Jieda Joa drekj wie hundade Millionen Biblen un aundre Bieekja un jäwen dee emsonst wajch. Wie buen uk Vesaumlungshiesa un Offizen un hoolen dee en Ordninj. Un wie sorjen fa dusende, waut em Betel schaufen ooda Missionoaren sent, un halpen, wan daut biejlikj wua een Ieedbäben ooda een Owwada jejäft haft. Woo woat aul dit betolt?

Wie velangen nich dän Tieenden, doonen nich kollakjten ooda sest Jelt fodren. Wan wie met daut Prädichtwoakj uk väl Onkosten haben, froag wie de Menschen oba nich no Jelt. Aul äwa hundat Joa trigj stunt en dän tweeden Wachtturm, waut doa rutkjeem, daut wie ons doaropp veloten, daut Jehova ons unjastett, un daut wie “de Menschen kjeenmol froagen ooda schlemmen woaren, daut dee ons unjastetten sellen.” Un soo es daut bat nu (Matäus 10:8).

De Onkosten woaren derch friewelje Gowen betolt. Een deel Menschen räakjnen ons Liawoakj väl un jäwen Gowen. Un Jehova siene Zeijen selfst brucken uk wellich von äare Tiet, Krauft, Jelt un aundret, waut doa fält, daut Gott sien Wellen oppe gaunze Ieed kaun jedonen woaren (1. Chronik 29:9). En de Vesaumlungshiesa un oppe Kongressen jeft daut Gowenkaustes, wua jieda eena waut nenlajen kaun. Eena kaun uk opp onse Websied jw.org Gowen jäwen. Een grootet Poat von de Gowen komen von Menschen, waut nich sea riew haben, biejlikj soo aus de oame Wätfru, waut von Jesus jeloft wort, wiels see twee kjliene Jeltstekja en de Tempelkauss nenläd (Lukas 21:1-4). Daut wiest, daut jieda eena, waut “sikj [daut] em Hoat väajenomen haft” Gowen to jäwen, sikj doatoo kaun waut “auntsied lajen” (2. Korinta 9:7; 1. Korinta 16:2).

Wie sent ons secha, daut Jehova doa uk wieda no seenen woat, daut doa Menschen sent, waut am met daut ieren wellen, waut see haben, un sien Kjennichrikj met Gowen unjastetten, soo daut sien Wellen jedonen woat (Spricha 3:9).

• Waut es bie Jehova siene Zeijen aundasch aus bie de aundre Gloowes?

• Fa waut woaren de Gowen jebrukt?