Jo, de Schreft kaun halpen, wiels dee kjemt von “Gott, dee de doljedrekjte treest” (2. Korinta 7:6, PB). De Schreft haft aul väl Menschen jeholpen, waut soone Jedanken hauden, sikj daut Läwen to nämen. Wan dee uk nich uzhent een Doktabuak es äwa soont, haft dee doawäajen gooden Rot, waut uk die halpen kaun.

•  Waut fa gooden Rot haft de Schreft?

•  Rät de Schreft von soone Menschen, waut mol haben wult stoawen?

•  Wan du Jedanken hast, die daut Läwen to nämen, woone Bibelvarzhen kjennen die halpen, dee to äwakomen?

•  Waut kaust du doonen, wan een Frint to die sajcht: “Ekj well nich lenja läwen”?

•  Waut es, wan ekj mol ea jeprooft hab, mie daut Läwen to nämen?

• ● Schedd die to wäm ut.

   Waut de Schreft sajcht: “Een Frint woat emma Leew bewiesen, un een Brooda es jebuaren toom em Trubbel biestonen” (Spricha 17:17, PB).

   Waut daut bediet: Wie brucken daut, daut aundre ons unjastetten, wan wie schwoare Jedanken haben.

   Wan du aules fa die helst, dan kaun de Laust too schwoa woaren un schia nich mea to droagen gonen. Oba wan du die to wäm utschetst, dan kaun daut leichta woaren un daut kaun die mau rajcht halpen, aundasch doaräwa to denkjen.

   Proow, dit to doonen: Räd vondoag noch met wäm doaräwa; met wäm von diene Famielje ooda met eenen Frint, waut du vetrust. a Du wurscht veleicht uk kjennen aules oppschriewen, woo die daut jeit.

• ● Sieekj Help biem Dokta.

   Waut de Schreft sajcht: “De jesunde brucken dän Dokta nich. Dän brucken mau de kranke” (Matäus 9:12, PB).

   Waut daut bediet: Wie sellen biem Dokta no Help sieekjen, wan wie krank sent.

   Wan eena Jedanken haft, sikj daut Läwen to nämen, licht daut foaken doaraun, daut aun eenem sien Vestaunt ooda met eenem siene Jefeelen waut nich enne Ordninj es. Eena doaf sikj doamet nich schämen, krakjt soo goot nich aus bie eene aundre Krankheit. Un met soont aus dit kaun eena uk doktren.

   Proow, dit to doonen: Sieekj soo schwind aus mäajlich Help von eenen Dokta, waut sikj met soont vesteit.

• ● Denkj doaraun, daut Gott om die todoonen es.

   Waut de Schreft sajcht: “Woaren doa nich fief Spoalinja fa twee Zent vekoft? Un doch es bie Gott nich eent vejäten. ... Fercht junt nich; jie sent mea wieet aus een deel Spoalinja” (Lukas 12:6-7, PB).

   Waut daut bediet: Du best bie Gott sea väl wieet.

   Veleicht feelst du die gaunz auleen, oba Gott sitt daut, woo die daut jeit. Hee es om die bekjemmat, mau rajcht dan, wan du nich mea dän Wunsch hast, wiedatoläwen. Psalm 51:19 sajcht: “Een veenjstet, jebroaknet Hoat woascht du, oo Gott, nich veachten” (PB). Gott well, daut du läfst, wiels hee leeft je die sea.

   Proow, dit to doonen: Unjasto die enne Schreft, aun waut du kaust seenen, daut Gott die leeft. Läs biejlikj daut 24. Kapitel von daut Buak Komm Jehova doch näher, waut eene Help es toom de Schreft studieren.

• ● Bäd to Gott.

   Waut de Schreft sajcht: “Schmiet aul june Sorjen opp am [Gott]; hee sorcht fa junt” (1. Petrus 5:7, PB).

   Waut daut bediet: Gott well, daut du am aules opprechtich un frie sajchst, waut die oppem Hoaten licht.

   Gott kaun die de ennaliche Fräd un de Krauft jäwen toom wiedamoaken (Filippa 4:6-7; 4:13, JHF). Un soo halpt Gott aul dee, waut opprechtich no am sieekjen (Psalm 55:23).

   Proow, dit to doonen: Bäd vondoag noch to Gott. Bruck sienen Nomen, Jehova, un saj am, woo du die feelst (Psalm 83:18, NW). Froag am no Help, daut du wiedamoaken kaust.

• ● Denkj äwa de Hopninj von ut de Schreft no.

   Waut de Schreft sajcht: “Dise Hopninj hab wie aus eenen fausten, sechren Anka fa onse Seel” (Hebräa 6:19, PB).

   Waut daut bediet: Diene Jefeelen kjennen veleicht opp un dol gonen, soo aus een Schepp oppem Wota em Storm. Oba de Hopninj ut de Schreft kaun die halpen, nich unjatogonen, soo aus een Anka daut Schepp fausthelt.

   Dise Hopninj es nich bloos waut utjedochtet, oba dee stett sikj opp Gott sien Vespräakjen, daut hee aul daut Lieden woat wajchnämen (Openboarunk 21:4).

   Proow, dit to doonen: Lia noch mea äwa de biblische Hopninj en daut 5. Poat von daut Heft Eene goode Norecht von Gott.

• ● Doo waut, waut die scheen jeit.

   Waut de Schreft sajcht: “Een frooet Hoat deit krakjt soo väl goot aus Medizien” (Spricha 17:22, PB).

   Waut daut bediet: Wan wie soont doonen, waut wie jleichen, dan kjenn wie ons en onse Jedanken un uk ennalich bäta feelen.

   Proow, dit to doonen: Doo waut, waut die jeweenlich scheen jeit. Toom Biespel horch no mootjet Spell ooda läs waut, waut die oppmuntat ooda proow waut to doonen, waut du opp iernst jleichst. Du woascht uk kjennen schaftja sennen, wan du waut deist toom aundre halpen, mau rajcht wan daut uk waut kjlienet es (Aposteljeschicht 20:35).

• ● Pauss no diene Jesuntheit opp.

   Waut de Schreft sajcht: “Kjarpaliche Eewunk halpt” (1. Timotäus 4:8, PB).

   Waut daut bediet: Daut kaun toom gooden sennen, wan wie ekserseisen, jenuach schlopen un jesunt äten.

   Proow, dit to doonen: Doo Ekserseis moaken. Du wurscht kjennen bosich gonen, wan daut uk mau 15 Minuten sent.

• ● Denkj doaraun, daut de Jefeelen un aundre Sachen em Läwen, nich soo bliewen woaren.

   Waut de Schreft sajcht: “Jie weeten äwahaupt nich waut morjen sennen woat” (Jakobus 4:14, PB).

   Waut daut bediet: Een groota Trubbel, mau rajcht wan sikj eenem daut soo späat, daut eena doa nuscht met doonen kaun, woat veleicht nich fa lang aunhoolen.

   Endoont woo diesta die diene Loag vondoag väakjemt, daut kaun sikj morjen endren. Doawäajen proow bloos, doamet delenjd to komen (2. Korinta 4:8). Eene schwoare Loag kaun sikj wada endren, oba wan eena sikj daut Läwen nemt, kaun eena daut nich wada trigjnämen.

   Proow, dit to doonen: Läs biblische Jeschichten von Menschen, waut sikj eenjemol uk soo mootloos feelden, daut dee nich lenja läwen wullen. Un see, woo dee äa Läwen met de Tiet bäta wort un foaken opp soone Wajch, waut dee sikj nich jedocht hauden. See wie mol een poa Biespels.

 Jo. De Schreft rät von eenje, waut werkjlich säden: “Ekj well nich lenja läwen”. Gott wia nich vestalt äwa dee, oba hee holp dee. Un hee kaun die uk halpen.

Elia

•  ● Wäa wia daut? Elia wia een äwanämenda Profeet. Oba hee wort doawäajen uk mootloos. Jakobus 5:17 sajcht: “Elia wia een schwaka Mensch soo aus wie” (PB).

•  ● Wuarom wull hee stoawen? Opp eene Sauz feeld Elia sikj auleen un wieetloos un hee haud Angst. Doawäajen prachad hee Jehova: “Nemm mien Odem von mie” (1. Kjennichs 19:4, PB).

•  ● Waut holp am? Elia schedd sikj to Gott ut. Woo jeef Gott am Moot? Gott wees, daut hee om am bekjemmat wia un wees am siene Krauft. Hee leet Elia uk weeten, daut et noch aun am fäld un jeef am eenen leeftoljen, feinen Helpa.

•  ▸ Läs Elia siene Jeschicht en 1. Kjennichs 19:2-18.

Hiob

•  ● Wäa wia daut? Hiob wia een rikja Maun met eene Famielje, un hee deend tru dän woaren Gott.

•  ● Wuarom wull hee stoawen? Opp eemol endad sikj aules en Hiob sien Läwen un daut wort sea schlemm. Hee velua aul sien Hab un Goot un aul siene Kjinja storwen en een Ojjlekj. Un hee kjrieech eene sea schlemme Krankheit. Un tolatst wort am noch sea hunjsch väajeschmäten, daut hee selfst Schult wia fa aul siene Trubbels. Hiob säd: “Ekj sie saut von läwen; ekj woa nich opp emma läwen” (Hiob 7:16, PB).

•  ● Waut holp am? Hiob bäd to Gott un räd met aundre äwa siene Loag (Hiob 10:1-3). Am wort von Elihu oppjemuntat. Daut wia een metliedenda Frint. Dee holp am, siene Omstend von eene aundre Sied to seenen. Un waut daut wichtichste wia, Hiob neem Gott sienen Rot un siene Help aun.

•  ▸ Läs Hiob siene Jeschicht en Hiob 1:1-3, 13-22; 2:7; 3:1-13; 36:1-7; 38:1-3; 42:1-2, 10-13.

Moses

•  ● Wäa wia daut? Moses wia een Leida von daut Volkj Israel un hee wia een trua Profeet.

•  ● Wuarom wull hee stoawen? Moses must eene schwoare Laust droagen, am wort emma wada utjegrunzt un hee feeld sikj äwameed. Gaunz vetwiewelt säd hee to Gott: “Moak mie ... doot” (4. Mose 11:11, 15, PB).

•  ● Waut holp am? Moses säd to Gott, woo hee sikj feeld. Gott muak Moses siene Laust leichta un holp am, daut hee sikj nich mea soo äwafoddat feeld.

•  ▸ Läs Moses siene Jeschicht en 4. Mose 11:4-6, 10-17.