•  Mott ekj werkjlich leichta woaren?

•  Woo kaun eena daut baste denna woaren?

•  Woo kaun ekj daut doonen?

•  Waut aundre Jugentliche sajen

 Eenje Jugentliche sajen, daut see wellen denna woaren. Oba es daut werkjlich needich?

•   Väle denkjen mea aun daut, woo äant lat, aus aun äare Jesuntheit. Eenje wellen bosich denna woaren un doawäajen doonen dee nich opp jieda Moltiet äten ooda brucken Pellen toom denna woaren. Jeweenlich schauft daut nich sea fein ooda daut kaun mau rajcht jefäadlich sennen.

   Hailey sajcht: “Eenje Mejalen äten meist nuscht mea, om daut see bosich denna woaren. Oba jeweenlich es dee daut sea toom Schoden un daut dieet lang, bat dee wada gaunz jesunt sent.”

•   Bie väle es daut goanich needich, daut dee denna woaren. Dee sent goanich too schwoa. Dee jleewen bloos, daut see too dikj sent, wiels dee sikj met aundre Jugentliche vejlikjen ooda met sea denne Menschen, waut eena en Bieekja ooda em Internet ooda en Films sitt.

   Paola sajcht: “Aus ekj 13 Joa wia, wull ekj soo sennen aus miene Frind. Ekj docht, wan ekj uk soo denn wia aus dee, dan wudden dee mie dolla jleichen, wiels dee wieren aula grulich sea denn.”

 Oba daut jeft uk junge Menschen, waut doa werkjlich wudden sellen leichta woaren. Waut sajcht de World Health Organization doaräwa?

•   Oppe gaunze Welt sent soo bie 340 Millionen Menschen too schwoa, waut von 5 bat 19 Joa sent.

•   Aune 1975 wieren doa bloos 4 % von dee too schwoa, waut von 5 bat 19 Joa wieren. Oba aune 2016 wieren daut aul 18 %.

•   En de mieeschte Lenda jeft daut mea Menschen, waut too dikj sent, aus waut too denn sent.

•   Soogoa en de oame Lenda sent väle too dikj un doa mau rajcht en soone Famieljes, wua waut von dee unjaernäat sent.

 Waut wurscht du doonen?

1.   Nich opp aule Moltieden äten.

2.   Ekserseisen un jesunt äten.

3.   Pellen ennämen toom denna woaren.

 De rajchte Auntwuat wudd sennen: Numma 2: Ekserseisen un jesunt äten.

 Veleicht woat eena haustich leichta, wan eena nich opp aule Moltieden at ooda jewesset Äten tochlat. Oba daut kaun sea ojjesunt sennen un eena woat woomäajlich fuaz schwanda, wan eena wada soo äten deit aus ea.

 Oba wan du no diene Jesuntheit oppaussen deist, dan woascht du die bäta feelen un die woat uk schmocka loten. Dr. Michael Bradley schrift: “Daut es daut baste un daut sechaschte un daut jesuntste, wan eena sikj daut soo enrecht, daut eena sien Läwen lank jesunt läft”. a Waut wiest ons daut? Wan du too schwoa best, dan pauss nich bloos doano opp, waut du atst. Kjikj uk doano, daut du een jesundet Läwen fieescht.

 De Schreft sajcht, daut wie ons motten “beharschen kjennen” un doa es uk daut äten met en (1. Timotäus 3:11, De Plautdietsche Bibel). Daut sajcht doa mau rajcht, daut wie nich too väl äten sellen (Spricha 23:20; Lukas 21:34). Woo kaust du daut nokomen un jesunda läwen?

•   Unjasto die daut, waut von Äten jesunt es.

   Eena mott daut nich äwadriewen, oba wan eena doa een bät omweet, waut von Äten jesunt es, dan kaun eenem daut aul väl halpen. Un wan eena nich well dikja woaren, dan es daut daut baste, daut eena oppaust, waut eena at.

•   Doo pinkjlich ekserseisen.

   Waut wurscht du jieda Dach doonen kjennen toom die bewäajen? Du wurscht biejlikj kjennen de Trap brucken enne Städ dän Foastool. Ooda du wurscht kjennen ne haulwe Stund bosich gonen enne Städ Videogäms spälen.

•   Wan die daut aun, mea jesundet to äten enne Städ waut fatjet ooda sea seetet.

   Eene Jugentliche, waut Sophia heet, sajcht: “Ekj proow emma een bät Frucht ooda Jreens tus to haben, daut mie daut nich soo sea jankat, waut ojjesundet to äten.”

•   Ät langsom.

   Eenje Menschen äten soo bosich, daut dee daut nich enne Tiet enwoaren, daut see aul voll sent. Doawäajen ät nich soo bosich un wacht een bät, ea du die fresch enschapst. Veleicht woascht du dan en, daut die goanich soo väl Äten fält, aus du dochst.

•   Pauss opp, waut von Äten sea dikj moakt.

   Wan du die waut toom äten kjafst, dan es daut doa oppe Doos foaken to seenen, woo väl Kalorien daut haft. Je mea Kalorien daut haft, je dikja kaun die daut moaken. Pauss opp: Soont aus Zeida ooda sea fatjet ooda seetet deit sea masten, wiels daut sea väl Kalorien haft.

•   Bliew utjejlikjt.

   Sara, waut 16 Joa es, sajcht: “Met de Tiet paust ekj soo sea opp, waut ekj eet, daut ekj bloos noch doaraun docht, woo sea mie daut masten wudd, wan ekj ne Schiew met Äten sach.” Äwadriew daut nich. Denkj doaraun, daut du uk mol soont äten kaust, waut du sea jleichst.