En de latste Joaren haben sikj väl mea junge Menschen daut Läwen jenomen aus ea. Wuarom es daut soo? Kunn daut mau rajcht bie jun Kjint soo sennen, daut dee soone Jedanken haft?

Waut wie en disen Artikjel seenen woaren

•  Wuarom wudden aule Elren sellen oppmoakjsom sennen, aus äa Kjint sikj veleicht well daut Läwen nämen?

•  Woo kaust du weeten, aus jun Kjint sikj veleicht daut Läwen nämen well?

•  Waut kaust du doonen, wan jun Kjint sikj daut Läwen nämen well?

 Vonne 2009 bat aune 2019 jeef daut enne Stäts meist krakjt dobbelt soo väl Schiela enne Huachschool, waut Narfentrubbel hauden. En deeselwje Tiet wieren doa uk sea väl mea Schiela, waut sikj daut Läwen neemen. a

 De Väaschta von de Jesuntheitssachen enne Stäts, Vivek H. Murthy, sajcht: “De junge Menschen bie dise Tiet haben gaunz besondre Schwierichkjeiten, met waut dee foadich woaren motten. . . . Dise Trubbels doonen sea väl Schoden aun dee äare Jefeelen un Narfen.”

 Waut de Schreft sajcht: “Eenen bedrekjten vedrieejen de Knoakes” (Spricha 17:22, PB).

 Du wurscht mol kjennen äwa dise Sachen nodenkjen:

•   Waut jun Kjint beläft haft. Haft june Mejal b mol waut sea schlemmet beläft? Veleicht haft äa Jung ar aufjesajcht ooda see feelt sikj von wäm veloten ooda aufjeschowen, veleicht kunn see waut nich fein doonen ooda doa es wäa jestorwen, waut see väl jeräakjent haft. Wan see soowaut beläft haft, kaun daut dan sennen, daut et mea aun ar deed, aus du veleicht denkjst?

•   Woo jun Kjint sikj vehelt. Es june Mejal nich mea soo foaken met äare Frind ooda äare Famielje toop? Jleicht see nich mea soont to doonen, waut ar ea sea scheen jinkj? Haft see veleicht soone Sachen wajchjejäft, waut ar sea väl wieet wieren?

•   Waut jun Kjint sajcht. Rät june Mejal von stoawen? Sajcht see soowaut aus: “Ekj wenscht, ekj kunn stoawen”? Rät see doavon, daut see nich well eene Laust sennen fa junt?

   Eenjet, waut een Kjint sajcht, es veleicht bloos “onbedochte Räd” (Hiob 6:3, PB). Oba daut kunn sennen, daut ar werkjlich Help fält! Wan june Mejal doavon rät, daut see stoawen well, dan lot daut kjeenmol toch!

 Wan june Mejal oba doavon rät, daut see bieaun doaräwa nodenkjt, sikj daut Läwen to nämen, dan wurscht du ar froagen kjennen: “Hast du uk doaräwa nojedocht, woo ooda wanea du daut wurscht doonen wellen?” Doano, waut see sajcht, kaust du weeten, woo schlemm daut werkjlich es.

 Sandra sajcht: “Wie Elren wellen onse Kjinja eenje Sachen leewa goanich froagen, wäajen wie Angst haben, waut dee sajen woaren. Oba wan de Kjinja aulmols soone Jefeelen haben, wudd daut dan nich väl bäta sennen, wan wie aus Elren daut uk wisten?”

 Waut de Schreft sajcht: “Jedanken en eenen Maun sien Hoat sent soo aus en deepet Wota, oba een vestendja Maun woat dee rut trakjen” (Spricha 20:5, PB).

•   Proow jeduldich, de Jefeelen von jun Kjint to vestonen. Daut wudd goot sennen, ar ieescht mol doafäa to lowen, daut see soo op äwa äare Jefeelen rät. Dan wurscht du soowaut sajen kjennen aus: “Ekj well vestonen, waut die schwoa es un woo du die doamet feelst. West du doavon räden?” Du wurscht ar uk froagen kjennen: “Woo jeit die daut, wan du soone Jefeelen hast?”

   Daut es sea wichtich, daut du dan goot toohorchst, waut see doatoo sajcht. Du motst nich auntovestonen jäwen, daut äare Jefeelen nich wichtich sent ooda daut et nich soo schlemm es, woo see sikj feelt. Doo uk nich bloos haustich waut sajen, waut see aules wudd doonen sellen, daut et bäta woat.

   Waut de Schreft sajcht: “Siet schwind bie de Sach toom horchen, äwalajcht goot ea jie räden, un woat nich leicht doll” (Jakobus 1:19, PB).

•   Plont met june Mejal toop, woo jie ar beschitzen kjennen. Halpt ar, daut see dise Sachen vestonen un oppschriewen kaun:

   Wanea kjricht see soone Jedanken? Waut denkjt ooda deit see, ea see soone Jedanken kjricht, daut see sikj daut Läwen nämen well?

   Waut kaun halpen? Es doa irjentwaut, waut see doonen kaun, waut ar jeweenlich halpt, von dise schwoare Jedanken loostokomen un daut see sikj jelotna feelt?

   Wäa kaun halpen? Wua kaun june Mejal no Help froagen? Daut fält, daut doa wäa es, opp dän see een Vetruen haft, biejlikj du ooda een aundra, waut aul een bät ella es aus june Mejal. Oba daut kaun uk een Dokta fa Narfenkrankheiten sennen ooda eene Organisazion, wua se utjelieet sent toom soone Menschen halpen, waut sikj daut Läwen nämen wellen.

   Waut de Schreft sajcht: “Väasechtich plonen, brinjt eenem Vedeenst” (Spricha 21:5, PB).

•   Bliew oppmoakjsom. Sie emma doarom todoonen, woo june Mejal daut jeit, wan daut uk soo lat, daut see sikj aul väl bäta feelt.

   Daniel sajcht: “Aus mien Sän säd, daut hee nu nich mea soone Jedanken haud, sikj daut Läwen to nämen, docht ekj bie mie soo: ‘Nu haft hee daut äwastonen.’ Oba daut wia een groota Fäla. Doa kaun haustich irjentwaut oppkomen, daut dee wada soone Jedanken kjricht un sikj daut Läwen nämen well.”

   Moak june Mejal daut dietlich, daut schlajchte Jefeelen nich fa emma bliewen – dee komen un gonen. En daut Buak The Whole-Brain Child sajcht daut: “De Jefeelen sent soo aus daut Wada . . . Daut es nich waut enjebildet, wäajen wan eena em Räajen steit, woat eena naut. Daut wudd een bät onkluak sennen, buten em Räajen to stonen un sikj oba soo doonen, aus wudd daut nich mol räajnen. Oba daut wudd krakjt soo onkluak sennen, wan eena em Räajen stunt un docht: ‘Nu woat de Sonn kjeenmol mea väakomen!’”

•   Saj jun Kjint, daut du halpen west: Saj ar, daut du ar leefst un daut see sikj gaunz doaropp veloten kaun, daut du ar unjastetten woascht. Du wurscht uk sajen kjennen: “Ekj woa aules doonen, waut ekj kaun, om die met dit to halpen.”

   Waut de Schreft sajcht: “Een Frint woat emma Leew bewiesen, un een Brooda es jebuaren toom em Trubbel biestonen” (Spricha 17:17, PB).