahva.”—Psalm 37:10, 29.
Da problem: War
Vass di Bivvel sawkt: “Kenn folk zayld’s shvatt uf nemma geyyich en annah folk, un si zayla nee nimmi lanna fa greek macha.”—Jesoiya 2:4.
Vass’s maynd fa da future: Es zayld peace sei gans ivvah di eaht. (Psalm 72:7) Nimmand zayld may brilla koss es si ebbah faloahra henn es doht gmacht vadda is in war. Un es zayld aw nimmand iahra haymet faliahra koss funn wars.
Da problem: Grank sei un diseases
Vass di Bivvel sawkt: “Nimmand es in Zion voond zayld sawwa, ‘Ich binn grank.’”—Jesoiya 33:24.
Vass’s maynd fa da future: Leit zayla nimmi soffahra koss funn shlecht health un si zayla nimmi grank vadda. (Jesoiya 35:5, 6) Di Bivvel fashprecht even, es “zayld kenn shtauves” may sei.—Offenbarung 21:4.
Da problem: Shawda es gedu vatt zu di eaht
Vass di Bivvel sawkt: “Di vildahnis un’s drukka land zayla sich froiya, es veesht land zayld fraylich sei un zayld bleeya mitt blumma.”—Jesoiya 35:1.
Vass’s maynd fa da future: Di gans eaht zayld en paradise sei, un mensha kenna layva in da vayk es Gott havva hott vella funn da shteaht.—1 Mosi 2:15; Jesoiya 45:18.
Is di hofning funn di Bivvel zu goot fa voah sei?
Miah kenna fashtay vann du fleicht so shpiahsht. Avvah, gukk moll vass shunsht es di Bivvel sawkt veyyich da future. Favass? Di promises in di Bivvel veyyich da future sinn diffand funn vass mensha sawwa es haebna zayld in da future. Di promises in di Bivvel kumma funn Gott. Do is favass’s en grohsah diffans is:
Ma kann Gott trosta. Di Bivvel sawkt Gott “kann nett leeya.” (Titus 1:2) Un yusht Gott is able fa sawwa vass haebna zayld in da future. (Jesoiya 46:10) Di Bivvel hott feel examples es prooft vass Gott sawkt dutt immah voah kumma. Fa may information, vatsh da video Vi Kenna Miah Shuah Sei es di Bivvel Voah Is?
Gott hott da power fa unsah problems fixa. Di Bivvel sawkt Gott hott da power fa du “vass-evvah es eah vill.” (Psalm 135:5, 6). In anri vadda, nix kann Gott shtobba funn du vass eah fashprocha hott. Un, Gott vill uns helfa because eah hott leevi fa uns.—Johannes 3:16.
Du mechsht vunra, ‘Vann Gott uns helfa vill un hott da power fa’s du, dann favass henn miah noch so feel problems?’ Fa sellah question ensahra, vatsh da video Favass Dutt Gott Soffahres Ohgay Lossa?
Vi zayld dee hofning voah kumma?
Gott zayld sei Reich, en government in da himmel, yoosa fa sei promises folfilla. Eah hott da Jesus da Roolah gmacht funn sei Reich, un hott een da power gevva fa acht gevva uf di eaht un mensha. Vann da Jesus uf di eaht voah, hott eah di granki kayld, di hungahrichi kfeedaht, ’s veddah kantrohld, un hott even di dohdi zrikk zu layva gebrocht. (Markus 4:39; 6:41-44; Lukas 4:40; Johannes 11:43, 44) Bei dess du hott eah gvissa vass eah du zayld vann eah Kaynich is funn Gott Sei Reich.
Vatsh deah video Vass is Gott Sei Reich? fa may lanna veyyich vi Gott Sei Reich dich helfa zayld.
Vann zayld dee hofning folfild sei?
Yusht glei! Vi kenna miah shuah sei? Di Bivvel hott ksawt funn sacha es haebna zayla es veisa es Gott Sei Reich yusht glei shteahra zayld roola ivvah di eaht. (Lukas 21:10, 11) Miah sayna dee sacha haebna heit.
Fa may ausfinna, lays da article “When Will God’s Kingdom Rule the Earth?”
Vi kann di hofning funn di Bivvel dich helfa nau?
Ebbah es kolfa hott di Bivvel shreiva, hott unsah hofning kamperd mitt en anchor “fa unsah sayl.” (Hebräer 6:19) Yusht vi en anchor en boat shtill haybt deich en shtoahm, di hofning funn di Bivvel kann uns helfa kawm bleiva vann miah deela mitt problems es miah henn heit. Unsah hofning kann uns helfa haebbi sei, kliah denka, un even healthy sei.—1 Thessalonicher 5:8.
