3. | Biespels von de Bibeltiet kjennen halpen
DE SCHREFT RÄT VON . . . Erfoarungen von true Mana un Frues, waut sikj uk eenje Mol schwak feelden “soo aus wie”. (JAKOBUS 5:17)
Waut daut bediet
Enne Schreft sent väl Erfoarungen von Mana un Frues, waut uk eenje Mol bedrekjt wieren. Wan du dee äare Jeschichten läst, dan finjst du veleicht wäm, waut sikj uk soo feeld aus du.
Waut eenem halpen kaun
Ons aula fält daut, daut aundre ons vestonen kjennen. Daut es besonda wichtich, wan wie eene Narfenkrankheit haben. Wan wie de Schreft läsen, dan lia wie, daut aundre sikj uk soo feelden un dochten aus wie. Wan wie seenen, daut true Deena von de Bibeltiet uk soone Trubbels hauden aus wie, dan feel wie ons nich soo auleen, wan wie groote ennaliche Angst haben (anxiety/ansiedad) un soo beorruicht sent.
De Schreft rät von väle, waut dochten, daut kjeena om dee bekjemmat wia, un sikj nich mea Rot wisten. Hast du uk mol soo jedocht: “Ekj kaun bloos nich mea wieda?” Moses, Elia un David feelden sikj uk mol soo (4. Mose 11:14; 1. Kjennichs 19:4; Psalm 55:5).
De Schreft rät von eene Fru, waut Hana heet. See wia gaunz rauf un feeld sikj “sea jeschloagen”. Daut wia, wäajen äaren Maun siene aundre Fru ar sea väl toosad un äwa ar spott, wiels see nich kunn Kjinja haben (1. Samuel 1:6, 10).
De Schreft rät von eenen Maun, waut Hiob heet. Veleicht feelst du die uk eenje Mol soo aus hee. Wan hee uk eenen stoakjen Gloowen haud, feeld hee sikj sea doljeschloagen. Hee säd: “Mie äakjelt mien Läwen; ekj well nich mea läwen” (Hiob 7:16, NW).
Wan wie lieren, woo de Menschen vonne Bibeltiet met äa schwoaret foadich worden, dan kaun ons daut uk de Krauft jäwen, met onse Trubbels un Sorjen foadich to woaren.
